رح ابدأ بقصة و ارويها على لساني ( بس القصة مومعي صارت عرفتو كيف )


كنت في أول Class في معهد اللغة في أمريكا ..المهم .. دخل المدرس .. عرفنا على نفسه .. و شرح و عمل إللي عليه .. قاربت الحصة على الإنتهاء .. و طلب منا أن نسأله إذا كنا نحتاج للمزيد من الشرح .. جاء دوري لأسأل .. رفعت يدي .. و ( بترجمة حرفية لما نفعل في مدارسنا في الوطن ) قلت له : Teacher ..

نظر لي و قال .. Please, My name is Scot ..

أنا ( لأني شربت الخوف و الرعب من المدرسين المتغطرسين شرباً في مدارسنا و أنظمتنا التعليمية ) لم أستسغ فكرة أن أناديه بإسمه حافّاً جافّاً .. فقلت له مرة أخرى : Teacher !

بدت عليه علامات الإنزعاج .. فقال لي :
My name is Scot, Please call me Scot

فقلت له : Scot ؟؟؟؟
قلتها مستفهماً .. إن كان ذلك طبيعياً !
في تلك اللحظة .. شعرت بالذنب .. ناديته بإسمه !!!
يا لي من قليل أدب !
كيف تجرّات و وصلت بي الوقاحة ؟ مع الموقف المربك .. نسيت سؤالي .. و اعتذرت ..

تتكرر الحكاية مع كل مدرس جديد ..
من زود الأدب و الرعب و الخوف .. أقول Teacher مرة أخرى .. فتنزعج هي و ينزعج هو .. تشدّد على أن إسمها إيريكا .. و يشدد على أن إسمه پيتر .. و يريدون منا أن نناديهم بأسمائهم ..

ما أبسطهم .. لا يعترفون بالألقاب .. و لا يريدونها .. و لا يجرون ورائها .. هنيئاً لهم .. يعرفون أن العلم مجرّد من الألقاب .. هو فقط في الألباب .. و أما ( أستاذ ) و ( صاحب السعادة ) و ( دكتور ) و ( فنان ) ليست إلا مقدمات لا فائدة منها البتّة .. و الغربيون لا يضيعون من ( وقت التعليم ) في نطق هذا الهراء الغير مفيد ..

هذا كان مع الاساتذة اما الاهل :

يلي هنن اقرب الناس الك يلي بتشوفون كل يوم ليش لحتى ما تناديلون بأسمائهن

ليش الالقاب و التكلف

ليش لرفيقك بتناديلو بأسمو و لأبوك لأ ,, مع انو ابوك اقرب

قال يعني احترام

الالقاب ما بتصنع الاحترام

شو رأيكون يعني انتو مع او ضد مناداة الاهل بأسمائهم ؟؟؟؟؟

يعني انا معك ياصديقي وماني معك كيف هيك ماعم بعرف يعني شغله حلوه بس مش وارده وهون بييجي دور ليش؟؟؟؟؟؟؟؟


اول شي معك لان هالشي تحضر وبقرب الاشخاص من بضهم البعض وبيرفع الكلفه متل مابقولو



ضد هالشي انفا لما ذكرت يمكن عنا بيعتبروها قلة احترام او ادب ويمكن بيضل في شي اسمو الشرق وشي اسمو الغرب وفي عادات وتقاليد يعني والعادات عنا هون غير مثلا انا اذ بدي احكي مع دكتور بهالجامعه بدي واسطه فما بالك ناديلو عالدكتور باسمو ولي شو هالحكي والله بيضيع المسقبل تبعي والله

صوتت مع

اما بالنسبه للاهل فيمكن غير ممكن تنادي لابوك باسمو هاد بيجي حسب العلاقه مع الاهل وممكن كعاده عنا لان نحنا شرقيين كلمة ابي بابا بيي طبعا حسب العاده شائعه اكتر


مشكور عالموضوع وتحياتي الك

ليش لرفيقك بتناديلو بأسمو و لأبوك لأ ,, مع انو ابوك اقرب

قال يعني احترام

الالقاب ما بتصنع الاحترام

شو رأيكون يعني انتو مع او ضد مناداة الاهل بأسمائهم ؟؟؟؟؟

معقول انتي يا زلمة :?

