اخويه ..... وينك منون !!!!!؟؟؟؟؟ [الأرشيـــــف]

Sun Shine Art

28/02/2009, 10:26

مافي شي بضل ع حالو ..هدا الشي اكيد .....

وناس بتروح وناس بتجي ..اكيد هل الشي ...

بس لما هيك بتحس اساسات البيت عم تهتز ...بتقول لحالك لازم اعمول شي ...في شي غلط عم يصير ....

وين الغلط ..؟؟؟ وين فيني صلح ؟؟؟؟

مشان هيك حابه اسال اخويه كا اداره واشراف ...وينك ...من الناس الي عم تمشي !!!!!

ومو اي ناس ...اساساتك يااخويه ....!!!!!

انا كعضوه ولو اني مو قديمه بس منحقي ...عاتب واسال ...انه وينك من ولادك الي عم يمشو ؟؟؟؟
الي الهون عمر معك ....برجع بقول اخويه ( اداراه واشراف )

معقول بكل بساطه عم تتركي الناس تمشي بهل الطريقه !!!! ومو اي ناس !!!!!

ناس ارتبطت فيك عمر ...اكيد انت باقيه بدون الكل ....بس اكيد مو بنفس الطريقه .....

الي خلاني اكتب هل الموضوع واستفسر انه من فتره اسبوع ...

في اعضاء مميزين نزلو موضوع ....توديع لاخويه ....

للاسف ما شفنا لا حدا من الاداره ولا المشرفين حكى كلمه وحده ...طيب ليه ؟؟؟؟
كل هل الشي بسيط عندكون الموضوع ..وانه عادي كتير اساسات البيت تهتز ......؟؟؟

موضوعي مو للخناق ..ولا لوم حدا !!! مجرد نقاش وا ستفسار ...

وليش كتبت الموضوع..لاني من الناس الي سجلت وتعلقت باخويه بسبب ناسها المميزين ....

بسالك يا أخويه وينون ؟؟؟؟؟ وليش عم يمشو من عندك بهل الطريقه ؟؟؟؟؟؟؟ وليش في حزن برحيلهم ؟؟؟

أم الجود

28/02/2009, 15:36

لا تندهيييييييييييييي ما في حداااااااا لا تندهييييييييييي

الشب اللي حكيتي عنو كان في بموضوعه نقاط كتير صحيحة و مع هيك ما حدا من المعنيين علٌق أو رد .. و اللي رد تمسخر و تمئلس متل العادة :oops:

و ليكك انتي صرلك منزلة هالموضوع كذا ساعة و ما حدا بيّن ... بس يمكن لما بيصير عندك فوق الألف أو الألفين مشاركة بتصيري هه .. يعني انو يمكن هه .. يمــــــكن حدا يلتفت تجاهك التفاتة عطف و يجاوبك !!

للأسف .. اللي عم يصير انو في قسم من القدما من بعد ما صار الن رصيد مهم من المشاركات صاروا مفكرين انو الأخوية ملك لأبوهن و انو من حقن يهينوا و يجرّحوا بمين ما بدن !!

بعرف في ناس بدها تلعب معدتن من كلامي و تشتغل البرايفتات و حذف الردود و تسكير المواضيع .. بس معليش .. خلي الواحد يحكي و يبئ هالبحصة أحسن ما يتشردء فيا :frown:

أنا كنت متابعة أخوية قبل ما انضملها بفترة منيحة .. و انضميت مع اني مو تبع منتديات بس اللي حسيت انو أخوية غير .. فيها شي خاص و مختلف .. نفس سوري أسري مو موجود بغير محلات .. بس للأسف في أمور ما فينا نحكم عليها مظبوط إلا لنصير جواتا .. و من كان له أذنان فليسمع !

:D

مجنون يحكي وعاقل يسمع

28/02/2009, 16:25

مرحبا صن شاين وأم الجود
لآ اتوقع بأن الحبل متروك على غاربه في الموقع ، ولا أظن أن الموضوع يهمنّا أكثر من الناس الذين تعبوا كثيرا حتى وصلوا بالموقع إلى الوضع الحالي ، لاحظت أو استنتجت بوجود شيء غير طبيعي في الموقع منذ أكثر من شهرين ولم تنقطع اتصالات بمن استطعت الوصول إليه والجميع يعمل على تلافي بعض الأخطاء التي حصلت وتحصل ولن يقصر أي أحد من الأخوة المشرفين في العمل على إزالة كل العقبات في سبيل السير بعذا الموقع إلى الأمام والمهم أن يتم ذلك بصمت وعدم نشر الغسيل على الحبال , وأتمنى وأرجو من الجميع ترك فسحة من الزمن للعمل بصمت ومحاولة إغناء الموقع بالمواضيع بدلاً من البكاء على الأطلال ابتداء من عندي ونحنا ماشين
وأتمنّى ما كل يوم فيق الصباح على صوت حدا منّا عم يبكي على الأطلال
مع تقديري لصن وأم جود

