ماطوشة تازة من سيريا نيوز
مذكرات حمصي صفنان... بقلم : محمد المثنى الخواجة
مساهمات القراء

اجيت على حومص بعد تلات سنين...وبألبي كالعادي شي بيتسمى شوء وحنين
كنت بالأول اجي يومين تلاتي.....ارجع الخميس وكون بالكتير جاي التلاتي
بس هالمرة ضليت أكتر....... ما مشان شي..... بس لأنو موعد فيزتي اتأخر

اول يوم شي ستي الصوبح…………..
حسيت بريحة.... عم تضرب مونخاري
ما عرفتها ريحة شي بطن......ماعرفتها شي حفرة مجاري
ضلت هالريحة ساعتين........وبعدها.... نسيتها لحالي
فائوا الناس بلا طول سيرة........ وما حدا دريان شو صار.... بهديك الليلة
عرفت بعدها انو الحماصنة.... عم يناموا ليلهم............والروايح عم تهديلهم
ومتل ما تعودوا على طأ حنك عالناس...... تعودوا على روايح الحمض والأساس

تاني يوم نزلت اتمشى بالسيارة ...
لا تستغربوا.... لأنو المشي على الرجلين.... ما عادت من معالم الحضارة
عدد السيارات كترت... ومشان هيك البلد.... اتألبت واتحفرت
صار شارع الغوطة أصغر...... وذكرياتنا على حروفو.. أخدوها على أبعد مكسر
سألت... ليش شالوا الأكاسيا والشجر...؟ وحطوا بدالهم كومات الحجر؟
الولي في ناس أفهم منك.... بتعرف مصلحتك.... وبتأدر همك
والولي الشجر صايرعم يئزينا..... بدنا نلحئوا بكل حومص... لنشيلوا بالماكينا
ومشيت بشارع تاني.... ذكرياتوا أقل.... بس حجاروا ابدا ما بتنساني
هادا الشارع اسمو العراب...... محل ماكانت تعلأ الكعاب
الولي انهم ظبطوه .....صار متل الشانزلزيه.....عرضوه و نوروه
التلهم والله حيرتوني....... وبهالتصميم صطلتوني
انتو بدكم شوارع عريضة........ ولا ألع الشجر بحومص صاير فريضة

حموصة صارت مجنوني وبالهوايش.... مفتوني

حملت حالي ونزلت عالدبلان
يمكن مافي شي اتغير....... ويمكن انا نسيان
بس المهم ادريت.... انو الأسعار... ما بالحسبان
وأصحاب المحلات .... فلان وابن فلان وابو فلان
التلهم ياناس فهموني..... واذا حكيت طنشوني
كيف اجرة محل مية الف.......... والناس عم تضرب كف على كف
هلأ التجار عم يشتغلوابالتياب...؟ ولا انا ماني عم اخود بلأسباب
الولي البلد اتغيرت..... ومن احسن لأحسن اتطورت
والولي كمان........... انو لازم كون... حربوء وفهمان
الت بألبي بعين الله..... ويمكن انا لسا... ما اولت بسم الله



مشينا هيك على شارع الملعب...... محل ما كنا نروح ونجي.. بدون ما نتعب
الشارع يا اخوان صاير شي جنان
أهوة جنب أهوة جنب أهوة.... وبتسأل لمين بيؤولولك.....
ل فلان وابو فلان وابن فلان
بلا طول سيرة وفزلكة
هالشارع صار معجوء........وبالصبايا والشباب.. مفتوء
أعدت باول وحدة... وبلا ذكر اسامي
وكانت هاي الأعدة.. بأول ايامي
للحأ الأعدة ظريفة... والطاولات حلوة ونضيفة
بس مع انوفاتورة شخصين طلعت خمسمية
طعمة المشروب كانت اتولية
قلت يمكن انا غلطان ولازم ماكون نئز أو أرفان
رحنا على أهوي تاني .. الولي هاي ملياني... واسمهامابعرف... فرنسي على طلياني
وبعد ما طلبنا وحضر المشروب
جابلونا شي غير المكتوب
كمان الت بالبي... ياولد انتي الغلطان... ويمكن مانك فهمان
روح جرب الجهة التاني... هادا صاحبو... غير فلان وابو فلان وابن فلان
وفتنا على هالمكان.......
حسيت حالي بمكان غير المكان...... وزمان غير الزمان
كأني ابن السبعين وجاي....... على محلات ولاد العشرين
مالح احكي شي.... بس طلعت منو صفنان.... وبحالة حومص مدهوش كمان

