فكرة جديدة خطرت ببالي ورح ننفذها هون
رجااااااااااااااااااااااا ء بلا ردود غير الشخص المطلوب منه
رح اطرح مجموعة اسئلة على 5 اعضاء متتاليين وبعدون نجمع الاجابات ونحللها
رح ابدى مع فسحة أمل

السؤال الأول:

فسحة امل كم عمرك

تاريخ ميلادك

هوايتك الاولى

عمري 22 سنة
13 | 1|1986
هوايتي الأولى الكتابة

هل انت عضو في منظمة ايا كانت هذه المنظمة ؟

لا ماني عضو بأي منظمة مع انو كنت كتير بتمنى أنو انضم للكشافة بس وقتي ما بيسمحلي

ما هو جالب الحظ لديك

ما هو المكان المفضل لديك؟

ما بأمن بهل الشي أنو في شي بجيب الحظ بس رقم الحظ عندي 13
أما بالنسبة للمكان المفضل عندي في كتير أماكن مفضلة بس أكتر شي الجبل وخصوصي منطقة صلنفة

ماهو البرنامج المفضل لديك
سياسي ثقافي رياضي تلفزيون الواقع .................................

اعط تفصيل عن يوم حياتك (نظام حياتك)

بالنسبة للبرامج بفضل البرامج السياسية الاجتماعية .
أما بالنسبة للتفاصيل حالياً :
بفيق من الصبح بكير يعني الساعة سبعة بحضر حالي لروح على المدرسة عندي دوام للساعة 11 بخلص بنزل على الجامعة بشوف اذا في مسابقات للخريجين برجع على البيت بحضر دروس اليوم الي بعدو بعدين بنزل على النت يا أما بطلع شي مشوار , وفي عندي ساعة المسا قبل ما نام يا بكتب شي يا بقرا هي نظام حياتي حالياً

هل عشت قصة فريدة اثرت بك وقلبت مجرى حياتك او سمعت بها ؟
وهل انت مستعد للافصاح عنها
ان كان الجواب نعم
اخبرنا

بدك تحدد بالضبط شو قصدك بالقصة الفريدة
بس لح ريحك وقلك أنو ما في غير شغلة وحدة اثرت فيني وبحياتي وقلبت نمط حياتي فوقاني تحتاني الي هيي وفاة اخوي , كانت مرحلة مفصلية بحياتي , غيرت عندي كتير مفاهيم , وخصوصي أنو أخي الوحيد .

غيرت حياتك للافضل ام للاسوأ؟

غيرت حياتك للافضل ام للاسوأ؟
بعتبر انو التغيير الي صار للأحسن , لن حسيت هالشي اجاني متل الكف فيقني على كتير امور , نقلني من مرحلة لمرحلة بعتبرها أحسن بكتير أحياناً الأمور السلبية بتولد إيجابيات .

كيف لك أن تحدد سلوكك؟
هل تؤمن بالخرفات؟
هل تملك روح المغاموة؟

بحدد سلوكي دائماً بناءً على الموقف الي بواجهو.
بالنسبة للخرافات ما بأمن فيها
لا ما كتير بحب المغامرة بحب الاشيا الي نتائجها محسوبة , يعني بفكر بالشي ألف مرة قبل ما أعملو

ما هي اكبر عيوبك؟
هل لديك مخاوف-فوبيا؟
ما هو التشنج اللاإرادي (تيك) أو العادات
اليومية لديك؟

أكبر عيوبي أني فوضوي نوعا ما وهل الشي بيزعجني
هلا بالنسبة للفوبيا على الرغم من اني بحب المناطق الجبلية كتير بس عندي فوبيا من المناطق المرتفعة يعني ما بتخيل حالي بتل فريك أو بطيارة
التشنج اللا ارادي هو اني بحط قلم بين أصابعي وبحركو بالترتيب بيناتن ما بعرف اذا هاد قصدك

فسحة أمل ... وصلت عندي !!