تصور نادي لأبوي بأسمو :shock: هاد يلي تم ناقص

ممكن هيك بنكون عم نمزح مع بعض قلو والله يا أبو علاء ما زابطة شغلتك

اما انو ناديلو ب اسمو يحرق حريشك شو إبن دورتي :p


تخيل حالك اب بتقبل ابنك بدل ما يناديلك يا بابا يناديلك ب إسمك ؟

شكرا ع الموضوع ... بس يا استاذ ممكن قبل ما رد ع موضوعك اسألك سؤال ...؟؟؟
انت ليش مو داخل باسمك الحقيقي منشان اناديك باسمك...؟؟؟;)
اسم اللي دخلت فيه هو متل اللقب تماما...يعني باين انو ما بيهون عليك الناس ينادوك باسمك... صح و لا انا غلطانة ...؟؟؟ ;)
و ردي ع الموضوع هو لاء طبعا و مو معقول تنادي لابوك او امك باسمهم ...:shock: هاد اكيد رح يكون اسمو وقاحة... :x شو لتكون كنت عم تلعب معهم بالحارة ...؟؟؟:?

صديقي العزيز, لما بيشي الشخص اللي قدامك الكلفة بيناتكن ليسهل عليك الأمر هاد شي رائع وبيخفف عليك كثير, بس هاد مو صح ومو بكل الحالات, الروابط الاجتماعية والعائلية شئ مهم جذرياً لياتنا ولاستمرارنا, وحفاظاً عليها من التفكك والنسيان انوجد الإحترام كحارس, يعني بكلام ثاني لو إنت ناديت والدك باسمو وشلت الكلفة معو بكلشي (لأنو شي بيجر شي ) بيصير والدك بدون أي تأثير توجيهي عليك وهاد شي خطير, وخاصة إذا صار نفس الشي مع عمك وخالك وإمك وأخوك الكبير و الخ.... مشان هيك أنا بشوف إنو الأحترام هو صمام أمان العلاقات الاجتماعية المتينة, بالغرب بنشوف كثير في افلامن إنو في حالة تفكك اسري واجتماعي, يعني الشخص يادوب عندو كم صديق ع نطاق ضيق وبس, أما العيلة فمفهومها اسمي فقط, إذا كنت مخطئ صححولي يا شباب.

أنا بشغلي هون بيرفضوا نادين بلقب سير أو مستر بس أنا برفض وبحكي اللي بشوفو صح لأنو بحب إنو يكون الاحترام موجو دوماً بيني وبينهم.

إلك سلامي

انا ما بتصور حالي يعني اني نادي لامي ولا لابي باسمائهون يعني ما بتظبط منوب

يعني الاحترام للاهل بيفرض انو ما اناديلهم باسمائهون

ولما بتنرفع الكلفة بينعدم الاحترام

وما بظن انو الغرب لازم يكون مقياسنا وخصوصي انو الغرب بيتركو اهلون الكبار بمأوى العجزة

يعني خصوصي بهالقصة ما لازم نخلي الغرب قدوتنا لانو مو هنن الصح

انا هاد رايي ببساطة

سلامات :D

هلاء انو نحن ما تعودنا انو ننادي اهلنا بي اسمائهون هو نوع من الاحترام
وكلمة بابا او ماما يتشعر الطرفين بي اهميتون بالعائلة
انو صار اب او صارت ام

هلاء انو اوقات لما منكون عم نمزح مثلا الواحد بيصيح لا ابوه او لا امو او حتى لا ستو بي اسمها او ام فلان او ابو فلان
بس وقتا بيعرفو انو مزح
فا حلو الاحترام وعدم رفع الكلفة
بعدين كلون صيغ لا المناداه
ان كان بابا او ماما او تيتا او نادينا بس اسمائهون

بعدين انو نادي بي اسمائهون هي مو من عاداتنا
مافينا نسميا عادات وانما نوع من الاحترام
يعني تصور يفوت الاب ومحمل على بيتو بيركدو ولادوا عليه
الله يرزقك يابا ووو الخ من هالحكي الي بيخلي الاب ينسى تعب هالنهار
بقا تصور نقلو مثلا الله يرزق يا احمد
اي ما بيحس بشي

فا هي نناديون بس اسمائهون هي افكار غربية انا ما بأيدها
والي بيثبت كلامي القصة الي حكيتا


طولت عليكون :lol:

