-
دخول

عرض كامل الموضوع : حلمت حلماً

التائه
17/07/2009, 16:54
حلمت حلماً

كنت سائراً في المدينة وحيداً أتذكر أيامي في الوطن و لقائاتي المتكررة مع الشباب و كم كنا نفرح على أشياء بسيطة لم يعد لها أي معنى في الزمن الراهن و فجأة لمحت لافتة مركز الإتصالات و قررت الإتصال بأعز صديق لدي للإطمئنان عليه و على الأهل و الشباب.

دخلت مركز الإتصالات و أخترت أحد الهواتف و إتصلت به و هكذا كان الحوار:

شمعون: ألو

أنا: مرحبا أبو شمييييع شلونك يا زلمة؟

شمعون: هلا هلا أبو شريك شلونك يا زلمة و أيش أخبارك؟

أنا: والله مشتاق يا زلمة

شمعون: نحني بالأكتر صدق

أنا: طمني على وضعك لو؟

شمعون: صدق على أحسن ما يكون يا أبو شريك يعني الحمد لله خلصتو معهد و الوظيفة كانت مئمنة و براتب محترم

أنا: ليش عندك واسطات يول؟

شمعون: له يا زلمة أيش واسطة و أيش حالة... ما بقا في هيك شي عنا... كلو على حسب الكفاءة و الخبرة.

أنا: حلوووو... و أيش مخطتاتك المستقبلية؟

شمعون: صدق هلا كل سجلتو على سيارة شام... تعرف يعني صارت من أحسن السيارات بالبلد و سعرا مناسب وي كتير كتير.

أنا: يا سلام... يا سلام حكي يشرح النفس و ينعش الفؤاد

شمعون: أي أي يا زلمة الوضع تغير كتير بعد سفرتك و هلا كمان كل سجلتو على شقة بالجمعية و إن شاء الله الإسبوع الجاي بدي أستلمها.

أنا: الإسبوع الجاي؟؟؟ ليش كم سنة صارلك مسجل عالشقة؟

شمعون: صارلي شي شهرين مسجل عليها

أنا: أووووف بهالسرعة؟ أيش هالتطور الرهيب يا زلمة؟

شمعون: أي أي ورك لكان أيش صارلي ساعة أقولك أنو الوضع تغير.

أنا: و أيش أخبار خالة أم شمعون؟

شمعون: الحمد لله تمام التمام... قاعدة و عم تاخد تقاعد المرحوم أبوي و بالإضافة للمساعدة الإجتماعية.

أنا: أيش؟ مساعدة إجتماعية؟ ليش صار في هيك شي عنا؟

شمعون: إي لكاااااااااااااان و أحلى مساعدة إجتماعية متضمنة التأمين الصحي و كل التأمينات التانية كمان.

أنا: و أيش أخبار الشركات الخاصة عنا؟

شمعون: على كيف كيفك أبو شريك يعني مرتاحين أخر رياحة على هالقرارات اللي عم تطلع و الحمد لله كل الشركات مبسوطين ني.

أنا: خيووو اذا دبرتولك كم واحد من هون من أوروبا تقدر تدبرلن فيزا لعنا للبلد بشان يشتغلو المساكين!!!

شمعون: صدق صعب يا أبو شريك... يعني فيزا لعنا صارت صعبة كتير كتير... بس أقدر أدبر فيزا للبلد اللي فوقنا و من هونيك يجو تهريب أيش رأيك؟

أنا: أي كمان يصير.

شمعون: أي خير إن شاء الله

أنا: خيو.. ايش أخبار الوضع السياسي بالبلد؟

شمعون:أأأأأأأ.......

و فجأة رأيت رجلاً يرتدي بنطالاً واسعاً من القماش و قد وضع القميص تحت البنطال و على خصره الأيسر مسدس و في يده سيجارة الحمرا الطويلة و يرتدي نظارات شمسية من النوع القديم... نظر لي و قال: شوووووو يا حبيب كل هالتطور هااااد و منّا عاجبينااااااك؟ شو بداك بعد؟ نطالعك عالقمر سياحة يعني؟ ما ناقصنا إلا و تقول بدي إستلملي شي مركز بالحكومة يا حبيب.