وأفت براس الشارع من بعيد..... وحاطط راسي بهالأيد
وعم اؤول بألبي
كيف هالجامع يلي عم يأدن هالأدان... عم يطلع منوهيك ناس.. بدون حس او وجدان
يا ابي رباني غلط.... أو انا صايبني اللغط
وتذكرت ايام زمان
لا كنا نروح على جامع.... ولا نحضر دروس فلان وفلانة.... ولاعلان ولاعلانة
كنا نطلع من المدرسة.... ونركض على شارع الغوطة.... ندعوس على طرابو دعوسة
نستنى البنات ليطلعوا من غرناطة...... وكل واحد فينا..... عم يمشط شعروا بالمشاطة
نتفرج عليهم وهني ماشين....... وبألبنا عم نقول........ يا ليل يا عين
يطلعوا البنات مشنكلين..... وبمشيتهم متفشكلين
ماكنا نشوف بنت بحجاب..... بس كانوا بأخلائهم..... ينكتب كتاب
وكنا نتابعهم بعيوننا المتحسسة.... بدون وقاحة او فسفسة
بس هلأ صارغير..... والحجاب صار شي خطير
والشباب اتجعلكت.... وبالبنات اتشبهت
وصرت تشوف بنفس المكان...... الشيوخ مع الزعران
البنت بتشوفها مصروعة.... بشارع الملعب مزروعة
عم تتفتل يمين وشمال...... وحالها مو هاد الحال
من عمرها طنعش بتتغندر.. جنز وبودي.. وبالحجاب بتتستر
والشب بيلحأها كمان... وبيسمعها كلام.... والله ما بيحملو انسان

حموصة صارت مألوبي وعلى شيكاغو..... محسوبي


لح غير حديثي هلأ... مشان ما تؤولوا بالغيبة والنميمة متعلأ
......
لح وأف مرة تاني عن النميمة.... واحكي عن شغلة بتهم هالأمة العظيمة
انا مابفهم بالطابة... ولا بالدوري ولا بالكاس
بس والله شي ما بيدخل بالراس
كيف نادي بيستثمرهالأهاوي المطشوشي...... جيبتو فاضي ومبخوشي
سؤال برسم الأجابة لأصحاب الخبرة والانابة
بدي اسأل المسؤولين..... والتجار المعروفين
كيف بلدنا لح تتطور..... اذا شبابها عم يترحل
ليش الشب ما عم يرجع....... مع انو برا موجع
ماعم الكم ما تبيعوا بضاعة........ أو ما تفتحوا أهوة... جماعة
بس حاجتكم مؤامرات........ وحاجي دوائر وأبراج...... بالعشرات
و لازم فهمكم منيح..... وضع هالشب الجريح
الواحد فيهم عيونوا لبرا....... يدور فيزا سعودية
بيدفع دم ألبو لكفيلو............. ليعيش حياة عبودية
وبيكون ببلدوعامل انجاز......... وشغال بشركة دولية
ويا عيني بيئضي سنتين...... عم يوفي بهالدين
وبعدها كمان بسنتين..... بيلم بدلو..... ويخزي العين
وبيطلع ياحبة ألبي.... زميط....... وبعيون الحماصنة.... طيط
مرتو بيتعقد ليجيبا......... وبيفرشلا البيت.... من أريبا
أخرتها متغرب تعبان............. ومرتو ماعاجبها كمان

حموصة صارت عجيبة ومن بنغلادش...... أريبة

الولي لازم تشتري بيت... مشان تخطب حمصية.... اذا حبيت
التلهم ليش لأ... ما بدي اطمع كتير.... جنب أهلي.... لا كبير ولا صغير
الولي ظبط عشرة مليون..... وأحلى بيت بيجهزلك.... كرمال هالعيون
انحولت عيوني بالطول وادنيي طنو طن
التلهم أهلي بالغوطة..... والغوطة مانها بواشنطن
الولي هاي حمص يا حباب..... بلد الحمص والكباب
التلهم هالمبلغ كبير..... ولازملوا تفكير وتدبير
ضربت أخماس بأسداس.... والت بلمهم متل الناس
وبحسبة صغيرة بسيطة كتير...... عرفت الحل..... وشكرت ربي كتير
والت لحالي هادا الحل هوي الأنسب...... وأبدا ما لح اتغلب
واذا عجبكم يا أخوان..... بهديكم اياه بالمجان
لح روح لعندابوالأحلام.... واقترح عليه منام