شكرا لطرحك

بحب دكتوري كتير بالجامعة
راح يزعل إذا شاف ردي هلأ
لأني كتبت "دكتوري"
بيزعل كتير إذا حدا ناداه دكتور او استاذ او اي لقب تاني
نادوني باسمي لو سمحتوا
عبد الرحيم
وانا بحترم هذا الشي وبناديه باسمه
مع انه دكتور بس هو متواضع لدرجة بيحكي معنا متل ما بيحكي مع اصدقاءه
وبعاملنا بطريقة كتير سلسة ورائعة
ومع هيك نحنا كتير بنحترمه وبنقدره وبحياتنا ما قللنا من احترامه ولو شعرة لانو الحب هو الاساس
يعني نحنا اذا حبينا حدا لو شو ما كان بنضل نحترمه عن حب مو عن واجب وعادات وتقاليد
وهيك الوضع مع الاهل
بس انا حابة قول انه كلمة يامو ما بيعادلها أي اسم
يعني انا بقولها لامي لانه بحب الكلمة بتغنى فيها موسيقى على قلبي

يعني الله لا يحرم حدا سماع هل الكلمة او قولها
وهيك بالنسبة لأبي كمان

يعني الإنسان اللي عنده أخلاق ومربى بضل عنده احترام للأشخاص اللي قدامه مهما كانوا متواضعين
وحابين يكونوا على طبيعتن

بس يكون بعلمك هاد الأمر موجود بس مانو مرغوب بأرقى الدول والمجتمعات بالعالم
مانو مرغوب من الأهل اطلاقا ويعتبر ضرب من الوقاحة ولكنه موجود فعلا
أما من ناحية غير الأهل فممكن يتم تقبله ولو كان الفارق العمري كبير أحيانا...

انا ما احب التعميم و المقارنات بين المجتمعات لان ممكن نشوف ناس بمجتمعاتنا تقبل شي معين بينما نشوف ناس ترفض نفس الامر في الغرب...


ابي او بابا او ماما .. الخ هي مو مجرد لقب زايد هو تقدير و هو احترام لمكانة الاب و الام ...

مناداة الاهل باسماءهم من قبل الاطفال و المراهقين ... ضروري جدا حتى يحترم سلطة الاهل .. و هي اكثر اهمية مما تتصور

و هذا الحكي الو صدى بالغرب .. اكثر من الشرق !



و لكن يبقى باب الموانة و التعايش موجود ... بس حلو انو الواحد يظل محافظ على الشي اللي تربى عليه ...


انا ما اشوف مشكلة كبرى اذا ناديت اهلك حتى لو اكثر من مرة باسمهم الاول (احكي عن اللي صاروا فوق العشرين سنة) ..

بس حلو الاستمرار بشي تربينا عليه مع اللي ربونا و تعبوا علينا


و هذا الفرق بين الاهل و الصديق ...

مع وبشدة .. لاني بلاقي من الاحترام لامي وابي اني ناديهم باسمه ما باسم ابنهم البكر .. او لقب بابا اوماما ... اكيد هيدون كلمتين بعبروا عن حالة اجتماعية ووجدانية ايضا بس كمان بلاقي اني امحي الاسم الاول الهون في نوع من التقليل لارتباطون باسمهون .....
ما بعرف شو العلاقة ما بين احترام الوالدين ومناداتون بالاسم .. لانو الاحترام هوي تعامل محترم بينك وبينهم من دون تدخل خارجي ... بس اكيد موافقة الاهل ع هيك امر بلاقيها اساسية

شكرا ع الموضوع ... بس يا استاذ ممكن قبل ما رد ع موضوعك اسألك سؤال ...؟؟؟
انت ليش مو داخل باسمك الحقيقي منشان اناديك باسمك...؟؟؟;)
اسم اللي دخلت فيه هو متل اللقب تماما...يعني باين انو ما بيهون عليك الناس ينادوك باسمك... صح و لا انا غلطانة ...؟؟؟ ;)
و ردي ع الموضوع هو لاء طبعا و مو معقول تنادي لابوك او امك باسمهم ...:shock: هاد اكيد رح يكون اسمو وقاحة... :x شو لتكون كنت عم تلعب معهم بالحارة ...؟؟؟:?
لأنو هون في كتير عالم منهن يلي ما بدي يعرفو اسمي

