بثت إذاعة «صوت فلسطين» وإذاعة الجيش الإسرائيلي أمس في الوقت نفسه أغنية حب بالعبرية والعربية يغنيها مغنيان فلسطيني وإسرائيلي.. في وقت أعلن فيه عن هروب مجندة إسرائيلية مع عشيقها الفلسطيني.وقال المطربان والملحنان وسام مراد وديفيد بروزا إن أغنية «في قلبي» تهدف إلى التعبير عن التعايش بين الشعبين الفلسطيني والإسرائيلي.

وفي إشارة إلى التعايش السلمي مع الفلسطينيين قال بروزا بعد إذاعة الأغنية «عندما كان عمري 16 عاما قال لي جدي.. عليك أن تحلم به وتعمل من أجله وسيأتي».وعن الأغنية قال المستشار الإعلامي للمغني الإسرائيلي ان آمال السلام الجديدة شجعت كلا من المطربين على المخاطرة بمواجهة جدل يتعلق بقضية المصالحة. وتراجعت المواجهات بشدة منذ الهدنة التي توصل إليها الطرفان الفلسطيني والإسرائيلي في قمة شرم الشيخ الشهر الماضي.

وتحدث مذيع من إذاعة الجيش ورئيس هيئة الإذاعة الفلسطينية في كل من المحطتين الإذاعيتين معبرين عن آمالهما بحلول عهد جديد للسلام.. لكنهما تبادلا أولا عبر الأثير كلمات مقتضبة بالإنجليزية يتظاهران فيها بالتشاحن. وبادر رازي باركاي المذيع بإذاعة الجيش بسؤال رضوان أبو عياش مدير هيئة الإذاعة الفلسطينية «هل توقفتم يا سيدي عن بث رسائل التحريض في قنواتكم..». وجاء الرد «لم نبدأ أصلاً في إذاعتها».

وفي السياق ذاته، أعلنت الناطقة باسم الشرطة الإسرائيلية ان مجندة شابة تبلغ 18 عاماً تتحدر من مدينة كريات مالاشي (جنوب تل أبيب) هربت مع عشيقها الفلسطيني إلى إحدى ضواحي بيت لحم (الضفة الغربية) بعدما كان يظن والدها انها خطفت.

(الوكالات)

:confo: :confo:
كلش شي بيصير بهل الدنيا
هلا ما بئيان غير نعرف راي باي الاعضاء و خاصة من يللي بيكتبو بالمنبر

انا راي هي شغلة منيحا لانو شعب اي دولة رايو الخاص وهو شو بدو مختلف كتير عن راي الدولة وشو بدا
وبهل طريقة ادرو يعبرو عن هن شو بدن :pos:

أنا ماني ضد التعايش السلمي كفكرة عامة .. بس بوضع متل وضع الشقيقة فلسطين ... فالتعايش السلمي بين الفلسطينيين والصهاينة يعني نسيان الأرض .. وهادا مرفوض ..

ما الأرض عم ترجع يا عاشق.... شوي شوي بس. الاسرائيليين عم ينسحبوا من المستوطنات
و بالنهاية نحن كيف بدنا نطالب بأرض و نحن دول ما إلها اي وزن و قيمة
لو كنا دول قوية يمكن نقول مفروض ما نتنازل و لا شوي عن شقفة أرض
بس بوضعنا الحالي ما حدا مضطر يعطينا أرض
و لو بدنا ننتظر لنصير دول قوية... يعني أبو أربعين خمسين سنة... هادا وقت طويل جدا و ما معقول نتوقع ان الفلسطينيين رح يضلوا رضيانين بالحرب كل هل وقت... هني كمان بدون سلام و اكتر ما نحنا بدنا

بالعكس انا بشوف هاي الخطوة حلوة كتير

شباب يعني الأرض شو قيمتها... الحدود كلها شو قيمتها

بس يصير سلام و بس تنفتح الحريات و يصير في شركات و مصالح سورية بإسرائيل و شركات و مصالح اسرائيلية بسوريا... خلص ما بقى حدا يعرف حدود و أرض

أكيد صعب كتير نفكر بهل طريقة هلأ.... بس هادا يلي رح يصير بالمستقبل... نحنا شعب مخه تجاري و بيحب السلام و المصاري... الشيء يلي رح يوحد هل أرض و يعمل سلام رح يكون التكامل الاقتصادي الضروري جدا... و وقتها يعني لو مثلا طالبنا بمياه من نهر الأردن مفكرين اسرائيل بترفض؟ طبعا لاء