يهدوا حمص بيت بيت
ويشيلوا الناس بكميون
ويعوضوهم عن كل بيت
بمبلغ حوالي المليون
ويزتوهم بشي أرض....... ويؤولولهم عيشوا هنيك
ساعتها بتلائي علية..... وبتخطب احلى حمصية


لح ارجعلكم عالتفاهة... مشان ما تملوا... وتفكروني اخد الشغلة وجاهة
الولي اصص جديدة........ عن الحب والغرام
وحكولي انو حمص........ صارت أفظع من الشام
حكولي عن فالنتينو.......... الكل البنات حابينو
الحلوة انو منطوط........... وعالبنات بيتحطط
وحكولي عن شب تاني...... وعن صاحبو ابن فلاني
ولما بسأل منو هاد؟؟؟؟؟
بيئولولي صاحب فلانة ....وأبلها كان مع علانة
والمصيبة انو فلانة........ هي صاحبتها لعلانة
الله يرحم حب زمان
شب يؤول للبنت بحبك... تضل بألبو عشر سنين
شب يؤول للبنت بشوفك... ينطرها شي تلات سنين
هيي تؤولوا تعا اتأدم...... وهوي خيفان من الجيش
هيي تؤولوا روح اتعلم..... يروح يركض متل كديش
وبالأخر هيي تتجوز....... وهوي يهاجر حتي يعيش

حموصة صارت خربانة ومتل انطالية.... فلتانة

الظاهر طولت كتير...... بالصفن والتفكير
بس حبيت اوصف حال..... غريب وما كان عالبال
يمكن كنت مفكر ابئى أكتر...... بس الظاهر المكتوب.... مأدر
طلعت الفيزة بدون تأخير...... والطيارة لح بتطير
والأغراض عم تتحضر...... والشناتي عم تتسكر
وببالي سؤال كبير..... عن الجية التاني..... اذا حتصير
هل لح ضل وأت كبير...؟ أو برجع الخميس.. بعد ماكون جاي التلاتا بالكتيير ؟؟؟؟؟؟

:cry::cry:
حلوة كتييير
وللاسف هاد اللي صاير:cry:

ميرسي عمو:D

حــلوة كتير ..

يسلمو خيو ..


.....


:D

من بعد ما طولت الأعدي بحموصة.....لأنو الفيزا أخدت لا كام حوصة ولوصة
سافرت مبارح ومشي الحال


وبألبي نوايا.............وعلساني كلام الأرزال
الظاهر صابتني الصفنة ..... اجتني متل الاسهال
والله كأنها شي لعنة ......عم تطرش عكل الأجيال

كنت ناوي اني اسكت...................... وحاولت صفناتي اضبط
بس اولت خليني احكي.....أحسن ما تطلع الروايح... وعيوني تبكي

رفيئي اللي زودتا........بحكياتك على حومص............... وتخخنتا
كأنو ما عاجبك العجب..... ومفكر الحماصني....... صايبهم الجرب
وفكرت وانا عم ائرا يلي عم تؤولوا........... انك جاي من هونولولو

التلو انا ماني من سويسرا ............. وحياتك انا من سوء الحشيش
وما خلاني اترك حومص .......................غير الهريبة من الجيش
والتلو اني حومصي........................... وامي من سلالة الرسول
وابي ترك فرنسا وسويسرا ..................ليبئى بحموصة على طول
واني جيب سيرة اوسيتيا أو كمبوديا.............. هادا كلام ما معؤول
المهم اني وأت بحكي .........................بكون عن كلامي مسؤول

هالمرة مالح طول................................ لأني بمشاكلي متبهدل
بس لح احكي عن شهر الصيام..........وهوي ما بئى منو شوية أيام
بصراحة أجوائو جميلي ........................وأكلاتو كتيري وتئيلي
حتى انو عمنا السواس..... وبفروعوا............. ما عم يلحأ عالناس


الناس فوء بعضها مكومة .....................عالتمر والسوس مفلحمة
والمخابز ماعم تلحأ...................................وبم� �اعيدها ملتزمة
وبالجوامع شغال التراويح.....................والناس عهالشغلة متعلمة

الناس بأهاوي الملعب متأنبزة...................من أبل الفطور متجهزة
وبعد الفطور بشي ساعتين..............بتؤوم عالتروايح ويخزي العين
وأبلها بتاخود أحلى أركيلة..........................من بعد الوجبة التئيلة
ومن بعد التراويح بترجع عالملعب............. أو عالمسبح وما بتتعب
بيكون بدأ باب الحارة...................وبدأ بالسرئة صب سطح عمارة
والسهرة بتحلى أكتر وأكتر............................كل ما الوأت اتأخر
وبيصير وأت بنت اللزينا.....................وباجوائ� �ا المعتمة والحزينا
والله وهالمطعم ولح شففر اسمو....................حجمو كبير من كسمو
وصايرة كل الحفلات ............................عم تنعقد فيه وبالعشرات
وافطارات يومية.....شي خيرية ...وشي جمعية.... وشي حفلات شبابية

