قلت
على ضفاف جسر مشهور قال لي صديقي شوف نهر بردى
بسرعة قلت : عم شوف قهر بردى ... يومياً ...

شفت
فلم سخيف على الغلاف في بنت لابسة مايو أحمر و بكل الفلم في فكرة وحدة مهمة
" إنته لما بتولد بكونو كل الناس عم يضحكوا وإنته الوحيد بتبكي!!
إنته وقت بتموت الناس بيبكو و إنته الوحيد يللي بتضحك !!
فالفلم مهم ويللي بهمن موضوع المايو الأحمر يسألوني شو اسم الفلم

سمعت
بوجود قانون سير جديد بدو يطلع ..
وكان طالع على الإذاعة برنامج عن القانون ..
وطلع واحد عم بقول إنو أسعار المخالفات طلعت ..
و سمعت إنو الرشوات طالعة كمان ..
فطلع خلقي ...لأنو بالأساس طالع بلعي ...
قبل ما نطلع قانون جديد خلينا نعرف نطبق أي قانون جديد ..قديم .. منيح أو قبيح ..
نحنا الشعب و الشرطة يللي بخدمتنا
متنا و ما عرفنا نطبق قانون بأمتنا ..
فــ " طلعوا من راسي ... "

تعرفت
تعرفت من 3 سنين على ولد صغير عمرو ست سنين
بروح على المدرسة قبل الضهر
و ببيع مسكة بعد الضهر
سألتو ليش : قال من شان يشتري الدوا لأمو
بيومها عرفت شو يعني كلمة " رجال "

تغربت
من خمس سنين لما كان في قطار
طلعنا بالقطار عالزبداني
و فيك تقول طلعنا عالقطار بالزبداني " كلاهما صحيح "
الشب يللي بشوف البطاقات
شافني حامل كاميرا
و شكلي شوي غريب
فقلي بالعربي :إنته أجنبي مو
قلتلو لأ أنا سوري
فأكد هوة بكل ثقة: بس متغرب
قلتلو إي أنا صرلي متغرب 26 سنة جوات البلد .

دورت

أكيد إنته حابب تتعرف على نصك التاني
و إنتي كمان ..
و أنا دورت على نصي التاني ..
وكل الوقت بهالطرقات و الأسواق و الشوارع و الدوائر الرسمية وأي دوائر ممكن تفوت فيها
كل الشباب و الصبايا عم بدورو على نصن التاني ..
و بتلاقي هالعيون ما عم تهدى ...
حتى المتزوجين أحياناً ...
عم بدورو على نصهن التاني ..
وفجأة لقيتها ..
مو نصي التاني .. لقيت الفكرة ؟؟
حسام إنته حابب تتعرف على نصك التاني
طيب ما بدك تعرف مين إنته؟؟
قبل ما تتعرف على مين نصك التاني ...
حلوة ...

فصلت
أنا متأكد تماماً وضمن أي فاصل إعلاني " خمس دقايق إعلانية كاملة "
و على أي إذاعة و بأي وقت من أوقات السنة
أكيد في كل من الكلمات التالية
" واو – معقول – للمرة الأولى في سورية – بس إلك – السوء
– سيدتي – لحق حالك - بس عنا – جديد " ..
ففصلت حالي عن أي فاصل إعلاني
و صرت من يوميتها فاصل
معقول
واو
سيدتي
بس
أنا ... فصلت

بنت (طبعاً هي الفقرة بس عالوزن هية مو فعل )
تعرفت على بنت حلوة كتير " متل كل البنات "
ومعها مصاري كتير " متل نص البنات "
و عندها سيارة متل " ربع البنات "
و فهمانة " متل 10 بالمية من البنات "
بس عندها مشكلة وحدة ..
ما بتعرف تحب غير حالها ..
هيك لحالها كاملة مكملة ...
بس لحالها ... ورح تبقى ...

اشتريت
عندما دخلت لأشتري مجموعة من الأغراض يللي بشتريها شهرياً
انتبهت إنو الأسعار مو بس مرتفعة..
الأسعار مو بس طايرة ... الأسعار حلقت ..
فقررت إنو ما اشتري شي
عملياً اشتريت صحتي ...
و عافيتي ..

قريت
فكرة كتير ضحكتني كتبتها الزميلة علا ملص بصفحة كريزي من زمان
" أنا ما باخد غير شامي " و "الله بياخد الجميع "

كتبت
أنت موجود لكي تجعل العالم أفضل ؟
أن تجعل العالم أفضل يعني أن تجعل حياة شخص واحد "على الأقل" أفضل ؟

نكتت ..
حكيت نكتة لطبيب قام شو صار
قلي : بس مو منطقية
قلتلو : بس حلوة مو ...