يعني شو قيمة الجولان لحالها إلنا نحن كشعب سوري؟؟ كل الأرض السورية غير مستغلة و منهوبة و مريضة... شو رح نعمل بقطعة أرض زيادة و لا ناقص بينما كل وضعنا السياسي و الاجتماعي و الاقتصادي تعبان

الأولى يتم تصليح الوضع الداخلي, عقد سلام و تحالفت مع الدول المجاورة بدون استثناء, و وقتها كل الاوضاع بتتحسن تلقائيا

يعني اذا فينا ناخد الجولان... ما منقول لاء طبعا خير و بركة... بس السلام اهم

لو بدنا ننتظر لنصير دول قوية... يعني أبو أربعين خمسين سنة... هادا وقت طويل جدا و ما معقول نتوقع ان الفلسطينيين رح يضلوا رضيانين بالحرب كل هل وقت... هني كمان بدون سلام و اكتر ما نحنا بدنا

كلام مانو دقيق .. اللي بدو سلام من الفلسطينيين سلم من زمان .. اما البقية اللي كل يوم عم يموتو ماحدا بدو سلام .. لك هي أرض لك جوي لك أرض وطن .. يعني أنت لو كنت محلهون كنت بتعمل سلام .. :cry:


بالنهاية نحن كيف بدنا نطالب بأرض و نحن دول ما إلها اي وزن و قيمة

وطول مانحنا محجمين انفسنا .. وحاسين حالنا ولا شي ... بعمرنا مرح نصير .. لك نحنا نزرع فينا شعور الهزيمة .. وللأسف عم نتعايش معو بكل عفوية .. يعني صار لازم نلمس على راسنا .. ونشوف وين صرنا .. لك نحنا كبار بأنفسنا وصغار بأنفسنا ..يعني شعور الهزيمة هوي اللي مخلينا نحس أنفسنا صغر ..


بالعكس انا بشوف هاي الخطوة حلوة كتير

شباب يعني الأرض شو قيمتها... الحدود كلها شو قيمتها

والوطن كلو شو قيمتو والشعب كلو شو قيمتو .. والكرامة كلها شو قيمتها .. ما توقعت منكم هالحكي يا جوي .. عنجد صدمتني .. يعني أنت بتقول انا سوري .. شو يعني سوري .. ومن وين أجا اسمك سوري .. لأنك خلقت بزمبابوي مثلا" وقررت تصير سوري لما لأنك أجيت من رحم هالأرض اللي مأمنت الكرامة .. ممكن عم ننذل كتير من المسؤولين .. ونحنا رافضين هالشي وعم نحاول نغيرو .. بس بيضل أفضل من استعمار أجنبي .. وأنت مفكر اذا سكتت عن الجولان .. رح يصير سلام وتصير أنت واسرائيل أخوات .. اسرائل بتشتغل بالمبدأ اللي كان المفروض نحنا نشتغل فيه من 1948 واللي هوي خذ وطالب .. يعني بتاخد أرض وبتنسيك ياها .. وبتحاول تاخد غيرها .. فأنت بترجع بتتنازل حتى تعمل سلام وهيك حتى تنقرض .. الحل الوحيد في وجه اسرائيل ماحدا عرفوا غير الفلسطينيين .. الصمود والحجر ..


بس يصير سلام و بس تنفتح الحريات و يصير في شركات و مصالح سورية بإسرائيل و شركات و مصالح اسرائيلية بسوريا... خلص ما بقى حدا يعرف حدود و أرض

حدودك يا اسرائيل من الفرات الى النيل .. بتمنى ما تنسى هالشي .. ولا تقلي اسرائيل منفتحة وهادا كلو حكي .. اليهود سلفيين أكتر من العرب على ألف مرة .. وماراح يرتاحلهون بال حتى ياخدو من الفرات الى النيل ..