بس شو دخل هي بهي ؟؟

أنا أهلي عادي كول و خوش بوش امّي احيانا بدلعها و بناديلها باسم الدلع :lol: و هي بتتقبّل القصه عادي و لكن هالشي وقت المزح و الوالد ايضا متل ما قال علاء ممكن بالمزح نقلو يا ابو فلان و هيك و لكن وقع كلمه ماما و بابا على النفس وقع مطمئن .. كلمه ماما و بابا اسهل للطفل تعلمها و استخدامها وقت بكون عم يتعلّم حكيه و بيكبر و بتضل هالكلمات مستخدمه بعدي مع الوقت حتّى لو صار فيه ينادي اهله باسماءهم فبضل لوقع كلمات ماما و بابا وقع خاص و آمن و جميل جدّا ..

أنا أهلي عادي كول و خوش بوش امّي احيانا بدلعها و بناديلها باسم الدلع :lol: و هي بتتقبّل القصه عادي و لكن هالشي وقت المزح و الوالد ايضا متل ما قال علاء ممكن بالمزح نقلو يا ابو فلان و هيك و لكن وقع كلمه ماما و بابا على النفس وقع مطمئن .. كلمه ماما و بابا اسهل للطفل تعلمها و استخدامها وقت بكون عم يتعلّم حكيه و بيكبر و بتضل هالكلمات مستخدمه بعدي مع الوقت حتّى لو صار فيه ينادي اهله باسماءهم فبضل لوقع كلمات ماما و بابا وقع خاص و آمن و جميل جدّا ..

الفهمان بيريح :larg:

لا ما دخل هي بهي بس ليش مو رادد ع حدا غيري ...؟؟؟;)

و لكن يبقى باب الموانة و التعايش موجود ... بس حلو انو الواحد يظل محافظ على الشي اللي تربى عليه ...

بو سارة .. :D

انو اي اي .. انا بقلو بابا وماما وهيك .. بس أنو كتييييييييييير اوقات بكون .. عم قفّل وهيك نمزح .. بناديه باسمو .. او باسم امي .. وحتى بالدلع .. انو ما فيا شي ..

وقت بتكون علاقتك مع ابوك مانا علاقة رسمية .. ومانا علاقة كتير بعيدة وقراب من بعض .. بتكون .. بتقدر تحكي وانت مرتاح ..

يا سيدي هلأ انا مع كلام ابو جوزيف يعني ممكن وانت بتمازح ابوك او امك تناديهم باسمائهم .. بس انو انت بتحسها شوي صعبة لما تناديه باسمو... ما تقلي صعبة ما في مجال .... :pos:

يعني لاساتزتي في قسم بقلي ناديلي باسمي وفي قسم بقلي شو خدمنا عسكرية سوا بتقوليلي استاز فاهمي :cry:
بعشان اهلي يعني مرات بناديلهن باسمهن يعني عن مزح
بس انو ما بتصور انو بناديلهن باسمائهن عشان الاحترام يعني هني بحبو انو تقولهن امي او ابي يعني ما بعرف ليش بتلاقي بالافلام كمان لما وحدة تضيع ابنها وانو بعدين بلتقو بس يقلها ماما بتبكي وهيك يعني اما بشكل عام مع انو ليش لا :p

انا ما بسترجي نادي ابي باسمو ولو عملتها بروح فيها ...........بس امي دايما بناديها مريومة او ياعجووووووووووووووووز

انا ما بسترجي نادي ابي باسمو ولو عملتها بروح فيها ...........بس امي دايما بناديها مريومة او ياعجووووووووووووووووز


عجووووووووووووووووز :o

شو هاد الحكي ؟؟؟

يعني مافي كلمة الطف من هيك؟؟؟؟؟

والله لو انت ابني بتبرا منك وبطلقك بالتلات ال عجوز ال :cry:

ايه بس برجع بقللا مريومة بتنبسط

برأيي ما بيصير الواحد ينادي أهلو بأسماءون ومو كل عادات الغرب بتظبط عنا الاحترام قبل كل شي

تقبلوا مروري
أخوكم ابوعمار

يازلمة ماتجي تشوف شو بصيح لامي وابوي انا بالبيت .. لتبرزق بوشي :lol:

أكيد ضد ,,

بالنسبة للأهل الالقاب بتصنع الاحترام ,, يعني اذا بنادي لأبي بأسمو اكيد بكون عم قلل من احترامو

متل ما قالو شو ابن دورتي هو ,, بضل لحتى ما الواحد يموت هو ابن وهداك أب ..