ما هو اكثر حدث إيجابي او سلبي أثر بك؟

ما اكثر ما تكره في العالم؟

أي جيت لعندك:pos:
بالنسبة للحدث الايجابي فهوي يا سيدي لح أحكيلك القصة أنو أنا كان وزني 160 كيلو (( خمسة وخميسة من العين )) وقدرت نزل وزني لل 80 كيلو يعني قدرت وازن بين وزني وطولي وقدرت حافظ على وزني الجديد لهلا وهاد كان شي كتير ايجابي بحياتي ومن أعظم الانجازات الي عملتها أما للموضوع السلبي احكيت فيه
بكره بالعالم التطفل وعدم احترام الحرية الشخصية

طفولتك ..

احكي لنا عن بطل الطفولة ؟؟

احكي لنا عن حلم حياتك من كنت طفل .. الشغلة اللي كنت تتمنى تشتغلها

ما هو احلى موقف مع والدك و مع والدتك من كنت طفل ؟!

قلتلي طفولتي أي ليش لأ :larg:
هلا بطل ما كان عندي بس كنت حب سنفور غضبان وشرشبيل وبسيط وسريعة, وكعبول وعبقرينو .
كنت أحلم أنو صير عالم كيميا.
أحلى موقف بتذكرو ومعلق بذاكرتي لما سافرنا أنا وأبي وأمي وأخواتي على لبنان , عشت معن أحلى لحظات وحسيت بمعنى العيلة عنجد .

بشر سؤالين خفاف نضاف

أولا : شو شعورك و انت عما تتحمم ؟


ثانياً : شو لون جرابتك, و شو شعورك لما ما بتلبس جرابات هل بتحس بالحرية أم لا ؟

حاسس حالي عند دكتور نفسي :larg:

اثناء المراهقة ..


كنت مفعم بروح التمرد او روح التكيف ؟؟
حاولت مرة تهرب من البيت ؟؟

كان ببالك شعور تغيير العالم ؟ و تغيير عائلتك تحديدا ؟


حبيت او اعجبت ببنت اثناء ما كنت مراهق ؟

بشر سؤالين خفاف نضاف

أولا : شو شعورك و انت عما تتحمم ؟


ثانياً : شو لون جرابتك, و شو شعورك لما ما بتلبس جرابات هل بتحس بالحرية أم لا ؟
:? هلا بقلك على المسنجر :zen:

اثناء المراهقة ..


كنت مفعم بروح التمرد او روح التكيف ؟؟
حاولت مرة تهرب من البيت ؟؟

كان ببالك شعور تغيير العالم ؟ و تغيير عائلتك تحديدا ؟


حبيت او اعجبت ببنت اثناء ما كنت مراهق ؟
كنت متمرد بس ما بطريقة بتعمل مشاكل يعني الشي الي كنت اعتبرو حقي كنت أتمسك فيه ودافع عنو لو مهما كلف
لا ما حاولت أهرب من البيت بس بموقف صار معي فكرت بالموضوع
أي كان ببالي رغبة بتغيير العالم بس اكتشفت بعدين أنو الأهم من أني غير العالم أنو العالم ما يغيرني
أي حبيت بنت لما كنت مراهق (( الله يستر ))

اي سيدي ..

قبل ما ننتقل اريد تحكيلي عن تلك الفترة .

شلون كنت متمرد ؟؟ و شلون كنت تحدد هذا الشي حقك و هذا مو حقك


يعني شلون كنت تتعامل مع قرارات اهلك ؟؟


احكيلنا شلون وصلت لفكرة انو العالم ما يصير يغيرك !


و هلم جرا !

اختصر الله او فكرة الألوهة بكم سطر ؟؟

اي سيدي ..

قبل ما ننتقل اريد تحكيلي عن تلك الفترة .

شلون كنت متمرد ؟؟ و شلون كنت تحدد هذا الشي حقك و هذا مو حقك


يعني شلون كنت تتعامل مع قرارات اهلك ؟؟


احكيلنا شلون وصلت لفكرة انو العالم ما يصير يغيرك !


