يا حمار . تمرين تاسع خود وضع



ظرف المكان .... على تلة بحص عند باب الكتيبة ...
ظرف الزمان ..... بعد منتصف الليل ....... والذئاب تعوي بغزارة ....
المفعول به ..... شب ملفوف ببطانية متل اليبرقاية وحاطط على أدانيه دفايات النعمان ... يجلس على أعلى التلة ... متل الآء على الجوزة ..
الصفة : حارس ليلي ..
اسم الآلة 1 : كاسة بلاستيك ديسبوزابل فيها مي فاترة وظرف شاي من ماركة السبع وزات ..
المفعول لأجله الشاي : نفس الشب النعسان .. آعد عم يتسمع على راديو اف ام صغير ... وكل شوي بيأعد بيبربر لحالو ..
اسم الآلة 2: كلاشينكوف مهري محفور عليه ذكريات اللي كان ماسكو من أبل ..



تهب نفحات من النسيم يتطاير على أثرها شعره بغير انتظام ... يبحلق في الأفق البعيد الغير مبين بسبب العتمة ... بالاضافة الى كومة زبالة كبيرة تسد المنظر ...

ويتذكر الأيام الجميلة قبل التحاقه بالعسكرية ... آآآه على تلك الأيام ... ألله يأرجيني فيك يوم يا أبو حدو الطشت .. أساسا مو طشت غير يللي سدأك أنو طالع بايدك تظبطلو العسكرية .... آل شو ... انته ما عليك ... تروك البائي عليي .. لك ألله يجعل الدب ياكلك يا أبو حدو ... آل شو كمان ؟؟ انته بس عطيني متل ما اتفأنا ... وكل شي لح يكون عال ... ريتك تنعطا لطشة تسهل أمرك نشالله ..

.... الهي يا أب حدو ... يسلت عليك شي سطل مي من شي بلكون عم ينشطف وانته ماشي بالشارع ... نشالله تأرصك شي زلئطة من أنفك يوم كتب كتابك .. نشالله توقف بالدور مشان تدفع فاتورة الكهربا شي خمس ساعات ... وما يوصل الدور لعندك .. آمين ..

هي صفينا حارس ...
وشو؟؟ حارس ليلي ...(أضاف مالص الفيش) ...
ثم وقف قليلا .. مشان يريح رجلو اللي كانت قد نملت قليلا من الجلوس ... مسك بحفنة من البحص ... وأخذ يقذفها على طابوسة قريبة ... مما يجعلها تقفز على سطح الماء الغير نقي ... عدة قفزات ... محدثة دوائر صغيرة في المياه أخذت تتسع تدريجيا ... مما عرضه الى عدة زورات من ضفادع كانت تتساير على ضفة الطابوسة وتنق بصوت عالي ..

يللا ... بس لازم تتطلع على الجانب المشرق من الموضوع ...
هههه ...
يعني مثلا ... هلأ انته خلصت من الرياضة الصباحية مثلا ... يا سلام ... يعني هي لحالها بالمكفى .. ههه ... هلأ كل الشباب البقية ... لح يروحو متل ما ألله خلقهون يلعبو رياااااااهاااااااضة ... هاوم ... باينتني نعست ... يللا شو عليه اذا أخدتلي شي سهوة ..

(الراوي : ونام مالص الفيش ... نام كالأطفال ... نام بكل براءة ... نام رغم نقيق الضفادع .. وصوت صراصير الليل... وعواء الذئاااب ...) ...


(في الخلفية صوت عواء ذئب ..... عوووووووووووو ...... )


عوووووووووووووووووووووووو وو


....... عوووووووووو.... لك .. عوووووووووووو !!

..... لك عم أووول : عووووووووو !!!! .......


.....لك هادا باينتو نايم .... ثم اقترب شخصان ملثمين من مالص الفيش ... ومع اقترايهما بدأ صوت الشخير يعلو تدريجيا .....


واصل الفيش : .... لك أوووم مالص الفيش ... هادا أنا أخوك ...لعمش شو نومك دباجي ... لك جبتلكون الغراض ... وجبتلك كمان محارم الكولونيا مشاان سووون ... بس بطارية الموبايل تبع أنوس ما لئيتا .. وكمان هدولة مدري شو اسمون الروايات المصرية للجيب شيت برايان .. وايد البلاي ستيشن تبع Salimoov .. ايه وشو بدي الك كمان ... هدولة العود الصينية يللي وصاني عليهون sml_4u ما لئيتهون ... لك أخي خليه ياكل بالمعلقة .. ضروري هلأ البظبظة ؟؟