أم الجود

28/02/2009, 17:00

و لن يقصر أي أحد من الأخوة المشرفين في العمل على إزالة كل العقبات في سبيل السير بعذا الموقع إلى الأمام

الله يعطيهن العافية هلأ و بعدين .. ما حدا عم ينكر تعبن

و أتمنى وأرجو من الجميع ترك فسحة من الزمن للعمل بصمت ومحاولة إغناء الموقع بالمواضيع بدلاً من البكاء على الأطلال ابتداء من عندي ونحنا ماشين
وأتمنّى ما كل يوم فيق الصباح على صوت حدا منّا عم يبكي على الأطلال

حلو .. يعني نحنا مننلام لأنو عم نعبر و نقول اللي واجعنا .. بس اللي عم يسيء ما في عتب عليه و نسكت و نتركو لربّو ... بعدين عم تحكي عن إغناء الموقع و المشاركات ؟؟ الله وكيلك صرنا لازم نحسب ألف حساب قبل ما نكتب أي رد أو تعليق ل إلا ينطلو شي خفيف دم و يصير يتمزمز مشان يكبر بعيون شلتو :pos:

مع تقديري لصن وأم جود

على راسي يا مذوء
:D

باشق مجروح

28/02/2009, 17:27

أإأبو العبد

28/02/2009, 17:39

انو انا ماكنت ناوي شارك بس بما انو الموضوع موجه للمشرفين
بس على كلن من فترة انطرح هالموضوع ووقتا انا بحبشت عن الاسباب يلي خلت اخويه بهالوضع
المشرفين مادخلن ولا حتى الاعضاء لاكن اهم اسباب ركود اخويه هو حجب الموقع بسوريه واسباب تانية مافي داعي تنذكر حاليا وشكرا:D

Sun Shine Art

28/02/2009, 20:37

أول شي : هالموضوع كأنو صاير بكل مناسبة وطنية ودينية و شعبية لازم ينفتح بصيغ متعددة للتندر على الزمن القديم .
تاني شي : الي عم يفتحو هالمواضيع من الجيل الثالث . يعني اجدد واحد ما طبق السنة بأخوية ورغم هالشي صار بدو يبكي ع الأطلال .
تالت شي : ما حدا بيختلف انو اخوية بتمر بمرحلة صعبة شوي ولكل شي في عصر ذهبي وكبوات . بس كل شي بيرجع بيترمم لأنو الاساس صحيح .
آخر شي : الي غادرو مطارحهون بأخوية وضلت هالمطارح فاضية أكيد رح تضل تفيد وتأسس بالافكار الي نشروها بين صفحات اخوية . وأمنية انو كل هالناس الي تركت اخوية لأي سبب ترجع او تقدر ناس بكفائتها تاخود المطرح من جديد . وفي ناس تركت اخوية لانو اخوية عم بتمر بمرحلة صعبة وهدول اكيد ساهمو بتكريس هالمرحلة وانهزموا .

بدك ما تواخذنا ماني عرفانه حضرتك مراقب فني ع المواضيع وتقيمها ......هي مشان الاول شي تبعك ؟كنت انتميت لشي حزب وطني او ديني مشان ماتزعل يعني

اما تاني شي ..اذا في ناس ما طبقت السنه مو معانتو مافيها تحكم على الي عم يصير .او ماتحكي او ماتعطي رايها ...الا اذا في قوانين باخويه تمنع الجيل التالت من الكلام وعطي الرأي ؟؟؟؟...وع كلمه الجيل التالت ..لما بدك تحكي بهل الاسلوب ...ياريت تحسب حساب الكلمه قبل ما تكتبها ....لان حضرتي انا شوي فهمي قليل ..وصلتني باكتر بمعنى ....ومشان كمان ما يطير فكرك لبعيد وتحط وتشيل من عندك ماتحكم ع الناس مين عم يبكي ومين ماعم يبكي .لان الاطلال تركناها الك كونك من الجيل الاول والمقدس والطبقه العليا .. ...تبكي عليها ....