يالله مشي قدامي لشوف شو ضعك قرد هنت.

و إستيقظت و قد بُلَّ فراشي من تعرقي و ذهبت أبحث عن كوب ماءٍ لعلَ رعبتي تذهب و أستطيع النوم مرة ثانية.
Black Orchid
17/07/2009, 18:54
الحلم كان ملون ولا أبيض وأسود......................
التائه
17/07/2009, 18:57
الحلم كان ملون ولا أبيض وأسود......................

ياسيدي الحلم كان سيرونيكس ملون عيار 29 بوصة و مع جهاز تحكم عن بعد
عربي عربي
17/07/2009, 23:22
ياسيدي الحلم كان سيرونيكس ملون عيار 29 بوصة و مع جهاز تحكم عن بعد

LCD ولا عادي :o
bacteria
18/07/2009, 00:32
حلمتو بالليل ولا بالنهار :na3san:
Elephant And Castle
18/07/2009, 07:50
خسارة ..كان الحلم حلو ..بس هاد يلي عم يدخن حمرا خربها اخر شي ..

رح يجي اليوم و نقدر نشوف الحلم بدون ما نشوف صاحبنا هاد بأخرو ...خصوصا انو صرلنا مية سنة نايميين ,,,,
leonardo_dicabreo
18/07/2009, 10:23
هلأ هاد حلم ولا بيتهيألك , لا لا شكله مسلسل مكسيكي . . ! ! :?
Sun Shine Art
18/07/2009, 10:26
دخلك صار فينا نحط احلامنا بالمنبر :larg:
leonardo_dicabreo
18/07/2009, 10:32
دخلك صار فينا نحط احلامنا بالمنبر :larg:

لك الايام هاي كلشي بصير صوفي , فيكي تحطّيه بالصالون كمان ! ! :lol:
التائه
18/07/2009, 10:34
LCD ولا عادي :o

يا سيدي كان بلازما بإعتبار شركة سيرونيكس هيي الرائدة بصناعة تلفزيونات البلازما

حلمتو بالليل ولا بالنهار :na3san:

يا سيدي وج الصبح...... يعني من هدول الأحلام اللي بيتحققو :cry:

خسارة ..كان الحلم حلو ..بس هاد يلي عم يدخن حمرا خربها اخر شي ..

رح يجي اليوم و نقدر نشوف الحلم بدون ما نشوف صاحبنا هاد بأخرو ...خصوصا انو صرلنا مية سنة نايميين ,,,,

يسلمو عالرد يا حبيب و بشان ردك بقولك أأأأأأأأأأأأأأأأأأأأأأأأأ أأأأأأأأأأأأأأأأأمـــــــ ـــــــــــــــــين

هلأ هاد حلم ولا بيتهيألك , لا لا شكله مسلسل مكسيكي . . ! ! :?


يا زعيم لو كان مسلسل مكسيكي.... طيب وينا كاساندرا... وينا روزاليندا.....ياخي حتي لو ييجي راندو و معو
سكاكينو ماني زعلان بس ما ييجيني هدا صاحبنا أبو الحمرا الطويلة :shock:
jankasanova
18/07/2009, 10:36
لك خيو هالزلمتين حكياتون بيدلو انو هني مردلية قح . من عظام الرقبة يعني:larg:
التائه
18/07/2009, 10:49
لك خيو هالزلمتين حكياتون بيدلو انو هني مردلية قح . من عظام الرقبة يعني:larg:

أبو شريك جان كازانوفا....... مردلية ولا جزراوية كلاتنا أهل و على عيني ابو شريك يا عضام الرقبة و العمود الفقري كلو و هاي أحلى وردة :D
Elephant And Castle
18/07/2009, 11:19
حدا بيفيدنا و بقلي شو معنى "مردلية" ..اول مرة بسمع بالأسم هاد بسوريا
التائه
18/07/2009, 11:37
حدا بيفيدنا و بقلي شو معنى "مردلية" ..اول مرة بسمع بالأسم هاد بسوريا