مالص الفيش : خخخخخ ... تشششش ..
واصل الفيش : طيب يللا أنا حروح ...أبل ما حدا يشوفني ... بدك شي؟؟
مالص الفيش : خخخخخ ... تشششش ..
واصل الفيش: لك .. أووووووووم ................ مالص : آه ؟؟ امم؟ .. ايه؟؟ .. شوفي؟ ... ما كنت نايم سيدي!! ... والله مو أنا... لك مين ؟؟ واصل الفيش ... أهلييين بالحبيب ... امواه ... اموواه ... وينك لهلأ يا دب؟ .. لك صار الصبح تأريبا ولك علوش .... وينك لهلأ ؟؟ شو صار معك؟؟ جبتلي الأرغيلة؟


واصل الفيش: ... كلو تمام ... بس انتبه منيح على أطرميز المكدوس ... حطيت الحرا بأصبعو واليبرقات تحت الشي ... وفوأهن حطيت الكبب والبرك والوربات بفستق والمدلوقة والأشاطي...... وهونيك على الطرف ... حطيت صفط الحلاوة .....
مالص الفيش: حلاوة ؟؟
جبتولنا على العسكرية حلاوة ؟؟! حدا بيجيب لواحد بعسكريتو حلاوة ؟؟؟؟؟
طيب كنتو جيبولنا شي حرزان !! .... ليش هيك .. مالك حأ ... طيب يللا أمري لألله ... شو بدي أعمل؟؟ هففف ... هي أساسا اسما عسكرية ... يعني ما فيها نظنظة ... لازم نستحمل .. بندبر حالنا باليبرق والكبب يللي جايبينهون ... أساسا لو ما كانو حاطيني مناوبة حراسة اليوم ما كنت حسنت فوت شي .... كنا صفينا علبرغل ..


واصل الفيش :: يللا حج برغل ... بدك شي؟؟ لك شو هاد الصوت الغريب يللي عم بسمعو؟؟ كأنو صوت واحد جاية ... أوام أبل ما ننكشف .... ( الراوي: وانطلق واصل الفيش والشخصية المجهولة التي كانت معه ... والتي على الأرجح أنها أحد أصدقاء مالص الفيش .. انطلقو ... ورجليهون تدق بضهرهن ...) ..


مالص الفيش : مين هووون ؟؟ هاااع ... أوام عرف عن حالك أبل ما رشك ... A/S/L ؟؟؟

أبو البيس :: لك هادا أنا أبو البيس ... صار دور نوباطشيتي ... اجتني عقوبة سلخوني حراسة تبع الساعة أربعة الصبح ..

مالص الفيش : ... لك ألله يجعل الدب ياكلك ... خوفتني .... لك أهلين بيسو ... كيفك؟ ... كيف رفاريفك؟! .. خود هي لعبة الميكانو يللي وصيتني عليها .. بعدين تاني مرة بتزمر أبل ما توصل ... واذا يعني عندك حراسة ؟؟ ... من هشّي وشك مفشي ... غرررر ... يللا بدك شي ... معس .. (اختصار مع السلامة ) ..



الراوي : يصل مالص الفيش الى أعتاب المهجع ... ويقف على صخرة .. ويطلق زلغوطة بمناسبة انتهاء نوبة حراسته ... الأمر الذي يجعله ياكل عدة مسبات من بعض العساكر في الداخل ... يشحط حاله الى داخل المهجع ... ويرتمي على السرير ... في حركة سينمائية .. فيسمع أصوات شيء عم يتكسر ... الشوق : هاااع ... لك أوم من عليي فعستني .... مالص الفيش : لا تواخذنا حبيب ..

وبعد مجموعة من التجارب الفاشلة التي أدت الى خبص كوكبة من العساكر الغفلانين يللي كانو عم يشوفو ساحة المرجة مزروعة درابزين خرمسي ... يصل أخيرا الى سريره ... أخيرا ! (بيؤول مالص )... أنا معلمه بلزيقة لونها أخضر ! ... السرير ... وقفز كأنه غطاس محترف باتجاه سريره ....

لكن فجأة ...

كووع دخل في بلعه ...

بلعععععع ! ... (صوت الكوع وهو يدخل في البلع)

ممممممممم ...

من الصعوبة بمكان أن يدخل كوع في بلعك ولا تغضب ...

غضب مالص الفيش ...
غضب .. غضب حتى اصطبغت أوداجه بلون قرمزي ...
- انته شو عم تعمل بتختي ؟ هاااع ؟؟
- آل شو عم تعمل بتختي آل !! ...
انته يللي شو عم يعمل بتختي ؟؟؟ أنا اسمي أبو السوم ... وأنا جديد.. نألوني اليوم علهنغار ...
- تختك ؟؟ نألوك جديد علهنغار ؟؟


الراوي: وتدور أحداث حلقة جديدة من حلقات توم وجيري داخل المهجع .... وتنتهي بعين زرقاء تزين وجه كل من الطرفين ... مع ضحكات عريضة ... هع هع هع هع ... وكلام من نوع ... لا تاخد رفيق اللا من بعد أتلة

هون بيطلع صوت الرواي عم يقول:

وهكذا اعزائي المشاهدين, انتهت الخلافات في المهجع, وعاش الجميع بسعادتن وهناء....

----------------------> بيطير بصطار عسكري نمرة 43 (شلونك سمسوم ) ودج بيدء بنص راس الراوي, وبيطلع هالصوت:

رح تنئطنا بسكاتك انت التاني ولا قملك ؟؟؟

ويعم الهدوء بالمهجع, طبعاً اعزائي فالجميع نيام :S


وفي القسم اليميني من الهنكار, هناك سرير كبير, عبارة عن سريرين ملزوئين ببعض, طيلس عليهن عسكري ضخم الجثة, يدعى سوووون, ورغم كبر السرير الا ان سوووون كان يتقلب تلك الليلة, ربما لأنه تقّل بالعشا,...

لا لا اعزائي المشاهدين...

وصلنا الآن انه كان يتقلب لأنه كان يفكر, كان يفكر بتيم كاونتر سترايك عند رامز,

يقول سوووون في قرارة نفسه: ايييييييييييييييه وينك يا ايام الصفا قبل العسكرية, كنا كل يوم الساعة 9.15 لاعب ؟؟؟ لاعب (راجع شريط الـ sms لمزيد من التفاصيل)....

وهون واثناء سووون ماعم يحاكي حالة, بيمد ايدة عالارض جمب التخت, وبتجي ايدو على البصطار يللي انشلف فيه الراوي قبل شوي...

سووووون: شو جابو لهون هاد ؟؟ وبيشلفو لا على التعيين...

وما بينسمع الا صوت: ايييييييييييييييييييييييي ييييييييييييع دججججججج ومن ثم جاعور احد العساكر: لك مين زت البصطار ؟؟؟؟؟ هااااااااااااااااااااع

انه صوت الرقيب ابو داغر (sml_4u) ....

س: انا زتيتو اخي شو صار يعني ؟؟
s: طيب شو رأيك ليحك هلأ كف افتحلك طاقة كونديشن بين سنانك ؟؟
س: بالله ؟؟ روح من خلئتي بلا ما اسلخك بقص (بوكس) بحترلك غراض وشك كلن...
s: طيب شو رأيك ناولك ضرب خليلك حنكك السفلي علوي والعلوي سفلي ؟؟؟
س: بركي بئدحك صواب بخليك تتنفس من ادنيك...
s: وانا برئعك ضرب بخلي لوح الكتف شيتك يصير لوح مدرسة..
س: وانا بـ.......

الشوق (مقاطعاً): قوموا اندفسوا انت وياه واجلوا مراجلكن لبكرة, اسمو خنائتكن كلا بعبة بـ بعبعة....

مالص: يجعل الدب ياكلك منك الو لسع هلأ خلصنا نوبة الحرس, بعدين سوووون بدك تضربو تهرلو سنانو قلتلي ؟؟ ما بتخاف يجي شوية دم علي ايدك ويغمى عليك

الجميع: هع هع هع هع هع
برررررررررررررررررررررررر ررررررررررررررررررررررررر ررررررررررر

وبعد هالمهاترات ناموا الشباب وصوت شخيرن وريحة جراباتن واصلة لعند قائد الكتيبة :S

المشهد التالي من :

المكان باب المهجع

الزمان : الساعه السادسة ونصف صباحاً

الراواي : الداعي ابو الرغب تلميذ رقيب جديد ملتحق بالدورة

المجموع : شباب المهجع المتكوكعين ببطانيات

من بعيد صوت الراوي (الداعي ر@غب): صباحو شباااااااااااب

العالم : خخخخخخخخخخخ ششششششششششش زعررررررررررررررررر هييييييييييييييييييف وووووووووووووووووو

ر@غب : شو شكلن نايمين لأتركن خطي بيكونو متقلين بالعشا

وين بدي زت غراضي شو مافي ولا سرير فاضي

ليك رح اخد زاوية متل ابو العز اللي كان يحكي عن امجادو وزبط اواعييي ودق هالعلييقة عالحيط وطبق تيابي
اووووووووووه هاد السرير عز الطلب ......... زيييييييييييييييييييييييي ييييح زييييييييييييييييق (صوت جرة السرير الهفتان) دججججججججججج (صوت الفرشة القش وقطن المعفنة ) وهي بطاناتي هون وهي مخدتي رح اسناولها من هنيك ........... والله لا يوفقك يا ابو غضب على جردة هالشعرات (وانا عمبتطلع بالمراية الي طلعتها لتوي من شنتتي )

ايه ما علينا .......... هيك بيكون كل شي جاهز ......... وبشلح تياب العسكرية الجديد اللي عميلئو من كتر مو عراض علي وبسناول هالشورت والتيشرت وبوط الرياضة والبشكير (آل شو بدي أعمل الرياضة الصباحية ) بروح بتمشى شوي ............

برجع ما بلاقي غير هالعالم متكومة جنب سريري ونازلين لعي مو مفهوم

ر@غب: شو شباب صحييييتو

سووووون : مين انته حبيب

ر@غب : انا ر@غب من حشيشستان الفوقا ........ وانته

سووووون : الداعي المعلم الساطور وبينادولي سووووون ......... فيك تقول زعيم المهجع (بجئرة)..........

والكل ساكت ....... معلوم هاد المعلم بالحساب .......... بس على مين

ر@غب : حبيب وين بالله الحمامات ........ شنو بدي اغسل شعراتي الله لا يوفقن جردوهن عالآخر

والكل : كه كه كه ... هع هع هع هع هع ههههههههههههههههههههه

سووووون : شكلك غر ولك أبني.......... عيب اتنته وياه لا حدا يضحك

وبيتابع ....... شايف خزان المي هنيك ....... بتروح عليه بتلاقيه خرطومة مدلاية وحواليه في جاموقة مي ........ بتطمس رجليك بالجاموقة حتى تستقر وبتفتح الخرطومة فوق راسك وبتعمل دوش عكيف كيفك

ر@غب : طيب والحمامات شنو ما نزلت من البولمان طول الطريييق

سوووون : شايف حوالي المهجع ......... بتركز على قرنة فاضية وبتساويها WTCHOOOOOL

ر@غب : ايوااااااااااااااااا قلتليييي

ششششششششششش ..

كوعي

كوعي

وينو


مالص : بعبعبعي ..

ابو السوم : لك شبكككككككككك ؟؟

آهااااااا

دقيقه لأتجلس..

مالص : كوعك كان ببلعي..

ابو السوم : اي اي هلأ فهمت عليك .. قبل شوي ماكنت عم اسمعك ..

مالص : لككك


وفجأة بيقاطعون صوووت قوي جاي من باب المهجع ..

واذ بيكون عسكري حامل الكلاشينكوف المهري ..

ومن حيط لحيط .. وعيونو باظات هيك :

و ..

ابو البيس : ياساااااااااااااايق الهجنننننننننننن ... اووووف اووووف ... ياااااااااااااااساااااااا ااااايق الهجننننننننن ..

ليش هيك كلكون عم تطلعو فيني ؟؟

يلا بسرعة عالاجتماع الصباحي انت ويااااااااااااااااااااااا ااااااه ..

فجأة شو ؟؟؟ يعني إلها حلقات إسا !!!!
بس لهلأ البداية كانت موفقة ... يللا سلام خيوم .. وخلينا نعرف شو صار بعدين

انا عندي مسنجر هلأ ..

آآآآآآآآآآآ قصدي يعني خلصت نوبتي ..

وياسايق الهججججججننننن ..


سوووون : ياحبيبي على هالصباح .. لك شو هاد.. مين حاطط غراضو تحتييييييييي

صوت بعيد : هنهنه نن ن نن هه نن نن ن باه ابه اباااا ه

سوووون : هادا انت لك ويزارد ؟؟ وانا كنت مفكر انك غراض شي حدا .. طلعت انت يلي عافس عليك ؟؟ طيب بحكي ..

ويزارد : انت التاني حدا بيتقلب وهو نايم..

سووون : اي هلأ عرفت ليش كنت عم اتقلب .. ليش مو نايم بمحلك انته ..


تايجر مادد رجليه وحاطط ايدو عكرشووو : اييييييييييييه .. لأنو هون محلو ..

ويزارد :

ابو داغر ... الرقيب (sml_4u) : ياشباب بدي احلق دقني ... دخيلكون اسعو فيني ..

ابو عذاب (الشوووق) : مشي حالك بهالموووس .. تاعاااااااا


رغوووب : لك ينعن هيك وهيك .. كنتو قلولي كنت جبت معي برنامج لموبايلي .. لك مافيه تغطية ..

ابو السوم : ع سيرة التغطية .. غطا بريق الشاي مين شافو ؟؟

الشباب : قول مين ماشافو

ابو السوم : أوف ليش ؟؟

مالص :مو امبارح عملتلنا حالك لاعب كرة قدم والله حيو .. وبلشت شوط بالبريق و ..

سووون : هي قبل الكوع ولا بعد الكوع ؟

حشيشة : لا هي بعد الكوع بمفرقين ..

الشباب : هع هع هع هع


والكل صار جاهز مشان الرياضه الصباحيه .. كل الوضع كان تمام التمام ..

و : أح تنين أح تنين أح تنين أح تنين ...

وبالطريق للساحة ..


ابو السوم : شريك .. شو مشان المخطط ؟؟ تبع صاحبنا هداك يلي برا والتاني الجديد ابو عود طري

سوووون : ايـــــــــــه .. لعيونك .. انا لاعب .. أنزلني أيها المدرب ..

بتعرف .. جاي عبالي لعبة كاونتر ..

ابو السوم : لك مابيكفي الخواريف يلي صارت امبارح ؟؟؟



حشيشة : أح تنين أح تنين .. سمعتو آخر خبر ياشباب أح تنين أح تنين ..

مالص : آآآآآآآآآآآ .. شو خبر ما خبر ؟؟ خبر رياضي ولا اقتصادي ..

رغوووب : لا نشرة جوية .. هيع هيع .. اخ


حشيشة : الفكره يا اعزائي انو سمعتلكون من مصدر خاص .. انو رح يطير قائد المعسكر ... ويجيبولنا قائد معسكر جديد ..

ابو داغر : لعما.. هيك ماعدنا نقدر نفيش متل أول ..

سووون : ودخلك حشيشة من وين جبتلنا مصادرك الخاصه ؟؟

ابو السوم : له ياحامض .. مصدرو لحشيشة وقف قدام المرايه وخاطب حالو .. هي بحالة اذا كان المصدر شب .. أما اذا كان عجوز فـ ..

حشيشة : بس ولا .. لعما شو انو

استاااااااااااااااااااااا ااااااااعععععععععععدددددد ددددد

استاااااااااااااااااااااا ااااااارححححححححح

أمااااااااااااااااااااااا ااااااااااااااااااااااااا اااام

ره



المشهد ليلي - داخلي

جوا المهجع

الراوي: ((حاطط أيده على أنفه من ريحة الجرابات والشنكليش اللي طالعه من اجساد واقدام هالعساكر))

يا سادة يا كرام وتستمر أيام الشباب أون لاين في العسكرية البربرية ...

كاميرا زوم إن على سرير الشوق .... الشوق يفيق من نومه مرعوب ... يتبسمل ويتعوذ من الشيطان ... يتناول بريق البلاستك أبو زلومة شيت اللي فيه شوي مي من يومين وعم يلعب جنبه جردون كبير. ويغب من هالمي على آثر الرعبة .... صحتين شوق ....على قلبك أب عزاب .....

ويطالع باكيت الشرق من تحت المخدة ويقعد بده يشعل سيكارة

sml ((اب داغر) من السرير اللي فوقه بقول له: ولك شو فيك يا عمي بهالوقت ؟؟
الشوق: سكوت يا ابو السيم .... كنت شايف منام مو كويس ... كابوس ..اتركني بهمي ...

sml: شو اتركك ما اتركك ... وحق الخالقك ماني مفارقك له يا ابو الشوق نحنا ولاد دورة

يستيقظ سوووون على صوت الشباب .. وعم فرك عينيه يقول لهم: والله انتو مثل البق ما بتنامو لا بتنيموا ....((صوت السرير يصرخ ويتألم تحت مطمطاط سوووون اللطيفة))

يقاطعه sml ويقول له : استهدي بالرحمن ولك خيي... رفيقك الشوق شايف منام ما كويس

سوووون: خير اللهم اجعله خير ...خير اب عزاب شو بيك؟؟
الشوق (اب عزاب): والله ما بو بلا ... طار النوم من عيوني والناموس شوا نعمتي شوي وهرا جسمي من القرص ...

ولك انا بعرف الناموس بالصيف مو بالشتوية ... يحرق حريش هالقطعة أي لا طير يطير ولا وحش يسير إلا البق والناموس
خيو شو رأيكن خوش اسمه ما بقي ساعتينلدرسة الرياضة الصباحي أنه نعمل لنا بريق مي سخنة وطالعوا لي علبة متة مالطا من الصندوق اللي تحت سرير مالص الفيش .... شنو أخوه مالص جاب له متات ظراف ليلة امس ... مالطا اصلية شغل الصين ... سوووون ..... جيب لي المصاصتين اللي بشنطة راغب ....قال شو هدول ذكرى من جده ؟؟؟مرحبا جدو !!!

ابو داغر (sml) وسوووون بيطلعوا ببعضهم وكل واحد يجيب الأغراض المطلوبة وبشيل بطانيته وبيطلعوا لبرا المهجع ليكفوا حديثهن .....

عبين ما يجيب الشوق المتة وبريق المي الصخنة

الشباب قعدوا خارج المهجع بدهم يدردشو ويقرقعوا متة .....

سوووون للشوق .... أي اب عزاب .... شو المنام اللي شفته

الشوق: انا يا شباب وقت كنت صغير كان يراودني حلم ...

ابو داغر: حلم؟؟؟ شو هوو دخلك؟

الشوق: بدي احكي واكل هو... إذا بتقاطعني مرة ثانية بالكلام مستعد اخبطك راسك بأخمص هالبادروة وروح بخطيتك على السجن ست شهور عرفي ها ....

سوووون: روقوا ولو ...لسه انت واياه مثل زينكو ورينكو ..قلي لقلك ما تربيتوا من آخر نزلة بالجاموقة أنت واياه وحلاقة الصفر وعقوبة الـ16 يوم اللي اجتكم هدية من الرائد !!

الشوق (يطالع سيكارة شرق تحرق قلب ابراهيم حرق) ويشعلها: ههههه عم امزح حبيب ... له يا ابو داغر معقولة اعمل شي معاك ... نحنا اخوة ولو .. يحرء حريشك شو كان منظرك حلو بالجاموقة

مثل الجردون بلا تشابيه يا ربي

اب داغر مقاطع: الواه الواه على شكلك انت .... منظرك بعد ما نشفو عليك بقايا الجاموقة بفطس من الضحك .... تقول شي لاعب بمنتخب الكاميرون .......

الشباب الثلاثة بيضحكوا ....

سوووون: الله يعطينا خير هالضحك ...آمين.. ولك خييي شوق والله نطفت لي قلبي هات منامك احكي بقا.

الشوق: اخت المنام ..... بالمختصر شفت حالي بالصف بالمدرسة الابتدائية تبعيتي . والآنسة عم تسألني: وانت يا شطور شو بدك تصير بس تكبر ((مين ما بيذكر هالسؤال المعت وقت كنا صغار)) ,, انا رديت عليها ببلاهة الطفولة وبراءتها:

بث أكبر يا آنثة بدي ثير عثكري وثيل البارودة مثان الناس تضرب لي تحية وثاوي واعمل .....الخ

والآنسة ترد عليي: برافو عليك يا شطور برافو عليك يا شطور ... هالمنام يا جماعة بعتبره كابوس وبشوفه كل يوم من وقت ما انشحططت عالجيش

انا وقت كنت صغير مثل ما قلت لكم (عأساس كبرنا)) كنت أحلم أنه صير بالمستقبل عسكري ضابط رقيب مساعد مولازم ... مو مشكلة المهم عسكري

وكنت أبني مشاريعي الصغير وشخوطاتي عالدفاتر على هالمشروع

بالمختصر بتدور الأيام وبتجي الأيام وبيجي اليوم اللي بستلم فيه دفتر التجنيد

وهون بطير السكرة وبتجي الفكرة ... كان بيومها في سحب لدورة اغرار بالتجنيد

وشفت حسن المعاملة اللي كانوا عم يتعاملوا فيه ..... وانا اللي شالني ما حطني

قعدت دور واسرح بطريقة اهرب فيها من هالورطة اللي ..... واللي يحب النبي يخلي

((الشباب ينزلوا منبطحاً بحكم العادة ))

(الراوي يرجع للحديث )هون وباللقطة بالزات بفيق العريف ابو السوم مدوخ الدبابات على همس الشباب وبيجي بقاطع الشباب بالحكي بصوته الحنون ((الجاعوري)) من جوا المهجع وهو يردد أغنيته المعهودة :

يا يوووووووووووم عضني الكلب ((وفي روابة اخرى الجلب )) و الدوا بنيابه ........ حبيبي راح عسكري والكلب وش جابه

الشباب من برا المهجع ....... الله علييك يا ابو السوم ... ينصر دينك .. والله العسكرية ما حلوة بلاك ..... جيب كاسة متة وكاسة وتعا قعود معنا لنشوف .....

الراوي يتنهد ..... يقول بصوت مع موسيقا ناي حزينة :

اييييييييييييييييه ................. حياة هالعساكر هالحلوين بسيطة بالعسكرية ..... وكل واحد منهم باقي له خدمة شي سنة وسبعة شهور ((لقطة على حيطان المهجع وكيف الشباب كاتبين عليها عدد الأيام بالجيش)) .... ولكن راح يظلوا يتذكروا أيامهم بالعسكرية


وهون بيطلع صوت زمور الاجتماع الصباحي وبتلاقي الشباب هبوا ليروحوا رياضتهم الصباحية ..... وبدرس الرياضة الصباحية أول ما بيتبصحوا بيتبصحوا بوش ......

المشهد : الصبح بالليل

الجو : شوب كتير .. ( يعني بنص اب )

الجمهور : ( شي ألفين عسكري بالثكنة )

التوقيت : ( الضهر بعد الغدا )

القصة وما فيها :

Wizard : الله حيو الشباب الطيبة .. تقلنا اليوم بالغدا صار بدها نومة طويلة

SooooN : الله حيو ويزارد والله .. شو نومة ما نومة .. قوم قوم لقلك نفتلنا فتة تركس ..

Wizard : شو تركس ما تركس .. الله يخليلي اياك .. بدي ناااااااام .. امبارح طول الليل ما نمت وعمك تايجر نازل شخير فوق راسي .. صرعني الله وكيلك ..
لك انو بدي اعرف بس .. امتى بدو تجيه نوبة حرس واخلص منو بقى ..
اخي انا بطلع حرس .. بس اخلص من سمفونيتو الليلة .:S

أبو السوم : لك دي قوم بقى ويزارد خلصنا بقى .. يعني دخان ما بتدخن ... وأركيلة ما بتاركل .. كمان تركس ما بتلعب ..

Wizard : لك حبيبي مو هيك القصة بس انا بدي نااااام .. والله جوعان
قصدي والله نعسان يا جماعة .. شه

An@s : ايه والله معك حق يا ويزارد .. ما خلصنا من الكاونتر .. قلنا خلصنا منها طلعولنا بموضة التركس

Wizard : الله حيو انوس .. احكي من الاول .. واخيرا اجا حدا يشد معنا هون ..

مالص : لك قوموا من فوق سريري .. ما لا قيتو تفتوها الا هون
قوم من هون انت واياه .... اغييي

Wizard : لك يا شباب هلق خلونا ننام شوي .. ترى بعد شوي ورانا شغل مرتب
يعني من هون للمسا بتهلكوا والله ..

سوون وأبو السوم فجأة : موافقييييييييين ( مع ضحكة شريرة )

وصار المهجع كلو هيك من عدا هدول الجوز

يا ترى شو هل شي يلي مخبينو أبو السوم وسوون سوا ...

معكم الراوي من قناة حشيشستان ....وانقل لكم وعلى الهواع مفاشرتاً

تغطية كاملة لمهجع أخوة التراب

(أخ ياراسي بس لو أعرف من هل++++ يلي شلف +++++)

اعزائي المقاتلين:رغم الأكواع المنهمرة على الأبلاع....ورغم الروائح المسيلة

للعقول .......وحمام السلام المنهمر على النوافيخ....(أضع يدي على راسي)

أنقل لكم هذا الحدث المهم من حيث النوعية .........

الأن اعزائي المشاهدين .......الوضع مكهرب لدرجة عشرين على مقياس شختر

والمعركة حامية الفطيس........كيف ولا.....أنها معركة حاسة ومصيرية



أبو السون يقوم بكل شجاعة بشلف ورقة الختيار الكبة......بِوجه شريكه


ويقول: يا أخو الهيك+++++وهيك++++++...؟

لك شو صرلك ، لك ماكنت تفهم عليي وأنا عم نبهك أنو الختيار معي....

لك الدب شتلق وأنت ماكنت تستوعب

ولي على بعضي.....ماعاد بدي ألعب......



ونتقل الكميرة....إلى ابو السوم وهو يحلق ذقنه

أبو السوم: مشان الله بدي أفهم شغلة وحدا بس....!؟؟

يعني ضروري تكون دقني عم تلمع.......كل يوم.....

لك دابت من كتر الحلاقة .......الله يأخذني لأرتاح بقى

(يحمل المراية ويشاهد الدم المتدفق من ذقنه المصابة بحبوب من كثر الحلاقة

ونوعيات الماكينات الرديئة.....)

ينقطع الأرسال......


وبمية الدهب .. كتبنا يا حلب ..

انتي فجر الدني وانتي ام الطرب ..


سوووون : لك ابو السوم انت وراغب مارح تخلصونا من هالغنيه بقى?

رغووب : له ياشريك له !!

سوووون : على عيني وراسي أخي شادي جميل وحلب .. بس صرعتونا يعني !!

ابو السووووم : لا تقول شادي جميل

دندووون : خليها خليها حبيب .. واذا حواليتكون شي سيدي ام بي ثري لشادي جميل هاتو مرقولي ياها .. ماني عرفان شو ساوي .. فتلت كل محلات الشام وماني حسنان لاقي شي سيدي ..

" دجججججججججججججججججج .. صوت دقة عالصدر من رغوب وسمسوم بنفس الوقت "

رغوب : ولا يهمك شريك بتوصلك ..


" وبهالاثنااااااااااااااااا ء .. بيدخل مجند على هالمهجع .. البدله تبعو بتعبي تلاته من أدو معو .. والسيداره على راسو مغطيه نص عينيه .. ونضارتو " يلي كانت نضارتو " مطعوجه .. وبيندفش دفش لجوا .. وبيندار لعند الحرس يلي كان معو وبيقلو "

AN@S : شوف .. اذا جينا حسبناها بالمنطق .. وبالقلم والورقه .. دفشتك هي كانت قوة مؤثره خارجيه .. ولولا لطف الله .. وقوة الاحتكاك تبعي بالأرض .. والـ ABS بلا صغره .. كان حصل شي لا انت ولا غيرك بيتوقعو .. بس أنا بتوقعو طبعاً .. بقى شوف يا سيد .. لو كـ..

" طبشششششش صوت طبقة الباب تبع المهجع ..


زيئ زيئ زيئ .. هاد الصوت يلي بيطلع بعد مابنطبش الباب

والعالم منو هاد ؟؟ .. وفي ناس عم تتضحك عالخفت .. والهدوء يعم المهجع .. وأنوس عم يدور على شي سرير يحط غراضو فيه .. وعم يمسح نضاراتو .. و .. "


= طب الختيار من ايدكككككككككك

ويزارد : لك ياعيني ياروحي .. لسا في معي كرت جنبو ماني مقطش .. ليش هيك انته !

سوووون : لك طبو من ايدك .. شفتك عم تغشغش .. سحبتو من تحت من اللطوش .. ححييييييييييييييييية من تحت التبن لك ويزارد

ابو ساكو : هلأ لاتعملي سحبتو وماسحبتو .. لا تقسم علينا .. انت وشريكك معروفين غشاشين .. بقى لا تطلع وتنزل وتطول وتقصر .. ايوااااااااا .. بطالع بيدونة المازوت هه

بروكن وينجز : سكوت انته ... بوووووووووم

" وبهالأثناء بيدخل العريف ابو البيسسسسسس .. وبيصرخ بالصوت العالي "

بيس : اجتمااااااااااععععععععععع ععععععععععععععع والكل يجي متل ماهو .. بالبدله بالشورت بالشيال بالشحاطه .. كلو متل ما انته بتجي .. بدنا ناخد تفقد مسائي ..


مالص : معليش أجي بتلات رباعي ؟




وهااااااااااااااااي خلصت القصة


مسحوبكم بدوي الجبل

شو عجبيتك يا
SABE

والله كيسة .. بس النهاية أنا ما فهمتها , حسيت حالي عمعيس جو معسكر التدريب الجامعي مرة تاني و أنا عمبقراها ..
مشكور أخ بدوي .. و كترلنا منهون هدول القصص ...
و ما قلتلي .. هاي انتي كاتبها ..

على راسي أخي sabe

شو تدريب جامعي ما تدريب جامعي

الله لا يزكرها ولا يعيدها

ترا دبحني ولا تاخدني على العسكرية لأأني بكرهاااااااااااااااااااااااااااااااااااااااااااااا ااااااا

وما قلتلي .. انت اللي كاتبها ؟

في الحقيقة سارقها

لكن مع بعض الخربشات الخاصة بي

بس والله .. ما بعرف شو بدي قلك

--

بس والله كيسي مووووووووو

و الله حلوة كتير أنا عجبتني هاي تبع بلعععععععع لما أجى الكوع ب بلعو

مشكور خيو و الله نهفة :ok: :ok: :ok: :ok:

بتعرف انو هاي اول مرة بقرأ شغلة وبضحك من كل قلبي عليها ....يازلمة طقوا خواصري من الضحك .:o :o :o :o .
..يسلمو كتير لأنك حطيتها ....
احلى الشي لما سوووون بيقعد ...عالاغراض ....قصدي على هداك المسكين ....:o :o

وهاي : بعد الكوع بمفرقين ....:ok: :ok:

مشكور حبيب ....اي وكترلنا منهن هدول ...يعني ايمت ماشفت شي قصة حلوة فورا حطها هون .....اوكي ؟؟

:D :D :D :D :D

أهلا بكم يا أخوان
بتكنى منكم أنكم تكونوا اتضحكتوا كتير

بلعععععععععععععععععع

على راشي الكل

يعني بجد برافو عليكك هههه بالتفصيل الممل ( العسكرية) هههههه

على راسي يا حبيب

UP :larg:

هههههههههههههه
حلو حلو .. بس طويله ضليت شي ستميت ساعه عم اقرا

" اجتني عقوبة سلخوني حراسة تبع الساعة أربعة الصبح "


اي بتذكرها هي وئت كنا بدورة الأغرار .. اي والله سلخوني :lol:

لك فرطت من الضحك :lol:

يسلمو :lol:

لازم تحطوها بالأدب الساخر



الله يرحم هاك الأيام ////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////