باختصار ..

ليش هالنزعة ..

ليش كل واحد بيشوف حالو .. او جماعتو ..

انبل من في الدنيا .. واشرف بني البشر ..

ليش انا كتير منيح .. بس الانسان اللي ما بحبو ..

بيقرّف ..

مع انو ما ضروري كون ما بحبو .. بيجوز ما بحب سياسيات بلدو ..

او ما بحب اي شي فيه ..

المشكلة انو .. كل واحد مننا ما بيشوف اغلاطو ..
او بيشوفا وبيطنشا ..
او ما بعرف
طبعا هادا الحكي منّي وجر ..
ليش ؟!

حدا بيعرف ..

حدا بيعرف ليش السورية بيحكو عالاردنية والسعودية ..
والسعودية بيحكو عالسورية واللبنانية ..

لك حتى الحماصنة بيحكو عالحموية ..
والحموية بيحكو عالحماصنة ..
واهل الدير بيحكو على اهل الرقة ..

وكل العالم بتحكي على بعضا ..

انو ليش ؟!!

la2ano l ensan 5ele2 la ye7ke o l nas ma bta3ref te23od mn doun ma te7ke 3ala 7ada mn l nas l tanyeen..

kel wa7ed befaker 7alo houwe l kel bl kel w houwe aslan doun mostawa sakafe 3l a2al!!!!!!

heye heik 7ayat l nas halla2 bhayda l zaman....
fa ma lazem nesta8reb bs nshouf l nas 3m te7ke 3a 7alha kaman..
msh b3id eno wa7ed yshouf 7alo 3l mraye o y2oul "yey meen had alla y5alena b mostawana "
ka2ano houwe yaba malek zamano:p
hahahaha

لا أحد يرى نفسهُ قبيحاً

تـُرى هل يوجدُ مرآة للأرواح ؟



أرواحُنا عَفِنة ,.

هي العبارة مو الك هي العبارة للشهيد
وبعدين حلو تلاقي حالك منيح عن حق وحقيق لان لو لقيت حالك منيح جديا رح تلاقي الكل مناح
اما اذا بدك تنافق على حالك وتعتبر حالك احسن من غيرك فهاد ما بينفي حقيقة انك مانك احسن من حدا

هلا انو ليش العالم بتحكي على بعضها هي شي مو بالايد
انت تخيل يمر نهار وما تحكي فيه على حدا هادا شي بطبيعة الانسان
وانو الواحد ما بيعترف باغلاطو لانو ما حدا بقول عن زيتو عكر ;)
بس حلو الواحد يشوف حالو منيح بس ما ينفش بحالو كتير لانو ازا ما شاف حالو منيح حيتحطم وتكون نفسيتو زفت وحيشوف حالو انو ما بيسوى شي

يعني هي النقطة الوحيدة اللي فينا نبسط عليا
واللي هية انه النقطة السودا اللي كاتبا فوق ليست اختراع عربي او ليست حكر على العرب :lol:

خيو التجمعات اللي حكيت عليا بمجرد ما انها تكون مؤلفة من بشر بدك تشوف عندا هلنقطة

يعني الاختراع تبع نحن الافضل نحن الاصح نحن الاعدل نحن الاشرف والانبل هاد بيمشي على كافة التجمعات

مشي معي .. من الدينية للطائفية للاحزاب السياسية للعلاقات الدولية للنوادي الرياضية للمدارس والكوادر التدريسية للفرن والخباز للحام للسمكري :lol:

لأن بالاخير النزعة هي مانها نزعة بعاني منها تجمع بقد ما هية نزعة فردية ظهرت بكل تجمع .

باختصار شديد ماحد بيقول عن زيتو عكر وهاي الشغلة موجودة بالفطرة هيك الله خلقنا لحتى كل واحد يشوف حالو انو احسن من عليها

انا ما عندي .. مشكلة ..

.. ما حدا يقول عن زيتو عكر ..

بس ليش الكل بيقول عن زيت غيرو انو عكر مثلا؟

القرد بعين امو غزال ....
ونحنا مو شاطرين غير نشوف النص الفاضي من الكاسة وبس ......
بيقولو الله خلق العرب وندم ليش خلقون بس احيانا الواحد بيتاكد من هالشي ......

بيقولو الله خلق العرب وندم ليش خلقون بس احيانا الواحد بيتاكد من هالشي ......[/quote]



بس هي الخصلة مرتبطة بالنفس البشرية شو ما كان بلدا أو جنسيتها و أبداً مانا حكر عالعرب ..
بس نحنا العرب هيك مستصغرين حالنا لدرجة انو منعتبر كل الناس خلق و عالم و نحنا لأ .. و يمكن مشان هيك ما عم نتقدم ...