و هلم جرا !
يعني التمرد بالنسبة لألي مو بهدف التمرد بس أنو موبهدف اثبات الشخصية , كنت أتمرد على حرماني من شي أنا بعتبرو حق الي .
وكنت حدد إذا هالشي حقي ولا لأ لما كنت أقعد فكر بالموضوع وما شوف فيه أي جانب سلبي أو أي شي خطأ , بس ما فيني قيس تفكيري هلا بتفكيري بهيك الايام يعني ممكن قضية كنت شوفها أنو ما فيها أخطاء بهداك العمر هلا شوفها فيها خطأ ما.
أما بالنسبة لقرارات أهلي فكنت بالاخير أحترمها بالمجمل ولو على مضض وكنت شوف أغلبها تطفل على حرييتي بس من هالناحية بالتحديد بظن أني كتير محظوظ بأهلي لأن تركولي مجال كبير من الحرية ما بعرف اذا كان بوقتها بيتناسب مع عمري بس أكيد أنو كان شي ايجابي
وصلت لفكرة أنو العالم ما يغيرني لما شفت أنو العالم قاسي وبدو يكمل دورتو الطبيعية فيني يا أما بلايي وأني مارح أقدر غيير شي يعني مارح أقدر خلي العالم مثالي متل ما أنا بشوفو لهيك شفت أنو الانجاز الكبير الي فيني أعملو أنو ما خلي هالعالم يغيرني

اختصر الله او فكرة الألوهة بكم سطر ؟؟
هلا بالنسبة لهاد الموضوع بالذات ما فيني اختصرو بكم سطر .
الله بمفهومي هوي كلشي خير وجميل بهل الدني عدا هيك ما عندي قناعة بأي عقيدة دينية
الالوهية وجدت من زمن سحيق قبل الاديان السماوية وقبل مرحلة التوحيد بلشت مع بداية التفكير الواعي للانسان لحتى يفسر ظواهر ما بيقدر يتحكم فيها وما بيقدر يوجدلها تفسير منطقي وأنا بظن أنو الموت أحد أعقد هي الظواهر الي حيرت الانسان وفكرة الألوهية لأشباع نزعة روحية عند الانسان

نكمل بالحديث عن المراهقة ...

تعتقد شعورك تجاه االلي حبيتها .. شعور حب او شعور اعجاب ؟؟

كان عندك استعداد تواجه اهلك و اهلها .. في سبيل تشوفها ؟؟


حبيت غيرها بالمراهقة ؟؟

لا شعور حب مو مجرد اعجاب لأنو كنت انسان عاطفي زيادة عن اللزوم وكانت فكرة الحب بالنسبة لألي هيك شي خيالي عالم تاني كنت أعتبرو لازم يكون كامل.
أما بالنسبة لأهلي وخصوصي أبي فهوي ديموقراطي وما متعصب بهل المسائل وبغيرها وأنا هي النقطة بقدسها فيه وبقدسو من وراها لهيك ما كان في مشكلة بالنسبة لأهلي, أما بالنسبة لأهلها ياما أكل مسبات وحجار وعصي من وراهن .
أما بالنسبة لتالت شي ليش مستقصدني أنت لا ما حبيت غيرها بس يمكن كان عندي اعجاب بغيرها(( كمان الله يستر ))

عدنا ...

اي تشريع او نظام حكم تعتقد وصل للمثالية .... او حاول يصل و نجح نسبيا ؟؟



و انت وين تشوف حالك .... يميني او يساري ؟؟


يتبع

ولا تشريع من التشريعات الموجودة وصل للمثالية , على الاقل من حيث التطبيق
بس النظام العلماني هوي الاقرب للمثالية برأيي
أما بالنسبة الي فانا ميولي يسارية

بناء على طلب الجهات المختصة لح اتوسع بالرد على السؤال الماضي
النظام المثالي لازم يكون مبني على أسس المجتمع المدني , مبني على القانون وعلى الديموقراطية والحرية بكافة اشكالها , وعلى الفصل بين السلطات .
يعني أي نظام بكون التمثيل فيه ما معتمد على انتخابات حرة ديموقراطية بعبر الفرد فيها عن خياراتو بدون ضغوط وبدون قمع وارهاب فكري وسياسي ما بكون نظام مثالي وما بعبر عن المجتمع الي بيتطبق فيه هاد النظام , أي نظام بكون فيه قمع للحريات بكافة أشكالها سواء سياسية أو فكرية أو أجتماعية ما بكون نظام مثالي
أي نظام ما بيضمن للافراد حقوقن الكاملة وبيطبق القانون على الكل بدون تفريق بعيد عن الضغوطات واختلاف المعايير حسب المكانة الاجتماعية السلطوية ما بكون نظام مثالي