أكيد صعب كتير نفكر بهل طريقة هلأ.... بس هادا يلي رح يصير بالمستقبل... نحنا شعب مخه تجاري و بيحب السلام و المصاري... الشيء يلي رح يوحد هل أرض و يعمل سلام رح يكون التكامل الاقتصادي الضروري جدا... و وقتها يعني لو مثلا طالبنا بمياه من نهر الأردن مفكرين اسرائيل بترفض؟ طبعا لاء

وا آسفاااااااااااااااه .. عنجد صعقتني .. ليك أنت شعب بتحب السلام والمصاري .. وأنت وأمثالك اسمكون اعادء الداخل .. متلك متل المسؤولين تجار وطنية ... (بتمنى ما تزعل مني جوي لأنو عنجد صدمتني كتير ) :cry: :cry:


يعني شو قيمة الجولان لحالها إلنا نحن كشعب سوري؟؟ كل الأرض السورية غير مستغلة و منهوبة و مريضة... شو رح نعمل بقطعة أرض زيادة و لا ناقص بينما كل وضعنا السياسي و الاجتماعي و الاقتصادي تعبان

لا تنحني أبدا" مهما كانت الضرورة تتطلب ذلك .. لأنك لن تستطيع الوقوف ثانية مهما تطلبت الضرورة ..

اللي نسي الجولان بكرا بينسى غيرها .. يعني الأمر مبدأي بحت .. يعني هي سياسة اسرائيل . بتاخد وبتنسيك .. وبتخليك تتعايش بشكل طبيعي مع فكرة أنو في أرض رايحة .. وبس تنساها تمام .. بتاخد غيرها .. وبترجع بتنسيك... وهكذا حتى ترى نفسك خارج التاريخ ..


الأولى يتم تصليح الوضع الداخلي, عقد سلام و تحالفت مع الدول المجاورة بدون استثناء, و وقتها كل الاوضاع بتتحسن تلقائيا

ليش دائما" تفكيرنا . أنو اذا اشتغلت بالداخل .. ما عاد في داعي تشتغل بالخارج لأنو الوضع بيتحسن تلقائيا" أو بالعكس .. الداخل والخارج كل واحد على حدا ظروفو ووسائلو .. وطريقة التعامل معو (بالرغم من عدم انفصالهون عن بعض ) يعني وحدة متكاملة .. بوسائل مختلفة .. على زمن حافظ الأسد كان مفكر يشتغل بالخارج ونسي الداخل .. وحتى بالخارج باع الجولان وباع سوريا وقبض الثمن الكرسي .. وهلا الدكتور بشار عم يفكر يشتغل بالداخل وينسى الخارج .. وبهالحالة منصير هشين خارجيا" .. الداخل القوي لا يصنع خارج قوي .. والخارج القوي لا يصنع داخل قوي .. ولكن الداخل القوي ..و الخارج القوي .. يصنع وطن قوي وحقيقي..

ولا تواخذنا جوي .. وبتمنى أنو الحكي اللي حكيتو انت يكون بلحظة يأس أو لا وعي .. لأنو اذا ماكان هيك فهوي مصيبة .. :cry: :cry:

יالصراحة يا جماعة ما في احلى من السلام وممكن انو تكون هالخطوة مشجعة
وانشالله كل ارض محتلة ترجع وتنبض بأهلها وما تنزل ولا دمعة من اي ام في العالم على شهيد اخر بعد

مرحبا عاشق
انا هلا ما رح علق على الكلام يلي قلته عني اني من أعداء الداخل .. يعني هادا الكلام الشخصي رح طنشه و نحكي بالموضوع فورا. و بتمنى ما توقع بالغلط يلي انت نفسك بتنتقده دابما في كلام أبواق السلطة و يلي بيكون هوي فورا نعت الطرف الثاني بالعمالة و انه عدو الداخل... !!

بدك تصبر معي شوي الله يخليك لاني يمكن احكي كتير حول هل موضوع و انا حابب من زمان احكي فيه و بركي حدا من المشرفين الحبابين بياخده على المنبر الحر


للي بدو سلام من الفلسطينيين سلم من زمان .. اما البقية اللي كل يوم عم يموتو ماحدا بدو سلام ..