وبمناسبة شهر رمضان .......................الأسعار صارت شي جنان
والخضرة والفواكه غليت.................ومعدة الدرويش ماعادت شبعت
ويلي بيضحك..... انو يلي عم يغللي الأسعار.......ما بيضيع تراويحو ولا نهار

وحتى أصحاب الأيمة .................صابهم نصيب من هالأسعار الأليمة
السفير صار بميتين........بس حطولهم مغني.... وتحلاي شي لئمتين
وبتلائي الإعلانات مالها عدد............بمناسبة هالشهريلي اجا عالبلد
شي عامل فطوروا باربعمية وخمسين...وشي بتمانمية وخمسين...... وكللو لاطعام صائم مسكين
النهفة انو في اعلان.. ال.. بمناسبة رمضان... الشباب بميتين.... والبنات ......بالمجااااااااااااااااا ان

لح وأف حكي عن رمضان أحسن ما اندم............و بكرا الله يزتني بجهنم
ولح احكيلكم عن شوارعنا الجديدي..........وأحلامنا يلي بينكتب فيها أصيدي

لح مسح جوخ للبلدية................ وبالمرة لمحافظة حموصة العدية

من بعدما بلشو بالحفريات...................وشالوا الأشجار بالعشرات
حطولنا زفت جديد.....ونوروا الطرئات................ بأحلى عواميد
وللحأ التزفيت كان يخلص بسرعة.......... والشارع يصير اخر روعة
و الشوارع صارت أعرض..................... والأرصفة صارت اظبط
الظاهر الله هداهم وصاروا صحيانين.......من بعد ما كانواعم يخربوا بحموصة متل السكرانين
وابل ماخلص تمسيح الجوخ........لح احكيلكم حكاي
وأت الله بعت الخير على حموصة.....من بعدما كانت نشفاني...... والحالي صارت لوصة
نزل المطر ومشي الحال .......والناس شكرت ربا................... والو شي عال العال
بعد بشوي طافت الشوارع....والمجاري ماعادت تلحأ...............ومن معدتا المي تطالع
والأمر استفحل وصار خطير.....والمي دخلت للبيوت...............وصار بدها الحالة تدبير
والشي يلي كان واضح للعيان...انو هالطوفان.........صار بشوارع أديمة.....وجديدة كمان
والناس بلشت تهرب....وعالمي تلعن وتسب
والكهربا صارت تأطع....والوضع صارأفظع

ولما سألوها لبنت حموصة...ليش.........؟؟؟؟؟

التلهم.......الوضع ممتاز...والبلدية عملت اعجاز
وحياتكم السياء نضفناه.....ومن بطنو النشح طالعناه
والحأ ماعليي ولا على عمال التعزيل...الحأعلى هالمطر الرزيل
اجانا فجأة وما دأ الباب.......وكأنو السيائات حاسبتلو حساب
من سنين ما في مطر على حموصة هيك هطل....وسيائاتنا متعودي عالدلل
الحأ عليه هالأزعر.....خلانا نتعذب ونتعتر

وفورا تزكرت ابو الأحلام....ومشاريعو يلي بيشوفها بالمنام
وضليت صفنان ومحتار............... بمشاريع ابو الأحلام المغوار
كيف بدو يساوي للحماصني ....................ملاعب غولف
وعالمخابز متجمعلوا................................. فوء الألف
وكيف عم يفكرلنا بحي دبلوماسي.......اذاشوية مطر سوتلنا المأسي
ولك كيف الحماصني بدهم يتعربشو عالمترو..... وهني عالجواميئ ماعم يئدرو
بس اولت لحالي وانا صفنان.........خلوني استنا يمكن انا غلطان
وخلوني كون وانا صفنان .................شايف الكاس من نصو المليان
وغمضت عيوني ونمت........................وعلى صفني تاني انتألت
وبألبي حسرة عم تؤول.......يلي بيتعلم السباحة بالمجاري....... مستحيل البحر يطول

nawaret 3amou foued walah ou elek wahcha :D
la ou houmous namoudaj bnechtak ou bnendam b3dine

tahyati:D

الله يعطيك العافية
بس طويله شوي ....ما هيك؟؟

شكرا عالمجهود المبذول