اما تالت شي الي كتبتو بتفق فيه معك ...

واخر شي وهدا الحكي من عندي ...مافي داعي تاني مره تحكي بهل الاسلوب ...لانك لو دققت بالحكي الي كتبتو ..انا نزلت موضوعي تعقبا ع موضوع العجوز ....تبع ابو طوني ..والي انا ما بعرفو بالمره ولا في حكي بيناتنا ...

وماني مضطره ابدا اشرح مره تاني شو المقصد

وانتبه منيح اني موجهه حديثي للاداره والمشرفين ...وماني عرفانتك انت واحد منون ...كنت قدمت التحيه يعني لان هيك يبدو متعودين ....مو مشان شي مشان زعلك ....

ومنور :D

وماتواخذونا ع الاخطاء الاملائيه ..

لا تندهي مافي حدا لاتندهي ......فيروز القديسه غنيتي درر ...

stormsmaker

28/02/2009, 20:54

تحية
الباشق رد و كفى و وفى مشكور
طيب حسب ما بظن انو يلي عم يعمل هيك مواضيع تبع البكاء على الأطلال عم يعملها حزنا على أخوية و حبا بها
فأنا رح قول انو كل المشاكل يلي عم تصير بأخوية هي مشاكل معقدة و ما حدا يتخيل انو الحل بايد حدا سواء من اللي راحوا أو من اللي ضللوا أو من اللي راحوا و رجعوا أو من اللي راحوا و ما رجعوا لسسا أو من اللي راحوا و ما رح يرجعوا
المشاكل فيها نوع من التعقيد و ما ممكن يكون في حل الا بايدكن انتو الجيل الجديد يلي اجا و شاف أخوية بأيام العز و شافها بأيام الموت لا مو الموت خلينا نقول المرض فلازم تبنوا جيل جديد لا يمت بأي صلة للجيل القديم باستثناء بعض المساعدات من أصحاب الخبرة
أما بالنسة لهل كم عضو يلي تركوا من كم يوم ما بينزعل عليهن لأنو هني راحوا من دون ما يكون في أي سبب مقنع لتركهن و لو هني عندون حب لأخوية اتأكدوا انو ما حدا بيترك منهن لمتل هلأسباب يلي تركوا مشانها
و ملاحظة صغيرة : رجاء لا حدي يقطع و يلحش من عندو و اللي عندو معلومات مو متأكد منها رجاء لا يحطها
و بلاع يا أخوية بلاع

أخوية باقية شئتم أم أبيتم
و دامت أخوية
و دمتم

أإأبو العبد

28/02/2009, 21:08

و ملاحظة صغيرة : رجاء لا حدي يقطع و يلحش من عندو و اللي عندو معلومات مو متأكد منها رجاء لا يحطها

بالنسبة لكلامك انا بوافقك مية بالمية بس حبيت عقب على ملاحظتك
ليش لحتى لايحطها اذا حد عندو تصحيح لهالمعلومة منصححلو بس المشكلة انو قد ماعلينا منضل عرب:D
وشكرا

stormsmaker

28/02/2009, 21:20

بالنسبة لكلامك انا بوافقك مية بالمية بس حبيت عقب على ملاحظتك
ليش لحتى لايحطها اذا حد عندو تصحيح لهالمعلومة منصححلو بس المشكلة انو قد ماعلينا منضل عرب:D
وشكرا

أنا سمعت انو الصين احتلت أميركا و البيت الأبيض رفع العلم الأبيض و اسرائيل قررت تفجر حالها بقنبلة نووية هيك قللي رفيقي من شوي
حدي يصححلي يا شباب

أإأبو العبد

28/02/2009, 21:22

مابعرف بعتبر هي مألسة عموما كل اناء .....
وشكرا عالحوار الظريف:D

باشق مجروح

28/02/2009, 21:51

بدك ما تواخذنا ماني عرفانه حضرتك مراقب فني ع المواضيع وتقيمها ......هي مشان الاول شي تبعك ؟كنت انتميت لشي حزب وطني او ديني مشان ماتزعل يعني

ومين قال انو انا مراقب فني . هادا رأي شخصي بموضوع حضرتك فيا ريت بلاها هاللغة .