اي صح كتير من العرب و الفلسطينيين "استسلموا" من زمان و باعوا الأرض بالرخيص و تركوها. و بوقتها هادا العمل كان يعد جريمة كبيرة و لسا هل شيء عم يحصل. انا ماني عم احكي عن هادا النوع من السلام و الاستسلام. انت شو مفكر بيسطر على فكر الشب الفلسطيني النمطي؟ او الرجل الفقير يلي عنده عيلة؟ أنت مفكر انهم عم يحلموا كل نهار بتحرير الأرض؟ لما بتوفير لقمة الخبز و العمل؟ شو بتقول لشعب عايش بحالة مزرية من الفوضى و الفقر و التخلف... و حالة من انعدام الأمن و السلطة... و حيث ميليشيات متل حماس هيي الاول بالأول و نظامها تعسفي جدا. أنت بتعرف مثلا كم شباب فلسطينيين بيموتوا على ايدي حماس لمجرد الشك أنهم عم يتعاملوا مع اسرائيل بشي طريقة ما؟ لاول مرة بتاريخ حماس قامت الحركة بدفع مبلغ مالي لعائلة واحد من هدول الضحايا يلي مات بالغلط و أهله ما كانوا عرفانين كيف مات و كان بريء
عزيزي بظرف متل ظرف الشعب الفلسطيني... انا صعب جدا اقتنع انو الشعب الفلسطيني همه الاساسي "التحرير"... هادا يا مان بقلك ياها انو كلام صحف و كلام حكومات عربية... عم تحاول قدر الامكان تعليق القضية الفلسطينية إلى أجل غير مسمى من أجل عدم توطين الفلسطينيين بأي شكل من الأشكال... و من أجل السيطرة على الداخل بحجة الحرب. بس طبعا هل شيء بلش يفرط. مصر تقريبا فرطت من هل ناحية و رجع السفير المصري و الشعب المصري ما عاد يتحمل وضع حكومة حسني مبارك
منرجع للشعب الفلسطيني... الشعب الفلسطيني محاصر من كل الجهات. السلطة الفلسطينية و المليشيات عم تسرق المساعدات العربية و الدولية... عم تفرض حالة من الفوضى و انعدام المرجعية ... مان ما تقنعني انو في شعب بالعالم بيحب يعيش بدولة محكومة من ميليشيات و عساكر
و من الجهة التانية طبعا في اسرائيل.. في الجدار الفاصل يلي عم يجعل ذهاب الفلسطيني للعمل صعب جدا. و كمان الحواجز و النساء يلي عم تخلف على الحواجز و تموت هيي او الطفل. وضع مأساوي يا رجل... بس المشكلة الواحد ما بيقدر يتحلفظ حول هيك قصص هون... لانو ببساطة الإسرائيلي فورا فورا بيجبلك سيرة التفجيرات الانتحارية! و المشكلة معه حق يعني ما فيك تقله ما حقك يا اسرائيلي تحمي نفسك بحواجز و الفلسطينيين من حوليك نازلين تفجير بأنفسهم شي بباص و شي بمطعم و مدري وين
القصة انو في انتهاكات شديدة و اوضاع مزرية جدا عم يعيشها شعب كامل... و الوضع رح يضل هيك و الناس رح تستمر تولد و تعيش و تموت بهادا الجو المريض الغير عادل ما دام فيه حرب.
و نحنا يا أخي ما بدنا حرب... و ببصملك بالعشرة انو الشعب الفلسطيني كمان ما بدو حرب... و بده سلام...

انت هلأ عم تحكي هل خكي لانك قاعد ببيتك بالشام و هلأن بتقوم بتعملك كاسة شاي و فيك تتنقل بدولتك وين ما بدك... بينما كون انت محل شب فلسطيني عايش بالضفة مثلا... أي شو مفكر مان الشب الفلسطيني خلق و البارودة بإيدو؟ مان هادا شب متلو متلك و متلي... بدو يعيش و يعمل بيت و أسرة... بيطلعولون شي كم مرة بيرموا حجر و في كم واحد منه بينضم لحماس... بس مو الكل هيك مان... في ناس عايشة هنيك بتروح على مدارس و جامعات و عندها آمال و طموحات انها تعيش حياة طبيعية... و نفس الشي الاسرائيليين يعني ... ما حدا بيحب يضل عايش بحرب و تأهب


حدودك يا اسرائيل من الفرات الى النيل .. بتمنى ما تنسى هالشي .. ولا تقلي اسرائيل منفتحة وهادا كلو حكي .. اليهود سلفيين أكتر من العرب على ألف مرة .. وماراح يرتاحلهون بال حتى ياخدو من الفرات الى النيل ..