يا سيدي المردلية هم نوعٌ من المخلوقات يشبهون لدرجة كبيرة البشر و يستوطنون الجزيرة السورية ( المالكية, القحطانية, القامشلي, الحسكة و حباشاتون) معقلاً لهم. الجدير بالذكر أن المردلية لهم لهجة خاصة جداً و مميزة.
jankasanova
18/07/2009, 11:40
أبو شريك جان كازانوفا....... مردلية ولا جزراوية كلاتنا أهل و على عيني ابو شريك يا عضام الرقبة و العمود الفقري كلو و هاي أحلى وردة :D
100 :D ابو شريك

حدا بيفيدنا و بقلي شو معنى "مردلية" ..اول مرة بسمع بالأسم هاد بسوريا

يا سيدي المردلية هم نوعٌ من المخلوقات يشبهون لدرجة كبيرة البشر و يستوطنون الجزيرة السورية ( المالكية, القحطانية, القامشلي, الحسكة و حباشاتون) معقلاً لهم. الجدير بالذكر أن المردلية لهم لهجة خاصة جداً و مميزة.

التائه كفى و وفى بالشرح:D
ابو نجبو
18/07/2009, 11:50
هلأ هاد حلم ولا بيتهيألك , لا لا شكله مسلسل مكسيكي . . ! ! :?

بالعكس .....

هاد مسلسل عربي.......وبامتياز
Elephant And Castle
18/07/2009, 11:51
شباب ,,كأني ما الي علاقة بسورية ...معقول انو ما سمعت بأسمون من قبل !...بس شو بدكون تحكو ...الحق على مناهج التعليم بالمدارس يلي كل شي علمونا فيه عن الجزيرة السورية انها منطقة نائية !! ..لسا لهلئ في مناطق نائية بالعالم كلو !!..مع انو انتاجنا من المواد الغذائية المهمة و النفط و الثروة الحيوانية كلها من هنيك ! ....انو ليش التعتيم هاد كلو
Genifer
18/07/2009, 13:51
:p




أنا: خيووو اذا دبرتولك كم واحد من هون من أوروبا تقدر تدبرلن فيزا لعنا للبلد بشان يشتغلو المساكين!!!




شمعون: صدق صعب يا أبو شريك... يعني فيزا لعنا صارت صعبة كتير كتير... بس أقدر أدبر فيزا للبلد اللي فوقنا و من هونيك يجو تهريب أيش رأيك؟






ويجوا لعندنا كمان نسوان حوامل منشان يولدوا وياخدوا ولادهن الجنسية؟؟

منامك ذكرني بحلقة من مرايا ..فرع مراقبة المنامات :x

وتحياتي :D
التائه
18/07/2009, 14:46
شباب ,,كأني ما الي علاقة بسورية ...معقول انو ما سمعت بأسمون من قبل !...بس شو بدكون تحكو ...الحق على مناهج التعليم بالمدارس يلي كل شي علمونا فيه عن الجزيرة السورية انها منطقة نائية !! ..لسا لهلئ في مناطق نائية بالعالم كلو !!..مع انو انتاجنا من المواد الغذائية المهمة و النفط و الثروة الحيوانية كلها من هنيك ! ....انو ليش التعتيم هاد كلو

هاي مشكلة كتير كتير كبيرة يا أبو شريك و اللي راح عالجزيرة يعرف الخيرات اللي فيها و لو ربع هالخيرات تبقى فيها لتصير جنة بس أأأأأأأأأأأأأخ