اما تاني شي ..اذا في ناس ما طبقت السنه مو معانتو مافيها تحكم على الي عم يصير .او ماتحكي او ماتعطي رايها ...الا اذا في قوانين باخويه تمنع الجيل التالت من الكلام وعطي الرأي ؟؟؟؟...وع كلمه الجيل التالت ..لما بدك تحكي بهل الاسلوب ...ياريت تحسب حساب الكلمه قبل ما تكتبها ....لان حضرتي انا شوي فهمي قليل ..وصلتني باكتر بمعنى ....ومشان كمان ما يطير فكرك لبعيد وتحط وتشيل من عندك ماتحكم ع الناس مين عم يبكي ومين ماعم يبكي .لان الاطلال تركناها الك كونك من الجيل الاول والمقدس والطبقه العليا .. ...تبكي عليها ....

انا مو معتبر حالي من الجيل المقدس . بس بظن انو الجيل الثالث وقصدي فيها الجداد بأخوية هني صناع اخوية الحاليين واكيد المستمرين من القدام والقصد هون انو الجداد ما عايشوا فترات اخوية كلها وانا واحد منهون فـ يعني بعتبر انو الحكي بهالموضوع مستهلك كتير

وماني مضطره ابدا اشرح مره تاني شو المقصد

ولا كنتي مضطرة هلق بس انتي تطوعتي مشكورة

وانتبه منيح اني موجهه حديثي للاداره والمشرفين ...وماني عرفانتك انت واحد منون ...كنت قدمت التحيه يعني لان هيك يبدو متعودين ....مو مشان شي مشان زعلك ....

انا مو واحد من الادارة ابداً بس بظن بحقلي قدم رأيي بموضوعك .

لا تندهي مافي حدا لاتندهي ......فيروز القديسه غنيتي درر ...

اي والله ...

Reemi

28/02/2009, 22:11

مرحبا يا جماعة الخير ...

بالنسبه ليلي بدون يتركوا اخوية وليلي تركوا اخويه فهاد قرار شخصي .. ادارة اخوية ما الها علاقه بقرارات الاعضاء الشخصيه .. البقاء باخوية وعدموا قرار شخصي بيرجع للعضو .. الي ما بدو يضل باخوية ما فينا نشدو من ايدو ... الي بدو يقول للتاني ضل ولا تروح بدو يكون عم يمون عليه بشكل شخصي ما اكتر ..

وبالاخير العالم عندها ظروف .. اليوم بنقدر نفوت , بكرا ما بنقدر .. بنقدر اسبوع انضل نفوت خمس ساعات بالنهار .. وبيجي اسبوع بعدو ما بنقدر ندخل خمس دقايق باليوم ..

بالنسبه للعصر الذهبي .. فبحب قلكون انو انا من تلت سنين من وقت ما دخلت اول مره ع اخوية وهني عم يتحسروا عالعصر الذهبي .. مافي شي باخوية اسمو عصر ذهبي .. كل وقت الو سلبياتو وايجابيتو .. والذهبي عندك كتير ممكن يكون نحاس عند غيرك .. نسبيه القصه .

:D

..Jimy

01/03/2009, 22:36

اخوية اساساتها بتتغير مع كل جيل...
ببساطة... يلي تركوا حسوا انو وجودهن صار سلبي...
.Period

alickus

02/03/2009, 04:41

The morning

02/03/2009, 07:43

وانتبه منيح اني موجهه حديثي للاداره والمشرفين ...وماني عرفانتك انت واحد منون ...كنت قدمت التحيه يعني لان هيك يبدو متعودين ....مو مشان شي مشان زعلك ....

مابعرف وين الفكره بانك تطلبي من النـاس ما تشـارك و تـعطي رأيها بمـوضوعك " الموجه للاداره" بالوقت اللي انت مـش منزلتيه بـقسم اداري ..
لو كان بدك الاجوبه تقتصر عالاداره و الموضوع يكون موجه للاداره و حـسب فكان يجب يكون بالبريد مش بالصالون .. كلّ ما يـعرض للاداره خارج قـسم البـريد يحق للجميع أعطاء رأيه فيه و مافيكي تمنعي حدا .. اضافه لانو مـش مطرّه الاداره تجـاوب بوجهه نظرها الاداريه على تـساؤل مطروح بالـصالون كمـوضوع صالوني ..