هاي قصة الفرات و النيل انا ماني شايفها معقولة او كلام منطقي. وين انت سمعان هل حكي و وين ممكن تشوف انو إسرائيل هلأ رح تهاجم و تحتل الأراضي من الفرات إلى النيل؟ أخي هادا كلام حكومات كمان مشان نفس الهدف يلي ذكرته انا أعلاه. شو هيك القصة إسرائيل بتهجم و بتحتل... انت عم تحكي عن دولة مؤسسات و أحزاب و برلمان... مانك عم تحكي عن صدام حسين او القذافي. بعرف انو اسرائيل دولة معتدية و حقيرة ما منختلف على هل شي... بس شي و منو يعني

موضوع الاقتصاد و تطوير الداخل و الخارج منحكي فيه بعدين ما نو مشكلة...

سلام

عاشق معلش شو المانع أذا عاش الشعب الفليسطيني والشعب اليهودي بدولة وحدة بظل حكومة عادلة بتحفظ حقوق الجميع يعني الفكرة أنو بالأخير ما رح يصير غير هيك لأنو مثلا وين بدك تروح بالشعب الأسرائيلي (تكبو بالبحر مثلاً) يعني ما رح يكون في اي فكرة بتهجيرون كلون بعدين فكرة الحجار والمقاومة نساها أنت عم تقاتل أميركا وأسرائيل والشجرة ألي بتفهم وبتجيا ريح قوية بتنحني ما بتوقف لحتى تنكسر الشغلة ما بس بالعواطف الشغلة بدا تفكير وأذا ظلو الشعب الفلسطيني عم يعملو عمليات أنتحارية ويقتلو بالشعب الأسرائيلي رح يضل الرأي العام العالمي ضدهم وما رح يطلع منون شي ورح تظل أسرائيل عم تعمل ألي بدا يا بحجة مكافحة الأرهاب

وأخيرا في كاتب أميركي شهير كتير للأسف نسيت اسمو قال بأحد مقالتو للعرب (أنتوم محامون فاشلون أمام قضية عادلة)

و الله يا شباب انا ما عندي تعليق...بس عندي هالفلم القصير جداً


حبيتو...في اخراج يا اخي 8)

hashtnasht... :?

all i can say is... wow

الكليب شغلة ما طبيعية :shock:

العزيز جوي أنا بعتذر فعلا" على الكلمة اللي زعجتك بس كنت مزعوج ..

ومشان ما نطول النقاش أنا حابب أسأل سؤال لمعماري ولجوي ..في حدا منكن اذا اليهود اخدوا قسم من سوريا ودبحو مئات الآلاف من أبنائها .. بيرضى بعد فترة يعيش معها بسلام وأمان ... :D

هادا الموضوع صار لازم يصير بالمنير الحر

العزيز جوي أنا بعتذر فعلا" على الكلمة اللي زعجتك بس كنت مزعوج ..

ومشان ما نطول النقاش أنا حابب أسأل سؤال لمعماري ولجوي ..في حدا منكن اذا اليهود اخدوا قسم من سوريا ودبحو مئات الآلاف من أبنائها .. بيرضى بعد فترة يعيش معها بسلام وأمان ... :D

ولا يهمك حبيب

بس دبح مئات الآلاف؟

الله يخليك لا تفهمني اني عم برر أي شيء لاسرائيل او أعمل الشغلة بسيطة... بس ما بعتقد في دبح بمئات الآلاف متل ما عم تقول.
بالنهاية أخي الصراع صرله اكتر من خمسين سنة. لو الأوروبيين عقلهم متل عقلنا... كانت بعمرا بعمرا أوروبا ما عرفت سلام... متخيل كم عدد الحروب و المدابح يلي صارت بأوروبا؟؟ من نابليون بالألف و تمانمية, للحرب العالمية الأولى و الحرب العالمية الثانية... بس مع هيك فورا بس تنتهي الحرب الناس بتحط السلام نصب أعينها و بتنسى كلشي.. لانه ببساطة هادا من مصلحة الجميع... و ليكو هلأ صار في اتحاد أوروبي... مين كان ممكن يتخيل بيوم من الأيام مثلا انو ألمانيا و فرنسا تصير أقوى حليفتين و عملة موحدة؟
نحنا كشباب صغار لازم كمان يكون السلام أول هدف نسعى إليه... خلص يللي صار صار... شو منقتل من عندهم كمان مثات الآلاف مشان يتصلح الوضع

ثم المنطقة تبعنا كلها هيك... إسرائيل مجرد طرف واحد فيها... كل العرب نازلين حروب و تنكيل بباقي العرب مو بس إسرائيل

ع كل حال انا ماني عم اتنازل عن الجولان و لا عن عودة اللاجئين. أنا قلت انو نحنا بموقف ضعيف جدا متل موقفنا ما معقول نضل معلقين القضية الفلسطينية إلى أجل غير مسمى.