جربت
جربت بطل دخان وبطلتو ..
إي ما خلصت القصة هون ...
لأنو رجعتلو ...
وقلت لحالي في كتير عادات خرج الواحد يبطلها ومنها الدخان
فتعلمت إنو لازم بطل إدمان قبل ما بطل دخان ...

أكلت
مقلب.

شربت
كمية كبيرة من القهوة وعلى الرغم من ذلك ..
نمت ...



صورت
////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////
ولد أجنبي لأنو كل الأجانب بصورا ولادنا..

حلوة يا رفيق, بس مين هوه حسام بدري؟ هيئتو حشاش من ديرتنا ,
دخلك وين بيحشش هاد؟
تعو نعزمو على شي جمعة تحشيشية !

حسام بدري شب صحفي سوري بيكتب بمجلة شبابلك كتير بحب صفحاته ورح نزل اليوم واحدة جديدي

حلو كتير ..
بس بالنسبة لـ سمعت .. انا اعترضت..
لانو في قانون عم يطبق بسوريا يكون يكون وحيد
بس عم يطبق .. قانون الجاذبية .. بس
تمهلت .. لانو حتى هالقانون ما بتخضعلو الاسعر

يسلمو معلم ..:D

عراسي اب سليمان

كتبت
مقالة مهمة جداً ( ما حدا بقول عن زيتو عكر ) بعنوان
" ليش نحنا بنكتب إذا ما حدا بيقرا "
قام شو صار؟!! ..
ما حدا قراها ؟؟

قلت
قالت لي بنت: "أنا ناطرة ورح ضل ناطرة فارس أحلامي "
فقلت: صدقيني أنا بعرف فارس أتاسي ..و فارس الحلو
وفارس كرم .. ويمكن فارس بدري..
بس فارس .. أحلامي ما سمعت بهالاسم قبل هلق
بيت أحلامي شوام ما ؟؟

سمعت
مثل شعبي بقول:"هم البنات للممات "
و انتبهت إنو هاد المثل بينقال دائماً بطريقة سلبية عن البنات
بالواقع لما تخيلت حالي بنت ببلد متل بلدنا
مو بس انهميت ... اكتأبت
حسيت حالي مراقب قصدي " مُراقبة " بكل زمان و بكل مكان
ساوت .. قامت .. قعدت ... راحت .. دفعت ..
متابعة مستمرة ومراقبة مستمرة ... و على أساس إنتي حرة ...
حركشة وتلطيش وتطبيق .. وحب عميق .. بكل لحظة ..
بكل لحظة في معجب أو حبّيب أو جيمس بوند " وفهمكن كفاية "..
حسيت عن جد بهم البنات ..
و للممات ...





تعلمت

من عشر سنين كان والدي عم بحاول يعلمني من تجربتي


يقلي: (( لعمش بقلبك.. الحمار بيقع بالجورة مرة وحدة ))


أنا عبر تجربتي تعلمت إنو بس الحمار بيقع بالجورة مرة وحدة ..


فاطمنوا يا جماعة ...


شفت
شفت مباراة كرة قدم فتمنيت لو إني روبرتو كارلوس ما نحنا التنين صلعان
شفت آخر حفلة موسيقية ل "ياني" فتمنيت كون عازف كمان
شفت مسلسل باب الحارة فتمنيت لو إني عايش من زمان
شفت برنامج وثائقي عن السعادين فتمنيت كون سعيد = سعدان
شفت فلم غاندي فتمنيت ..... كون إنسان
شفت وشي بالمراية الصبح قام نسيت كل شي شفتو
و حبيتني
شكراً إلك يالله..

حبيت
ومن النظرة الأولى..
كتير من البنات
و اكتشفت إنو أنا عم حب أفكاري عن هدول البنات
وما في شي إسمو حب من النظرة الأولى..
بالنتيجة .. أنا حبيت بنات أفكاري..

نكتت ..
حكيت نكتة لطبيب ..
بالحقيقة هوي أستاذ بكلية الطب..
قام شو صار..
قلي : بس مو منطقية
قلتلو : بس حلوة مو...

انتحرت
قررت الانتحار فرحت وربطت حالي بسكة القطار
بس القطار ما مرق..
ضليت شي أسبوع تقريباً بس القطار ما مرق ..
وهيك أجلت قراري لحتى يصير في عنا مترو ...
وعلى قولة المتل عيش يا ...

و متت ..
إي يا جماعة ..
أنا متل كل مواطن عربي سوري ..
عم موت بالنهار ميت موتة ...

صورت ..
- الطفل السعيد قصدي الطفل " الوحيد " السعيد يللي شفتو بحارتنا...