:D

Sun Shine Art

02/03/2009, 08:40

مابعرف وين الفكره بانك تطلبي من النـاس ما تشـارك و تـعطي رأيها بمـوضوعك " الموجه للاداره" بالوقت اللي انت مـش منزلتيه بـقسم اداري ..
لو كان بدك الاجوبه تقتصر عالاداره و الموضوع يكون موجه للاداره و حـسب فكان يجب يكون بالبريد مش بالصالون .. كلّ ما يـعرض للاداره خارج قـسم البـريد يحق للجميع أعطاء رأيه فيه و مافيكي تمنعي حدا .. اضافه لانو مـش مطرّه الاداره تجـاوب بوجهه نظرها الاداريه على تـساؤل مطروح بالـصالون كمـوضوع صالوني ..

:D

اول شي صباحو .....

تاني شي انا ما طلبت من حدا ما يشارك او يحكي رأيه . شو ماعندي زوق يعني بالمره او غبيه لدرجه اني نزل موضوع ومابدي حدا يرد ....
اذا لاحظتي انه قبل الباشق في اعضاء رديت وعطيت رأيها ...ما حكيت شي ...
وانتبهي كمان انه انا رديت عليه بهل الطريقه ردا ع رد الاول تبعو ....والي بتمنى ترجعي تقري وتقللي رايك فيه وبالاسلوب الي عم يحكي فيه .....
مافي داعي تعصبي وتحرقي اعصابك مو مستاهله يعني لان بالاخير هو شقفه موضوع لا بقدم ولا باخير ....

واذا معترضه انه نازل بالصالون ومانو نازل بالبريد ...
لان بالبريد لان كنت حابه الاعضاء والادراه تشارك ....بس بتختلف المشاركات لما بتكون جديه او مسخره لان نحن جيل جديد وما بحقلنا نحكي ولما بينحكا معنا باسلوب معين

اما ع الجمله الي انا موجهتها للباشق انه حديثي للاداره ...لما بيحكي بهيك اسلوب ..اكيد لح رد بهيك اسلوب ..ولا شو بتشوفي انت ......

ع كل الاحوال ...انا كل قصدي من الموضوع حديث ونقاش ..لا حساسيه ولا خناق ..
واذا كل هل الشي زاعجك من عيوني التنتين مو بس منقفل الموضوع ..ومنحذفو ...لان الصراحه الرد وصلني ...

بس هي نحنا مني وجر منضل هيك بكون الواحد بالغرب منصير بالشرق ....
كانت الفكره شي ..وصارت شي تاني ....

صحي يسعدلي صباحك بالورد:D

ابو نجبو

02/03/2009, 09:13

أنا كنت بدي أرد من يومين ..بس الملقم الله لايوفقو...
ياصوفي..
الادارة مالها علاقة و مالها مسؤولة عن رحيل الناس أو ابقائهن...

كون انو البعض وصل لمرحلة حس فيها انو فضي من الافكار و ما بقي بجعبتو ليعطيه ..فبيقرر انو يغادر...وهاد شي طبيعي جداً..ومنوجهلن تحية كبيرة ..ومنتزكر دايماً انو شخصو راح بس حسو و نفسو بالمنتدى حاضر..

أما انو في ناس من كلمة هون أو تعليق من هنيك ..بيحرد و بيغادر ..فهادا مابينزعل عليه أبداً...

وانو في ناس بتحط مواضيع من قبيل ..أنا رايح..لاحدا يسأل علي..رح أشتألكن..أحلى الايام...الخ
وتخلي الاعضاء يبوس شحاطتو ..انو لاتروح و تتركنا..من دونك مافينا نعيش..و الاخوية من بعدك أطلال ..من هالقصص هي..فهاد اللي لازم يغادر عن جد و (ضرب السد مايرد)

شغلة وحدة..الاخوية ماصارت و ماوصلت لهالمستوى بجهود شخص أو عشر أشخاص أو حتى مية..
وبالمقابل مابتنتهي الاخوية اذا راح شخص أو عشرة أو حتى مية شخص...

:D

leonardo_dicabreo

02/03/2009, 09:35

تاني شي : الي عم يفتحو هالمواضيع من الجيل الثالث . يعني اجدد واحد ما طبق السنة بأخوية ورغم هالشي

لسه حتى ما طبق الشهر وبتلاقيه بيتفصحن ! !
والي صارله 3 او 4 سنين ما بيحكي شي !!
:D

ابو نجبو

02/03/2009, 10:18

لسه حتى ما طبق الشهر وبتلاقيه بيتفصحن ! !
والي صارله 3 او 4 سنين ما بيحكي شي !!
:D
مو شرط اللي صارلو شهر يكون من شهر بس بيتابع أخوية...بعرف كتير ناس بقيو سنة من دون تسجيل و الاخوية صفحتن المفضلة..
:D

leonardo_dicabreo

02/03/2009, 10:21

It doesn't make any sense
واحد/ه ما صارله اسبوع ويصير يحكي هيك لازم وهيك مو لازم ...:D

حنين.