بالاذن منكون انتو الكل
اليهود كلون من اوروبا
ولانو الاوربيين ما بيحبوهون بعتوهون لعنا
وعطوهون ارضنا
ولو عملوا مليون غنية حب انا بكرهون
هي من الخطط الي عم يعملوها لينسوا الجيل الجاي من الفلسطينين حقهون بارضهون
وبالوقت الي طلعت في الغنية عملوا مبارة بين فريق اطفال اسرائيلي وفريق اطفال فلسطيني
هدول اطفال وما راح يفهموا هالشي
بس الكبار لم تعد تفهم فلا عتب على الصغار
انا بكره كل الاسرائلين
وانا ارهابي ضد اميركا واسرائيل
:gem: :gem: :gem: :gem: :gem: :gem: :gem: :gem: :gem: :gem: :gem: :gem: :gem: :gem: :gem: :gem: :gem: :gem: :gem: :gem: :gem: :gem: :gem:

العزيز جوي أنا بعتذر فعلا" على الكلمة اللي زعجتك بس كنت مزعوج ..

ومشان ما نطول النقاش أنا حابب أسأل سؤال لمعماري ولجوي ..في حدا منكن اذا اليهود اخدوا قسم من سوريا ودبحو مئات الآلاف من أبنائها .. بيرضى بعد فترة يعيش معها بسلام وأمان ... :D
ولك ما هاي النقطة أنو ألي عم يقتلو مئات الألاف ما الشعب اليهودي ألي عم يعمل هالعمايل هن الحكومة الأسرائيلية وصدقني أنو الشعب السرائيلي مزعوج من هاي السياسة ووقت أنت بدك تقبل بالسلام ما رح تتخلى عن أي من حقوقك بس كمان ما فينك تقلع كل الشعب الأسرائيلي من فلسطين

ع كل حال انا ماني عم اتنازل عن الجولان و لا عن عودة اللاجئين. أنا قلت انو نحنا بموقف ضعيف جدا متل موقفنا ما معقول نضل معلقين القضية الفلسطينية إلى أجل غير مسمى.

ما حدا طالب منك تعلقها الى أجل غير مسمى هادا شي بخصك .. بس ما من حقك تطلب السلام بقضية لا تعنيك (ما زلاك شايفها هم عليك)


وصدقني أنو الشعب السرائيلي مزعوج من هاي السياسة ووقت أنت بدك تقبل بالسلام ما رح تتخلى عن أي من حقوقك بس كمان ما فينك تقلع كل الشعب الأسرائيلي من فلسطين

مزعوج من السياسة هادا حكي جرايد .. وتهدئة نفوس .. واستنزاف عواطف ..
ومو أنت بتحدد ولا انا اذا فينك تقلع الشعب الاسرائيلي من فلسطين .. لأنو هي الأرض برئية من كل شخص بدو ينساها أو يسلمها ..
وعلى فكرة .. اذا هيك تفكيرك استسلامي .. بتمنى توقف عن الكتابة لأنو أسلوبك بالكتابة رائع وبهيك أفكار رح تخلي قرائك ينسوا أرضهن ووطنهن .. :cry:


وبالنهاية حابب قول أنو لهلا ما حدا منكون يا جوي ومعماري جاوبني على سؤالي ..
في حدا منكن اذا اليهود اخدوا قسم من سوريا ودبحو مئات الآلاف من أبنائها .. بيرضى بعد فترة يعيش معها بسلام وأمان على أرض روتها دماء أخواتو وأبناءو وأهلو .....