شكراً عالموضوع :D

يا خي نحنا العرب عم ننظر لموروثنا من العادات والتقاليد حتى لو كنا ماعمبنطبقها المهم ان انا جدي فلان وابي فلان وعمي فلان وما بننظر لحالنا ان نحنا اظرط البشر لأن نحنا ببساطة ما عم نتجدد مع العصر وما بننظر حولنا لنلمس وندرك ونجرب ونفهم ولا نقراء افكار العدو الا لإنتقادها ورأينا دائما هو الأمثل والأخرين دائما رأيهم خاطئ أو في افضل الأحوار رأي ناقص ، نمارس السيطرة على مشاعر الأخرين نريدهم أن يكونوا مثلنا

ولذلك فأنا أفضل البشر لأني دائما اعبر عن افكار غيري :p

اول شي ... الطبيعة البشرية تحب التميز و التفرد و اللي يقلك ما يحب هذا الشي قلو انت ملك !

و كل واحد يسعى على هذا الدرب ...


كثير أحيان يتوجه البشر الى طريقة تصغير الاخرين حتى يبقوا بالمقدمة ...


و التفاخر المفرط بالانساب .. و تحميل الناس أخطاء أجدادهم .. من هذه الطرق

و هذه موجودة عند العرب من زمن القبائل و داحس و الغبراء او حتى أقدم بكثير .... و رح تظل جزء كبير من ثقافة العرب .....

(بس على درجات)

هيك الطبيعة البشرية
دايماً ابناء كل حضارة أو بلد بيضل عندهم حب للتميز والانفرادية
بعتقد شي طبيعي ومو غلط .... بس الغلط أنو ما نشوف عيوب مجتماتنا كمان ونعرف غيرنا بشو بيتميزوا عنا

مشكلتو الانسان انو بشوف الي قبالو وبصير يعلق عليه وبنسا انو لازم يشوف حالو الاول ويشوف شو اغلاطو

جد ناس :sick:

أيا أسهل نشتغل ونتعب لنكون أحسن من غيرنا ولا نقنع حالنا أنو نحنا أحسن منن ونحنا قاعدين محلنا؟
وغالباً الحلول السهلة لهون بتوصلنا: أنبل من في الدنيا وأشرف بني البشر، وما حدى رح يتعب حالو ويقلنا غلطانين لأنو ما حدا شايفنا أصلاً
(طبعاً التعميم ما نو مظبوط بس المشكلة أنو الأكترية بتجر وراها الأقلية)

هالشي طبيعي جدا عند كل البشر وما في حدا بيعلق على حالو حتى الواحد لما بطفر شي يوم وبسب بلدو او العرب كانو ما بيعتبر نفسه منهم وبصراحة الغرب ما هو احسن منا بالمطلق في عندهم مصايب العن من اللي عند العرب باضعاف مضاعفة

الحمد لله والصلاة والسلام على عيسى أبن مريم وإمام المتقين محمد وعلى آله وصحبه الغر الميامين, وبعد:
فإن هذه العصبية الجاهلية,كانت موجودة في الجاهلية,وبعد أن جاء الإسلام أختلفت المقاييس,فلو نظرنا إلى نظرة الإسلام للناس لوجدنا أن التفاضل لايكون بالحسب والنسب,فـــ(كلكم لآدم وآدم من تراب وإن أكرمكم عند الله اتقاكم..).كما قال الحبيب صلى الله عليه وسلم.ولافرق بين أبيض وأسود أوعربي وأعجمي,كما قال الحبيب صلى الله عليه وسلم(لافرق بين عربي أو أعجمي إلا بالتقوى).وقوله تعالى(إن أكرمكم عند الله أتقاكم).
فميزان التفاضل بين الناس (التقوى).

أسأل الله أن أكون وفقة في بيان وجهة نظري,فإن أصبت فمن الله عز وجل وإن أخطأت فمن نفسي والشيطان.

فإن هذه العصبية الجاهلية,كانت موجودة في الجاهلية,وبعد أن جاء الإسلام أختلفت المقاييس,فلو نظرنا إلى نظرة الإسلام للناس لوجدنا أن التفاضل لايكون بالحسب والنسب,فـــ(كلكم لآدم وآدم من تراب وإن أكرمكم عند الله اتقاكم..).كما قال الحبيب صلى الله عليه وسلم.ولافرق بين أبيض وأسود أوعربي وأعجمي,كما قال الحبيب صلى الله عليه وسلم(لافرق بين عربي أو أعجمي إلا بالتقوى).وقوله تعالى(إن أكرمكم عند الله أتقاكم).
فميزان التفاضل بين الناس (التقوى).