02/03/2009, 12:15

It doesn't make any sense
واحد/ه ما صارله اسبوع ويصير يحكي هيك لازم وهيك مو لازم ...:D
مرحبا هو سؤال بس
قديش لازم يكون عمر العضو او العضوة باخوية حتى تصدقوا انو فعلا حب المنتدى واكل همو
وشو لازم يعمل حتى يصير مسموح له يساهم بمجرد اعطاء افكار وابداء ملاحظات هو شايفها ضرورية دون ما ينرد عليه بهاد الاسلوب
يعني فعلا وضع محير العضو القديم والمميز يهمل لدرجة انو اذا وصل يقرر يترك وما حدى يحاول يفهم السبب
والعضو الجديد ما بينقيم مواضيعو غير من خلال تاريخ تسجيلو

؟؟؟؟
و تحياتي للجميع

fernanda bachchan kfoury

02/03/2009, 12:34

مرحبا هو سؤال بس
قديش لازم يكون عمر العضو او العضوة باخوية حتى تصدقوا انو فعلا حب المنتدى واكل همو
وشو لازم يعمل حتى يصير مسموح له يساهم بمجرد اعطاء افكار وابداء ملاحظات هو شايفها ضرورية دون ما ينرد عليه بهاد الاسلوب
يعني فعلا وضع محير العضو القديم والمميز يهمل لدرجة انو اذا وصل يقرر يترك وما حدى يحاول يفهم السبب
والعضو الجديد ما بينقيم مواضيعو غير من خلال تاريخ تسجيلو

؟؟؟؟
و تحياتي للجميع
ليكي حبيبتي هوي ماكان قصدو هيك انو ئديش لازم يكون عمر الواحد يحتى يحي اخوية لانو اللي سجلو باخوية اكيد بيكونو حبوها قبل تسجيلن فهذا ما بيمنع الواحد يكون عمرو بس يوم انو يحي الاخوية وحتى من دون تسجيل

بعدين العضو القديم اللي ترك او اللي بدو يترك ليش ليحط موضوع ويقول بدي فل؟ انا بعرف اعضاء قدامى وكانو من انشط الاعضاء ووقت سالتن لشو هالغياب عن المنتدى وليش تركتوه بلا حس وبلا خبر قال انو وضعو حاليا مو متل ماكان <<< من ورا هالحكي منفهم انو وضع الاخوية ازا زبط الاعضاء اللي عم يتركو رح يرجعو ..لكان ليش تعمل موضوع من اساسو انو بدك تفل

بعدين العضو اللي مشاركاتو بالالفين او الخمستالاف مش بالضرورة يكون قديم يمكن يكون صرلو مسجل بس 6 شهور او اقل هاد يعتمد ع فوتاتو وطلعاتو للاخوية

ومتل وماسبق وانحكى بركي اللي عم يتركو عم بيمرو بظروف صعبة متل الاخوية وبكرا بيرجع يتصلح كل شي ان شالله :D

وتحياتي الك صوفي لانو طرحتي هالموضوع خوفا عالمنتدى واعضاؤو :D

عطر الايام

02/03/2009, 16:12

بصراحة كلامك مزبوط
هلا حتى انا عم فوت واطلع وماعم لاقي موضوع يشدني وانو اتعلق فيه ورد عليه
ويللي عم ادايق منو انو ماعم اقدر نزل شي من المنتدى فصارت حالة ملل انو لا عم نقدر ننزل ومافي مواضيع حلوة
ماعاد فتنا كتير متل الاول

inodessa

02/03/2009, 17:12

وانا بوافقكون الرأي بالنسبة لاخر فترة....

بس يعني انتو كمان فرجونا همتكن!