:p

ويجوا لعندنا كمان نسوان حوامل منشان يولدوا وياخدوا ولادهن الجنسية؟؟

منامك ذكرني بحلقة من مرايا ..فرع مراقبة المنامات :x

وتحياتي :D

أي أي طبعاً هدا شي أكيد و حتي في شباب و صبايا رح يتزوجوا من الأجانب يعني بس على الأوراق بشان حرام الأجانب ياخدو الإقامة عنا.....
و بالمقابل الأجنبي بيعطي للبلود هدية أمممم علبة متة مثلاً أو حتى باكيتة حمرا بس مو طويلة.... الله يبعدنا عن الحمرا الطويلة و أصحابها
مجنون يحكي وعاقل يسمع
18/07/2009, 15:04
يعني فينا نطلب من أبو الزوز يغيرلنا الغنية و بحيت تصير
قوم فوت نام
وما عاد تحلم
أنّو بلدنا صارت بلد

واللا خليها متل ما كانت لأنو أبو السيكارة الحمرا متل السرطان وين ماكان وطالع بوجهنا عالنازلة وعالطالعة وعالرايحة وعالجايي
هيدي بلد

ان قلت بلد واللا ان قلت مش بلد رح يطلعلك أبو سيكارة الحمرا وان فتحت كيس البطاطا بيطلعلت وإن فتحت علبة الدخان بيطلعلك مع كل سيكارة واحد
هالله هالله على أيام زمان لما كان يطلعلك ياسين بقوش
حلام أخوي حلام ولا يهمك عالحالتين طالعلك أبو سيكارة الحمرا
Fady007
18/07/2009, 15:09
حلمت حلما

و إستيقظت و قد بُلَّ فراشي من تعرقي و ذهبت أبحث عن كوب ماءٍ لعلَ رعبتي تذهب و أستطيع النوم مرة ثانية.




طيب نشكر ربنا انو فراشك اتبل من عرقك
فيه اناس آخرين بيتبل فراشهم بس مش من تعرقهم;)
اكيد الناس التانية دي مش عايشين بالوطن العربي

المهم عرفت تنام مرة ثانية؟ ولا راح النوم؟
Barleb
19/07/2009, 00:01
اي ولله .. ديريك ولله اشتقنالا .. قربان اشتقنالا
التائه
20/07/2009, 12:14
طيب نشكر ربنا انو فراشك اتبل من عرقك
فيه اناس آخرين بيتبل فراشهم بس مش من تعرقهم;)
اكيد الناس التانية دي مش عايشين بالوطن العربي

المهم عرفت تنام مرة ثانية؟ ولا راح النوم؟

أي أي الحمد لله بعد شرب برميلين مي مشي الحال... :gem:

اي ولله .. ديريك ولله اشتقنالا .. قربان اشتقنالا

على راسي ديريك و أهل ديريك :D
jano.
20/07/2009, 12:31
شباب ,,كأني ما الي علاقة بسورية ...معقول انو ما سمعت بأسمون من قبل !...بس شو بدكون تحكو ...الحق على مناهج التعليم بالمدارس يلي كل شي علمونا فيه عن الجزيرة السورية انها منطقة نائية !! ..لسا لهلئ في مناطق نائية بالعالم كلو !!..مع انو انتاجنا من المواد الغذائية المهمة و النفط و الثروة الحيوانية كلها من هنيك ! ....انو ليش التعتيم هاد كلو
اي وشو يعني؟ حتى لو كانت كل ميزانيتنا من هنيك، المهم "البعيد عن العين بعيد عن القلب" :lol:
بعدين يا اخي نحنا اهل الجزيرة ما بنحب الشهرة وخاصة عن طريق المناهج المدرسية... بيكفينا برنامج في رحاب الجزيرة كل يوم تلاتاء عالارضيّة:lol:

صحيح، لساتو ماشي البرنامج؟
BL@CK
20/07/2009, 18:43
تحية .

الأدب الساخر هوي القسم المناسب لهالموضوع .

من المنبر ..
التائه
21/07/2009, 10:55
تحية .

الأدب الساخر هوي القسم المناسب لهالموضوع .

من المنبر ..

شكراً أخ BL@CK و بلاك ما بنسوى شي نحني :larg:
بدي شوي لأتعرف على أقسام المنتدى أخ BL@CK
سلامات