بس بالنسبة انو بين التحضر والوقاحة .. انو كيف هي , ما فهمتها ,,
ليش مين قلك انو بالبلاد المتحضرة بنادو لأهلون بأساميهون ؟؟
هلأ يمكن يكون في نسبة قليلة ,,
بس بالعائلات الطبيعية يعني يلي ما فيها مشاكل ومو متفككة بنادولهون بابا وماما

مافيها مشكلة شي حلو بدلع امي وبناديلا باسمها
تعالي يابنت يا سكينة روحي يا بنت يا سكيينة

بس الوالد صعبة شوي مدري ليش مع انه هو حباب وطيوب بس صعبة غير قله يا ابتاه:pos:

ضد.. لانو الالقاب تعبر عن الاحترام...
و لما انا بنادي امي و ابي بالالقاب انا عم بحترمون..
هنن مو رفقاتي بالصف لحتى ايجي انا و ناديلون باسمائهن..

و بالعكس.. انا ما بعتبرها تحضر ابدا.. لانو انا بعتبر لما بكون في احترام من قبل الابن للاهل هو هاد التحضر
بعينو.. مو التحضر لما بيجي انا و بنادي ابي او امي باسمائهن..

اما متل ما قال كتيرين هون.. عن طريق المزح ممكن.. يعني مثلا لما بنادي لابي يا اب سمرة..
ما فيها شي.. لانو مزح .. و ممكن تقبل هل الشي عادي..

اكيد الك ...:p;):pos:هلأ انت من كل عقلك عم تحكي...؟ يعني بامريكا بينادو لاهلهم باسمهم ...؟؟؟:shock::?
طبعا لا .. بنادولهم mom و dad ..

طبعا لا .. بنادولهم mom و dad ..

هاد اكيد...و لازم...:D

انو شو رأيكن نغير اسم الموضوع ل(موضوع للسبام وحل الخناقات بين البشر والمنائرة):x

رجاء التزمو بالموضوع وبلا سبام ما الو داعي

في مسنجر ورساءل خاصة بتصفو فيها خلافاتكن..ازا تكرر هالشي راح نضطر نخالف
:D

مشكورة جدا
و أ،ا رحت بالعجقة كمان :p
بسيطة
تحية:D

والله ياجماعة المسألة مابتحتاج لكلمة وقاحة أو تحضر أو مع ولا ضد كل مافي الأمر حسب الاحساس

بالفكرة أو باسلوب التعامل هناك من يتقبل هذا الاسلوب وهناك من مازال يتحلى بمبدأ الواجب

واجب الاحترام .. الحياة المجردة من الألقاب تكون حياة سهلة بسيطة فيها " تكافؤ "

يعني الفرق بين الدكتور والذبال ربما فرق باللقب الدكتور لأنو درس صار لقبو دكتور

لكن ربما الزبال البسيط أفهم منه بكثير من كثرة ماعجنته الحياة .. هذا انسان وهذا انسان

وانا لا أحب الألقاب .

أما الأهل اسمحو لي كلمة بابا أو ماما ليست موجودة في قاموسي في بيتي الذي هو ابي صديقي

يحب مناداته باسمه لأنه لايريد أن يشعر بهذه الكلمة من باب المسؤولية ويريد دائما أن يكون شابا

وهو كذلك في نظري .. لذلك أنا مرتاحة وآخدة راحتي ..

وماما لم أقلها ابداً .................................................. ........................ .

انا برأيي عادي لو الواحد نادى امه او ابوه باسمو بس انو مش طول الوقت , انا مثلا لما بحب ادلع عليهم
و هادا الشي كمان بيرجع اذا الاهل بتقبلوا هادا الشي او لا
و انو قصة احترام او هيك ف بيرجع للظرف و الطريقة اللي بينادي فيها و هكذا يعني
و الله يخليلي ماما و بابا
ويخليلكم اهاليكم جميعا
و شكرا على طرح الموضوع
:D

هوي من جهة اني نادي استاز باسمو اي مافي مانع بس بئلو مثلا استاز فلان
يعني لازم يكون قبلا استاز او استازة او مدام ...الخ
مو منشان شي بس من باب الاحترام ...