كل الاديان تدعو لهالمثاليات
بس هالظواهر موجودة بكل مكان
ليش ؟
أنا بقلك ليش
لأنها مثاليات بعيدة عن الواقع و تخيلية متل مدينة أفلاطون
فأنا بضل عم بصرع راسك بمثاليات وفزلكات ما بيطبق منها شي
و آخر شي بكل برود بقلك :
الخطأ بالتطبيق مو بالنظرية

هاموش :

شو هالخط الظريف هاد . حسبت حالي عم بقرا شي موشح أندلسي .:p

انو يعني هيك...:?

زميلي باشق مجروح

بدايةً أحب أن أشكرك على المجاملة,ودائماً مايكون ذوقي ظريف ,ودليل ذلك أني أحببتك وأحببت لك الخير,فأسأل الله لنا ولكم التوفيق دنيا ودين.

أما عن قولك: (كل الاديان تدعو لهالمثاليات
بس هالظواهر موجودة بكل مكان).

فأقولـ:كلامك هذا غير منطقي ولايدخل العقل السليم,وسأضرب لك مثلاً على مخالفة ماتقول للعقل لا للحصر(عند اليهود لاتستطيع أن تصبح يهودياً حتى أن يكون أبوك يهودياً أو أمك يهودية).

شكراً عمر ع المجاملة . الاديان بشكل عام دعت لاشياء متناقضة فيما بينها
يعني الي بيكون اخلاقي من وجهة نظر احد الاديان قد يبدو جريمة بوجهة نظر الدين الآخر
لكن على مستوى الحديث في هذا الموضوع و ردك السابق انا تكلمت عن ان ما تفضلت به هو مجرد مثاليات
والمثاليات هي كلام غير تطبيقي و غير واقعي ولا يقاس به .
والحجج المقدمة حول تبرير تخلف الناس بالابتعاد عن هذه المثاليات هي حجج ضعيفة و غير منطقية .
المدينة الفاضلة لأفلاطون كانت بتحقق السعادة ولكنها فكرة غير تطبيقية وبالتالي لا يمكن من خلالها القياس على سعادة المجتمعات . و كذلك كانت بعض الافكار الحزبية و النظرية و الدينية تدعو لمثاليات بعيدة عن التطبيق كما حضرتك دعوت في الموضوع.
حب المجتمعات للتميز من خلال اخفاء عيوبها و انتقاد عيوب الآخرين لاظهار بعض الجوانب الايجابية في هذه المجتمعات . هي طبيعة بشرية
وحضرتك بردك السابق انتقدت منع اليهود لانتقال الاخرين لدينهم :

(عند اليهود لاتستطيع أن تصبح يهودياً حتى أن يكون أبوك يهودياً أو أمك يهودية).


هالكلام هاد هو انتقاد للأخرين وبيفيدني بنقاش هالموضوع المطروح اصلاً لانتقاداتنا للآخرين
حضرتك هون عم تنتقد اخرين لاظهار جانب بتظن انو جيّد بفكرك
وبالتالي عم تستعمل هالاسلوب الي كنت عم تستنكرو بأحد ردودك .

حزفنا ردود واخدنا شوية اجراءات اشرافية


ياجماعة النقاش الديني واهانة اديان الاخرين ممنوع باي شكل

الطبيعة البشرية مبنيه على فكرة انو انا احسن من غيري و حتى بين هالشي لازم بين عيوب الاخرين يلي بعتبر حالي احسن منون و هيك بيبلش النتف بريشات يلي حوالينا و هالشي بينطبق على الفرد و الجماعة و لو كانت بدرجات متفاوتة

انا بشوف انو كل انسان الله خلقه بميزة تميزه عن باقي البشر ...

و انا بنظري انه ما بيحق لأي انسان انو يحكم عشخص من شكلو او تصرف إلو ..

والله خلق الانسان بأجمل صورة ..

ولو انت عم بتعيب على إنسان من تصرف او كلمة حكاها لازم تعرف انو هو فيه صفة مو موجوده فيك..

وآخر كلامي (( تحياتي إلكم )) :D:D

انا ما عندي .. مشكلة ..

.. ما حدا يقول عن زيتو عكر ..

بس ليش الكل بيقول عن زيت غيرو انو عكر مثلا؟




أنو لو يجتمع الكل متلا وكل يقول عن غيره أشرف من في الدنيا وأنبل بني البشر

مو ظابطه حسب نظرية (الافلاس التربوي للمجتمعات) كيف بدن يحكمونا ونحنا كشعوب مجتمعين يعني أذا فهمت عليي أخي المواطن خلي الحكي بسرك:D

:gem: