حابب أعرف رأيكون بالقضية اللبنانية بعد التطورات الحاصلة...جنبلاط وللا لحود و للا ميشيل عون...مين الرجل القوي فعليا بلبنان....علنيا حزب الله هي الميليشيا الوحيدة المسلحة, بس الله عليم شو في مخبى....شو لازم يكون الموقف السوري تجاه الأزمة الحاصلة
تحياتي :D

ولله أنا بلاقي أكبر غلط أنو تنسحب سوريا
لأنو كل هي القصة ملعوب واضح وغير قابل للنقاش
مخطط صهيوني أميركي بتنفيذ أيدي ((( لبنانية ))) بتحديد من أعضاء السلطة
وتهيئة لعودة عون ولاكن سورية مستحيل تسمح بهاد الشي
وجود سورية ضروري لحماية حدودا

ولله أنا بلاقي أكبر غلط أنو تنسحب سوريا
لأنو كل هي القصة ملعوب واضح وغير قابل للنقاش
مخطط صهيوني أميركي بتنفيذ أيدي ((( لبنانية ))) بتحديد من أعضاء السلطة
وتهيئة لعودة عون ولاكن سورية مستحيل تسمح بهاد الشي
وجود سورية ضروري لحماية حدودا
ليش ما فيها تحمي حدودا و هي جوات حدودا؟ لما لازم يقعدوا بلبنان و كمان يتحكموا بسماه؟

يعني هلق مسموح مثلا أميركا تحط جيوشا على الطرف السوري مشان تحمي العراق؟

أذا طلعت سورية من لبنان بتصير متل كتير دول عربية محط للطائرات الأمركية وأستراحت الجيوش وبتحيط بسورية من كل الجهات
وبعدها ما في داعي نحكي

و الله ما فهمت شو دخل طلعت الجيش السوري من لبنان بكون سوريا رح تصير محط للطيارات؟

يعني ما منقدر نحمي حدودنا من جوات أرضنا؟ لازم نتفردع على الدول المجاورة؟

قصدي لبنلن بتصير محط الطائرات

لو سوريا ما كان عندا مصلحة من كل هل الشغلة ما كانتدخلت لبنان اصلا وهلأبعد كل يلي عم يصير ما لازم تطلع ابدا

طيب؟
منقوم منحتل لبنان؟
يعني لبنان حاليا محط الجيش السوري
ليش ما بدك تصير محط الجيش الأميركي؟

من مبدأ الاحتلال ما تغير شي

بس شايف انك عم تحكي من منطلق شخصي جدا

من هل مبدأ مسموح لكل دولة تحتل كل دولة جنبها مشان ضمان الحدود و مشان ما تصير محط طائرات جماعة تانية

يعني لبنان مانو أرض حيادية يلي بيسبق بيقعد فيه

مزبوط انا لما قلت انو سوريا ما لازم تطلع من لبنان ماقصدت انو تحتلى بس تحمي الحدود السورية واللبنانية سوا .........
واذا عم تحكي عن الاحتلال فانا ضد هل الشي

أولى شي هاد مو أحتلال لأنو في معاهدة بطلب لبناني ولولا سورية ما كان بقى لبنان
تاني شي وجود سورية ومساعدة السلة اللبنانية ضروري بين ما يصير في سلطة لبنانية غير عميلة
ولا نسيان أنو 85بلمية من الضباط والرتب الكبيرة بلجيش اللبناني كانت عميلة لأسرائيل

طبعاً كلنا ضد الأحتلال ومن فترة سورية كانت عم تنزل عدد القوات السورية المتواجد في لبنان

هدا شي منيح لانو مو العدد الكبير او القليل الي بيغير الوضع ..........

معاهدة عمرا مدري أديش و حاليا الحكومة اللبنانية ما بتعبر عن الشعب بل هي معينة من قبل سوريا
و الشعب اللبناني بدو نطلع

و حزب الله و خلقنا جوات لبنان و سلحناه و كلشي مع انو مفروض يصير نزع أسلحة من كل الأطراف

شو ناطرين

ثم اي 85% من الجيش... هادا زمان و اصلا ما كان في جيش .. كلو مليشيات و كلها انترع منها السلاح

ما بيغير الوضع بس معناتو في تجاوب من السلطة السورية على مطالب الشعب اللبناني ولو بشيئ بسيط
وما فينو كمان الجيش يطلع هيك على الصبحانية

يعني نحنا عملنا حزب الله وحزب الله طلع أسرائيل من الجنوب وهوي حامي الحدود اللبنانية يعني أنجاز

هوي صاير تسكيت و تهدئة أوضاع اكتر منه تجاوب من مبدأ الاهتمام او الديمقراطية

و كم سنة يعني بدون لينسحبوا؟ ع راسي ما بيوم و ليلة (مع انو بيصير يعني جيوش تنسحب بسرعة)... بس شو مشان صرلون سنيييييين ؟

على راسي يا أخي صرلن سنين بس لبنان لسا معرضة بأي سانية لنكسة طائفية أو تدخل أسرائيلي

طيب بغض النظر عن خطأ وجود حزب الله من الاساس و برافو عليه طلع إسرائيل من الجنوب

ليش حتى هوي عم يحمي الحدود اللبنانية؟ ما زال نحنا ما شايفين انو عاملين شيء غلط ليش ما منحط الجيش السوري على الحدود مع اسرائيل.... لما منخاف؟؟؟ و خلص ما صار دور تنشال الاسلحة من إيد حزب الله و يتنحى و ينحط جيش لبناني محلو مشان يحمي حدودو؟

لاء مانو معرض لنكسة طائفية بما انو ما عاد في قوتين رئيسيات ... صار في قوة وحدة هي حزب الله و بالتالي ما في مجال يصير حرب طائفية

ثم نحنا منمشي على الاحتمالات؟ يعني مسألة اسرائيل يمكن ما تنحل بخمسين سنة... شو منضل حاطين الجيش بلبنان؟ و الله ما طبيعي يا جماعة... جيشنا لازم يطلع و خلص

مين قلك أنو ما عنا جيش على الحدود اللبنانية
وبس حزب الله طريقة للرد غير المباشر على أسرائيل

اي لاء ما بعتقد عندنا على الحدود... كل جيشنا بالبقاع و على الجبال و الجنرالات ببيروت ... شو بدنا بالحدود نحنا.. نحن بيهمنا تجارة الحشيش و التهريب و هادا كلو عن طريق بيروت و البقاع :wink:

يا حبيب هاي شغلة ما منختلف عليها
بس مافي تنفي وجود 3 مراصد سورية بلجنوب وردار رئيسي موجود على بعد 1200 متر من الحدود الأسرائلية

أنا رأيي أنو الجيش السوري لازم ينسحب من لبنان بأسرع وقت ممكن
لأنو مهمتو شبه منتهية
و بخصوص المخيمات الفلسطينية لوقتا بيلتقالها حلة
بس طبعاً الانسحاب لازم يكون بطلب من الشرعية اللبنانية و حكومتها و رئاستها و بتنسيق بين الجيشين السوري و اللبناني
و أكيد مو تلبية لمطالب القردين و دب يلي مسمين حالون معارضة
و يلي لأنو ما كان إلون دور بتحرير الجنوب من إسرائيل و لما شافو سورية بلشت تنسحب من لبنان
و حسو أنو الوضع العالمي حاطط سورية بموقف حرج بلشو يعملولي حالون وطنيين و بدون يقنعو العالم أنون هنن مع (لبنان حر مستقل) و هنن يلي رح يجيبو الاستقلال إلو

ههههههههه يعني يلعن ابو السياسة
انا كنت قول طول عمري انو مافي داعي لبقاء الجيش السوري في لبنان بعد ما هديت الأمور...و خاصة انو وصل لبنان لمرحلة متقدمة من الاستقرار الامني و الاقتصادي و اعادة الاعمار و التنسيق السياسي مع سوريا .

بس هلق بقول لاء ....و لسبب بسيط انو اذا بدو ينسحب الجيش السوري من لبنان هلق رح يكون انسحب تحت الضغط ...يعني بعبارة أخرى ( خرج رغماً عنه ) و هاد الشي انا كسوري ما بقبلو ...من منطلق عشائرية اذا بدكن.. يعني بعد اكتر من ربع قرن على الارض اللبنانية ما حلوة منوب انو يطلع الجيش السوري نتيجة ضغوط....و خاصة اذا كانت الضغوط امريكية ...يعني من نفس الجهة اللي وافقت وساندت دخول القوات السورية لبنان

يعني اذا الاميركان او اللبنايني او يعض منهم مفكر انو بيقدر يلعب لعبة تعو فوتو هلق بدنا منكن شغلة ...و طلعو هلق لأنو خلصنا منكن ...بكونو غلطانين ...غلطانين كتير كمان .
متل ما كانت سوريا طرف صاحب قرار و ارادة بدخول الجيش السوري ..لازم تكون طرف صاحب قرار وارادة بخروج الجيش. نقطة انتهى

أنا رأيي أنو الجيش السوري لازم ينسحب من لبنان بأسرع وقت ممكن
لأنو مهمتو شبه منتهية
و بخصوص المخيمات الفلسطينية لوقتا بيلتقالها حلة
بس طبعاً الانسحاب لازم يكون بطلب من الشرعية اللبنانية و حكومتها و رئاستها و بتنسيق بين الجيشين السوري و اللبناني
و أكيد مو تلبية لمطالب القردين و دب يلي مسمين حالون معارضة
و يلي لأنو ما كان إلون دور بتحرير الجنوب من إسرائيل و لما شافو سورية بلشت تنسحب من لبنان
و حسو أنو الوضع العالمي حاطط سورية بموقف حرج بلشو يعملولي حالون وطنيين و بدون يقنعو العالم أنون هنن مع (لبنان حر مستقل) و هنن يلي رح يجيبو الاستقلال إلو

طبعا لازم ينسحب و مو بس لازم اصلا مضطر ينسحب يعني خلص ما عاد في مجال

بس يعني أول شي أهلين شرعية لبنانية! ما في شرعية لبنانية و لا حكومة و لا رئاسة ... الحكومة اللبنانية معينة من قبل الحكومة السورية... بقى يعني هني شي واحد إلا اذا بدكون يانا نحكي مع حالنا؟

ثم ليش حتى ما نسمع للمعارضة؟ ليش هيك عم نحقر دور و أهمية المعارضة... المعارضة تقيلة و قديمة و طبعا اذا في معارضة منسمع للمعارضة

شباب ما بعتقد نحنا بموقف بيسمحلنا و يعطينا الحق نقيم معارضة حدى و حق أي شعب انو يعارض وجود أجنبي ببلاده... يعني عن جد ما عم افهم انت نفسك يا أخي الاستاذ أكتر واحد بيقول انو المقاومة مشروعة للناس... عجب بس على الللبنانيين ما عم نرضى نعطيهم هل حق

ما حاجتنا مسخرة و نهب و نصب و سرقة.... لك معقول يا جماعة لكن عدلنا الدستور الللبناني مشان حضرة السيد إيميل لحود.... يعني ما كان فينا نجيب رئيس موراني تاني يكون عميل.... ضروري نغير الدستور اللبناني... يعني هاي مثلا حركة غبية و حقيرة جدا

ههههههههه يعني يلعن ابو السياسة
انا كنت قول طول عمري انو مافي داعي لبقاء الجيش السوري في لبنان بعد ما هديت الأمور...و خاصة انو وصل لبنان لمرحلة متقدمة من الاستقرار الامني و الاقتصادي و اعادة الاعمار و التنسيق السياسي مع سوريا .

بس هلق بقول لاء ....و لسبب بسيط انو اذا بدو ينسحب الجيش السوري من لبنان هلق رح يكون انسحب تحت الضغط ...يعني بعبارة أخرى ( خرج رغماً عنه ) و هاد الشي انا كسوري ما بقبلو ...من منطلق عشائرية اذا بدكن.. يعني بعد اكتر من ربع قرن على الارض اللبنانية ما حلوة منوب انو يطلع الجيش السوري نتيجة ضغوط....و خاصة اذا كانت الضغوط امريكية ...يعني من نفس الجهة اللي وافقت وساندت دخول القوات السورية لبنان

يعني اذا الاميركان او اللبنايني او يعض منهم مفكر انو بيقدر يلعب لعبة تعو فوتو هلق بدنا منكن شغلة ...و طلعو هلق لأنو خلصنا منكن ...بكونو غلطانين ...غلطانين كتير كمان .
متل ما كانت سوريا طرف صاحب قرار و ارادة بدخول الجيش السوري ..لازم تكون طرف صاحب قرار وارادة بخروج الجيش. نقطة انتهى

لا و الله لا زلمة ما بوافق معك
يعني الشغلة مو شغلة جكر و تيبيس راس
خلص صار وقت الطلعة
كفاية يلي صار و التخبيص يلي عم يصير
سمعت كمان انا من خالي انو قبل بفترة قصيرة كان في تحفير بالمنطقة و القنبلة يمكن تكون مزروعة تحت الارض... خصوصي من شكل الحفرة و انو النار طالعة من تحت لفوق... يعني يلي فوت كل هل متفجرات لجوا طرف مستحكم منيح و قدران يتنقل بحرية... خصوصي انو العملية بنص المدينة
بقى وارد تكون سوريا او وارد تكون طرف تاني من جوات المخابرات
و ما دخل اذا واحد كان صاحب قرار بالدخول يكون صاحب قرار بالطلعة.... بنوووب ما دخل. كل واحد بيدخل ع محل أكيد بقرارو... بس يمكن يلبص و يخرب... و وقتها لازم يطلع. يعني هلق مثلا اميركا كمان لازم تطلع بقرارها من العراق بما انو دخلت بقرارها؟ و ألمانيا كانت لازم تطلع لحالها بما انو دخلت لحالها على فرنسا؟

يا جماعة شو بدنا نحكي لنحكي

خليك معي وفهام علي
لبنان بهل الوقت بأمس الحاجة لسورية لأنو يلي شايفو أنت أستقرار هاد
يسما الهدوء الذي يسبق العاصفة وأذا متابع الأخبار السياسية بلبنان بتلاحظ أنو
في أعادة تشكيل للكتائب ولي مسميون معارضة هني عبارة عن مناصري الكتائب
خيو رح كون معك وألك أنو لازم يطلع الجيش السوري
عتبرو طلع شو بدو يصير ؟
1- تغير الرئيس الحالي
2- عودة عون من المنفى ليستلم مركز من مراكز السلطة
3- وأعادة تشكيل الكتائب الذي سيتم بمدة 6أيام كحد أقصى مع السلاح الأميركي وأسرائيلي الأصل
4- نزع السلاح من حزب الله وحدوث نزاعات مسلح
5- أستعانت السلطة الجديدة بالقوات الأمركية لتهدئة الوضع ونزع السلاح من المقاومة
شو بتحس أنت غير هيك أنو شو بدو يصير هات لنشوف هاد الواقع المدروس والمحتم .

اسمحولي أتفلسف عليكون شوي و اكتب رأيي بشو لازم يصير مشان هالأزمة تمضي على خير :
1- أخراج الجيش السوري جنودا و ضباطا فورا خارج المدن و خصوصا بيروت...الكل عالبقاع فقط...
2- أبقاء حزب الله خارج الحرب الديالكتيكية لأطول فترة ممكنة.
3-أقناع أميل لحود و كرامي بالاستقالة فورا و حل المجلس النيابي الحالي
4-تشكيل حكومة وحدة وطنية ممثلة بكل الطوائف و التيارات الموجودة ( يفضل حزب الله برا...)
5-اقناع ميشيل عون بالعودة الى لبنان ولو بزيارة ( هالشي ممكن يهدي المشاعر كتير)
6-مافي مانع أنو وفد سوري يزور نصر الله صفير ولو زيارة مجاملة...هالزلمة كتير مؤثر بالسياسة اللبنانية

وعلى فكرة....لا تاخدو بجد حكي وليد جنبلاط كتير...ولا تستغربو أنو بعد شهر يجي زيارة عالشام متل أبو الشباب...ماهادا كان السيستيم تبع أبوه...وفرخ البط عوام :wink:

والله يا أبو مارل ما خليت شي ينحكا يعني مراسلنا في اسبانيا أبو مارل والمحلل السياسي الأقوى .. :D :D

والله يا أبو مارل ما خليت شي ينحكا يعني مراسلنا في اسبانيا أبو مارل والمحلل السياسي الأقوى .. :D :D
على عيني شريك :D :D

بس يعني أول شي أهلين شرعية لبنانية! ما في شرعية لبنانية و لا حكومة و لا رئاسة

خيو شوف
يلي بيعطي الشرعية هووي شو مو الشعب
طيب و مين بمثل الشعب مو البرلمان
طيب
بلبنان الأكترية بمجلس النواب مع الحكومة و مع الرئاسة
يمكن تقلي أنو الانتخابات اللبنانية مزورة
إذا هيك هدول ال29 نايب يلي كانو ضد الحكومة و التمديد مالون شرعية و بالتالي رأيون ما بمثل الشعب اللبناني
و على فرض أنو المجلس النيابي ما بمثل الشعب و مالو شرعية
منوين بتجي الشرعية :?: مو من الأكترية من الشعب
كمان تعى نتطلع على الشعب
بالنسبة للشعب اللبناني يلي مع سورية و مع اميل لحود و مع الحكومة هنن كالتالي
الشيعة ممثلين بحزب الله و حركة أمل يلي بشكلو تلت الشعب البناني يعني قول 30%
الشمال اللبناني السني ممثلاً بعمر كرامة و المسيحي الممثل بسليمان فرنجة و أنصارون ويلي فينا نقدر يلي بيتبعو مواقفون بحوالي ال 15% على أقل تقدير
الأحزاب السياسية متل الحزب السوري القومي و حزب البعث و حركة الشعب و حزب الكتائب يلي فينا نقول أنو أنصارون ما رح يكونو أقل من 10 ل 15% من البنانيين
إضافة لهيك في في كتير سياسيين و نواب لبنانيين مستقلين و ألون قاعدة شعبية متضامنين مع سورية و ضد موقف المعارضة السفيه
يعني بنظرة إجمالية فينا نقول أنو مجموع هدول بشكلو على الغالب 60% من الشعب البناني و هيك بعتقد أنون طالما أكثرية فينون يعطو الشرعية لمين ما بدون
إضافة لهيك جماعة الحريري يعني كتلة قرار بيروت و تيار المستقبل يلي يمكن بتشكل قاعدتون الشعبية حوالي حوالي ال20% أنا متأكد بكرا بعد جمعة أو تنتين لما تهدا الأجواء و ترجع الناس لعقلا رح يرجع موقفون يصب بمصلحة السوريين و بكرا بتشوفو
بقا الباقين يلي هنن حوالي ال20% بيتشكلو من القوات البنانية المحظورة
و عائلة جميل و أتباعون المجرمين يلي واصل الدم لكواعون
و وليد (بك) جمبلاط وريث الخط السياسي الحربي يلي طلب من الأسد تأخير دخول الجيش السوري لمدة أسبوع لحتى يكون قضى على الفئتين السابقتين و باقي الموارنة بالجبل
و جماعة ميشيل عون يلي حول الجيش البناني بالتمانينات لمليشة بتقاتل كرمالو
و ما بعتقد أنو لا شعبيتون و لا تاريخون بيعطيون أي شرعية :wink:
يعني مو كلشي بينقال لازم يتصدق
مو إذا جمبلاط قال أنو الحكومة مالها شرعية و جهعات داخلية و خارجية معادية روجت لهاد الشي رح يصير حقيقة

بالمناسبة مشاركة الأخ ياس كتير مقنعة
بس بالمناسبة مافي جيش سوري ببيروت

بس بالمناسبة مافي جيش سوري ببيروت


صح كلامك...بس أنا قصدي مثلا الضابط السوري اللي يروح يتغدى ببيروت هوي و صحابو و آخدلي معاه مرافقة طويلة عريضة وحركات فاضية....هالشغلات ممكن تستفز المشاعر أكتر من وجود الجيش بشكل نظامي..

بكل بساطة وجود جيش دولة بدولة أخرى غلطة كبيرة

سمعتو عن جد في فكرة انسحاب من لبنان ومبارح بلليل سمعت فيا
اذا طلعت سوريا من لبنان يا ترى شو بدو يصير الله يستر :( :( :(

سوريا تنسحب للبقاع وتحذر من مواصلة استفزازها



أكد وزير الدفاع اللبناني أن القوات السورية ستبدأ خلال الساعات المقبلة إعادة انتشار تنتقل بموجبها إلى منطقة البقاع شرق البلاد.

وأشار عبد الرحيم مراد إلى أن قرار انسحاب القوات السورية البالغ عددها 14 ألف جندي إلى البقاع جاء بعد مباحثات بين القيادتين السورية واللبنانية حول سادس عملية إعادة انتشار لهذه القوات في لبنان.

من جانبه حذر رئيس الوزراء اللبناني عمر كرامي من أن الانسحاب السوري الفوري من لبنان كما تطالب الولايات المتحدة وفرنسا سيؤدي إلى هز استقرار البلاد.

وشدد على أن إخراج سوريا من لبنان "بالتحدي والاستفزاز والشتائم، لا يتيح للبلد أن يرتاح أو يستقر" مشيرا إلى أن النفوذ السوري في لبنان يتجاوز حجم وجودها العسكري.

وقال كرامي إن النفوذ السوري في لبنان يتأتى من خلال التداخل في كل الحقول مع سوريا منها الدينية والسياسية والقومية والوطنية والاقتصادية.

وتأتي تلك التصريحات بعد بيان للخارجية السورية أعلن فيه عن عزم دمشق سحب جزء من قواتها الموجودة في لبنان بناء على اتفاق الطائف.

وجاء في البيان الذي تلاه وليد المعلم نائب وزير الخارجية السوري أن جميع الانسحابات التي ستتم بالمستقبل ستكون ضمن إطار اتفاق الطائف، موضحا أن تسريع وتيرة الانسحابات من لبنان يتطلب تمكين قوات الجيش اللبناني والأمن الداخلي من سد الفراغ الذي يمكن أن يحصل.

وأكد المعلم حرص بلاده الشديد على التعاون مع مبعوث الأمين العام للأمم المتحدة المكلف بالتحقيق في اغتيال الحريري. غير أنه حذر من أن استمرار التحريض ضد سوريا سواء من أطراف من داخل لبنان أو من خارجه سيؤدي إلى حدوث تطورات سلبية "تلحق الضرر بمصالح جميع الأطراف المعنية وخصوصا الطرف اللبناني".
-----------------------------------------------------------------------------------
هاي أول خطوة بالاتجاه الصحيح...

اشناء الله يكون هالحكي صحيح .. يعني بلكي الوضع بيبرد شوي ... وبتبرد قلوبنا ..