اصلا انا مافيني نادي لاستاز يدرسني باسمي ما بتطلع معي فمابالك اني عيط لاهلي باسماءن مابقدر
مافي احلى انو الواحد ينادي بيو papa وامو mama
احساس حلو
بعدين نحنا مارح نقبل ولادنا يعيطولنا باسماءنا فما بالك انا بعيط لاهلي باسماءن ابدا مو زابطة

هلا مع جدا مع...مع انو الواحد تكون علاقتو مع اهلو حلوة وفيا اريحية...هلا انا شخصيا....بعيط للماما باسمها احيان.. انو حسب شو بيبطلع معي بابا.. لا مابعيطلو الا انو ازا كتير كتير اخدة وج ومنجلئة منقللو ابو ريتا:p

بس حلو التعامل باريحية مع الاهل بشرط يضل الاحترام موجود:D

I'm Fully Agree With You Man:D

حسب قناعة كل شخص

اذا الواحد بيعتبر انو الاحترام بيكون بالالقاب فهالشي بيخصو وحدو

مع اني بشوف انو الالقاب مالها علاقة

لما منكون عم نمزح انا وامي بناديلها بالمزح ام السوس أو باسما
بحسا انو هيك اقرب واحى وبتعطي جو حلو
ابي ما جرب نايلوا هيك
بس بحس انو القصة حسب الطريقة
يعني بالجد لازم ناديلوا بابا وماما

بعتبرو وقاحة وخارج حدود الادب

هلأ انا ضد مش لانو وقاحة اني نادي امي و ابي باسمائهم
او مش انو عم بحترمهم لما ناديهم بابا وماما
بس لانو هالكلمتين بتحسس الواحد بالامان
بتحسس الواحد انو هدول الشخصين هنن يلي بيحموك يلي مستعدين يضحو بعمرون مشانك
يعني انا لما نادي امي ماما .. بحس شغلات كتير .. الحب و الحنان و كلشي .. بس لما ناديلا باسما .. هيك بحس اني عم همشا .. او عم همش دورا كأم .. بعدين هيك انا يمكن اجرحا و اجرخ كرامتا
الام بتحب تسمع كلمة ماما والاب متل الشي بحب يسمع كلمة بابا
فهل هالشي صعب علينا لنعملو لحتى نتناقش فيه
يعني مناداتنا الهم بهالالقاب يمكن تعتبر جزء بسيط من رد جمائلهم علينا :D

في كلمة ماما عوالم اخرى

وفي بابا جرئة ومحبة

ماما وبابا اقولهم لأني احتاج ذلك وليس لفكرة الاحترام

من وجهة نظري من المؤسف ان نحرم انفسنا من تلك الكلمات الا اذا شعرنا ان الاسماء العادية توفي

مشاعرنا ومحبتنا

الميتم يخبركم معنى كلمة ماما وبابا

اي وقاحة لما بتنادي امك او ابوك باسماؤون هني اصلا ما صدقوا ايمت يصير عندون ولد ولا بنت ويسمعوا منون كلمة ماما ام بابا كانوا عم يستنوها لهلكلمي بفارغ الصبر حتى يجي هالولد او البنت ويحرموهم من هالكلمة وبعدين بصير قلة احترام بيناتهم لما ببطل يقول ماما او بابا وبيتجاوز حدودو مع الأيام بشي مسبة او اي شي تاني
حتى مع العم او الخال او العمة او الخالة حتى الاستاذ حتى يمكن مع الأيام ينسوا شو بكنوا لهم
هلأ صار الأجانب هني القدوة الحسنة والي بيفهموا بيقدروا الشخص هني يا حبيباتي ما بيعرفوا شو معناتها كلمة الاحترام هني ما بيشوفوا امهم وابوهم غير مرة بالسنة امشان هيك بنادوا امهم وابوهم بأسمائهم بيعتبروهم متل اي شخص ماشي بالشارع واحد غريب
شكرا على الموضوع ....بستغرب من الناس الي بتقلد الغرب بشكل أعمى

بظن انا ما تزوجت وجبت ولد وربيتو مشان اخر الشي يقلي ياسين :pos:

هيدا شي بيعكس عدم احترام بس بالنهاية بيرجع للتعويد واصول التربية