بنفسجة

02/03/2009, 17:28

:shock::shock::shock::shock:
شو بدكون تعملو حكم الزمن
زمن غدار:pos:

باشق مجروح

02/03/2009, 17:45

توضيح :

أنا بمشاركتي عبرت عن رأي شخصي من حقي عبر عنو لأنو هيك الموضوع بتخيل مطروح للنقاش
فما يؤحذ الموضوع كأنو موقف أخوية الكامل من الاعضاء الجدد لأنو أنا بمثل نفسي هون فيا ريت الحكي بهالموضوع تحديداً يختصر .
وبرجع بأكد انو اخوية مو محتاجة هالمواضيع المتكررة بكل فترة وانو الاعضاء الجدد تحديداً فيهون يشتغلو على تطوير اخوية بدل البكاء ع الاطلال الي ما عايشوها . اخوية بخير ولسه في اقلام مهمة ورائعة بكل الاقسام . و من قبل في كتير ناس تركو اخوية وضلت مطارحهون فاضية بس اجا ناس بكفائات عالية . منتمنى يعودوا كل ابناء اخوية . بس بلاهون ما رح تتوقف .
وبتمنى يوقف الحكي بموضوعنا لحد هون وتكملو بالموضوع الاساسي.

sandra

02/03/2009, 17:53

وبرجع بأكد انو اخوية مو محتاجة هالمواضيع المتكررة بكل فترة وانو الاعضاء الجدد تحديداً فيهون يشتغلو على تطوير اخوية بدل البكاء ع الاطلال

تماماً :deal:
بالنهاية أخوية باقية وانتو رح تساهمو ببقائها قوية
:D

بنفسجة

02/03/2009, 18:09

تماماً :deal:
بالنهاية أخوية باقية وانتو رح تساهمو ببقائها قوية
:D
اي وخلصونا انلعى قلبنا:cry:
والله صرت خاف فوت اخوية وشوف هيك مواضيع جد عم احكي
يعني ما بعرف شو المعيار يلي عم تنطرح فيه هيك مواضيع
كلها بالنهاية اراء شخصية بس انو .......

سيجارة

02/03/2009, 19:22

خيو شو هالطمعة يعني أنو تصير منسق أو مشرف أو مستشار
إي شو هوي منصب بالدولة ولا في من ورا سيارة ولحسة إصبع متل مو دارج
يعني كلياتا متل مرتبة فخرية يعني منظر

بعدين ما في من وراها غير وجع الراص والتعب يعني بتصير بدك تلاحق المواضيع وتلحق المواضيع الجديدة
يعني بتشوف واحد ناترلك قصيدة وشالحا وين بالمنبر مثلا متل ما عملت أنا ببداياتي
وواحد تاني عمعرف عن حالو بقسم الملطوشات
يعني ليش بدنا نركد وراها مشان اسم ملون أو توقيع ملون

بعدين لازم تكون عضو عامل
وبتجيب إخراج قيد موقع من مدير قلعة حلب وبدك تكون منتسب لفرقة دبكة ولاحكم عليه وشهادة حسن سلوك
و....................إلخ

هاموش : تأكد أنو ما حدا من الإدارة عمفوت عالمنتدى لأنو التخبيص شغال من الأعضاء ومن المنسقين والمشرفين ومن الكل
بعدين قدمنا طلب من أكتر من شهر لتغيير الاسم ولساتنا ناطرين الرد لحتى يفوت واحد من الإدارة مدري شو اسمو آآآآآآآآآل صرلو زمان ما فاااات :jakoush::jakoush::jakoush::jakoush::jakoush::jako ush::jakoush::jakoush::jakoush:

LiOnHeArT.3LA2

02/03/2009, 19:53

زمن غدار////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

يا حرام ..

حنين.

02/03/2009, 21:59

مساء الخير
انا ما طلبت تترجو اي عضو حتى يرجع او حتى يبقى بس برايي انه من الحكمة تسالو الاعضاء المميزين اللي تركو لاسباب متعلقة بالمنتدى شو هو السبب
اذا كان في وجه من المنطق تحاولو تصلحو هاد الخطا
لانو ابدا مو معقول الكل يكون غلطان
وانا طبعا مع انو لازم كل من تعنيلو اخوية يحاول قد ما يقدر يرفع مستوى المواضيع اللي بيحطها
واللي بيرد عليها كمان
يعني قصدي اغناء والتطوير والاصلاح والتفهم لازم يكونو كلهم سواء
واسفة اذا كترت فلسفة
تحياتي:D

sandra

02/03/2009, 22:10

مرحبا للكل
انا مسجل بالمنتدى تقريبا من شي سنة
منتدى حلو كتير كنت فوت دايما اقرا مواضيعه صحي لا شارك و لا رد الا نادرا بس قلة فضا
و بقول بكرى و بعدو و ما كنت افضى
من شهرين ما فتت لمبارح فتت
لعمه شو صاير ليش هيك صاير المنتدى كتير متغير راجع لورا و مواضيعو ما عادت متل الاول
بعرف انو الاعضاء القديمين بالمنتدى بيتقبلو النقد
و الله كنت حبو لهالمنتدى كتير و لهلق بس بتمنى يرجع متل اول في كتير اعضاء كنت اتمنى يكتبو موضوع جديد لاقراه بس ما ني شايف حدا منهن
على كل بتمنى المنتدى يرجع متل اول و احسن و يضل سيد المنتديات لانو كان هيك
( قد لا اوافقك الراي و لكني اموت من اجل ان تقول رأيك )

دمجنا هالموضوع هون كونو بيحكو عن نفس الفكرة
:D

هلا منجي لفكرة المواضيع يلي بتحكي عن أخوية وأمجاد أخوية القديمة ويا حسرتي عليكي يا أخوية وياليت الزمن يعود يوماً ... الخ
لما بشوف هيك مواضيع ما بيخطرلي غير شي واحد كيف نحن مننتقد شعبنا ومنقول نحن كشعب مو شاطرين غير بالتكلم عن أمجاد الماضي والبكاء عالأطلال وما منفكر نعمل شي غير البكاء عالاطلال وهالشي لازم يتغير
ومنجي لهون منعمل نفس الشي :lol:

سوا ربينا

02/03/2009, 22:18

لك يا عمي مشان الله .. في عالم بتحكي انو الواحد لازم يكون منسق او مشرف او مستشار او مدري شو .. لحتى يقيم المنتدى ... لا يا سيدي القصة ما الها دخل بهالالقاب ... بس القصة انو الواحد لازم يكونو فترة معينة لحتى يقدر يحكم على انو الاخوية منيح ولا لا ... وبعدين معلش هلأ ليش لنحط الحق ع الادارة او غيرها ... ليش ما نحنا نعمل شي منيح ليش ما نصير ننزل مواضيع بتستاهل مش مواضيع من وين ماكان ... يعني الادارة ما الها علاقة برجوع الاخوية على قد ما نحنا السبب برجوعها ... بتمنى نعمل كلنا لحتى ترجع اخوية احلى واحلى ... وبالنسبة للاعضاء اللي عم تروح ... هالشي شخصي فيه ...:D

mhsen77

03/03/2009, 00:11

يا شباب يا عيوني
الحياة كلها هيك ناس بتروح وناس بتجى
والحياة مستمرة مع الجديد
نحنا الجدد لازم نتابع مشوار اخوية
يلي بيروح الله معو يمكن تكون ظروفو صعبة يمكن يكون مل او......او.........او........
بالنهاية هو عمل يلي بيرضيه والي مقتنع فيه و الله يعطيه العافيه ولولا عملو هو امثالو ما كنا هون
بس بالنهاية نحنا يلي لازم نستمر ونتابع
وطبعا من حق الكل انو يسأل عن وضع المنتدى ابن مبارح وابن الخمستالاف مشاركةوكل واحد بيحكي من وجهة نظرو ومتل ما بيعرف مومن حق اي حدا يتهمو ممكن التوجيه لكن لا يحق الاتهام
:D

alaa7r

03/03/2009, 00:12

شغلة وحدة..الاخوية ماصارت و ماوصلت لهالمستوى بجهود شخص أو عشر أشخاص أو حتى مية..
وبالمقابل مابتنتهي الاخوية اذا راح شخص أو عشرة أو حتى مية شخص...

بذمتي عم تحكي مدوزن :D
بقى يا شباب الدنيا جايه على ربيع خلونا نشد الهمه مشان ترجع تتفتح براعم أخوية.
مع أني بشوف أنو أخوية بتضل شباب ورح تبقى.

MadMax

03/03/2009, 03:58

دمجنا هالموضوع هون كونو بيحكو عن نفس الفكرة

يا ترى لو دمجتي كل المواضيع يللي بتحكي عن هالقصة ..... من الـ 2004 لهلأ ( بالـ 2003 يمكن كان العصر الذهبي ////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -/////////////// )
قولك كم صفحة كان طلع ..؟؟

بعدين هادا العصر الذهبي ... صاير متل سيدة الرقص الشرقي ... بطلنا نعرف مين هو عالمزبوط
أنا سجلت بالـ 2006 و كنت شايف وضع المنتدى بوقتا بجنن .... و مع هيك بشوف مواضيع من هداك الوقت عم تترحم عالعصر الذهبي