حسام أول شي هديلي حالك الله يخليك :( :( أيوا هيك!!!!!!!! :) تمام :D
نرجع لموضوعنا

ما حدا طالب منك تعلقها الى أجل غير مسمى هادا شي بخصك .. بس ما من حقك تطلب السلام بقضية لا تعنيك (ما زلاك شايفها هم عليك)

أول شي....طبعا قضية ما بتخصني, لا تفهم غلط, ما بتخصني من ناحية أنو اذا الفلسطيني بدو يوقع سلام, و خلينا نحكيها بصراحة....كل الفلسطينيين اللي أعرفهون هون , من غزة تحديدا...الكل بدو يوقع سلام, يا حسام بفهم رومانسية فلسطين بالنسبة لألك , و لألنا كلنا, بس لا تنسى أنو عم نحكي عن 60 سنة صراع, مافي فلسطيني ما ماتلو حدا بهالحرب, و لما الفلسطيني بدو يوقع, نحنا لازم أول الناس نشجعو.
ثانيا....نفس الشي برجع بحكيه, القضية ما بتخصني من منطلق تعامل الحكومات العربية بشكل عام و الحكومة السورية بشكل خاص مع القضية الفلسطينية, ما عم نقدم شي ملموس , و لاحتى دعم معنوي حقيقي... شاطرين بالشعارات و الأغاني الوطنية و مسيرات التأييد....طيب شو نفع مسيرة مليون شخص دعما للانتفاضة لما غزة عم تنفنى بالقصف...فرحانين علينا يعني عم بنصفقلهم؟!!!

أنا شخصيا بحكم معاشرتي لكثير من الفلسطينيين هون و معرفة آراءهم... أعتقد أنو خيار الفلسطينيين حاليا هوي السلام, سلام الشجعان , و مانو استسلام متل ما بتسميه,وواجبنا معهون هلأ تقديم كل الدعم الممكن مشان يبنو دولتهم

أبو مارل .. أنا ماني عم أحكي عن الفلسطينيين اللي خارج البلد .. أو عن الفلسطينيين اللي بالمناطق الفلسطينية المستقرة .. هدول طبعا" بدهون السلام .. يعني على مبدأ قبل ما يوصل البل لدقنا ... أنا حكيي على الفلسطينيين الحقيقيين اللي لهلا رافعين الحجر وعم يحاربو
واللي من عمر الخمس سنين عم يروحو ليفدو الأرض بطفولتهن .. هدول هنن أحق العالم في تقرير اذا لازم يصير سلام ولا لأ .. لأنو هدول ما باعو وما خانو وما استكانو .. وأنا بالنسبة لألي ضد السلام .. ما دام في فلسطيني ولو واحد بس رافض السلام ..
أبو مارل أنا ممكن رومنسي كتير بس هون عم نحكي على أرض عم تروح هيي وينابيع الدماء اللي مختزنة فيها ..
أبو مارل .. هي فلسطين.. لك هي آخر ما تبقى من عروبتنا وكرامتنا .. لك هي الشيء الوحيد اللي مخليني ما حس بالغربة في وطن مقيد بالحكومات الخائنة .. من سوريا وجر.. ممكن انا حالم كتير وممكن رومنسي كتير .. بس هادا حق وهي أرضنا ..

أبو مارل يلعن ربك .. بكيتني .. لك... آخخخخخخخخخخخخخخخخخخخخخ :cry: :cry: :cry: :cry:

وصدقني أنو الشعب السرائيلي مزعوج من هاي السياسة ووقت أنت بدك تقبل بالسلام ما رح تتخلى عن أي من حقوقك بس كمان ما فينك تقلع كل الشعب الأسرائيلي من فلسطين

ما فيني قلعها
يعني لازم اقل بالاحتلال للاسف كلام مو منطقي
ومبدا انك تعمل دولة يهودية مباء دولة دينية
واميركا عم تسعى انو تخلي السعودية دولة ديمقراطية بعيدة عن الدين
واسرائيل معلش تعمل دولة دينية
سياسة مزدوجة واضحة
انا ضد دولة بتعامل على اساس ديني
لو الاسرائيلين كل واحد بيرجع على بلدو بتخلص المشكلة
كل يهودي عندو بلدين البلد الي اجى منو على فلسكسين وفلسطين
والفلسطيني بدون يجردوا من حقوقوا بارضوا
:aah: :aah: :aah: :aah: :aah: :aah: :aah:
:gem: :gem: :gem: :gem: :gem: :gem: :gem: :gem: :gem: :gem: :gem: :gem:

مشكور زين .. :D

مشكور زين .. :D

على شو انا ما حكيت الا الحقيقة
على راسي يا معلم
:gem: :gem: :gem: :gem: :gem: :gem: :gem: :gem: :gem: :gem: :gem:

أبو مارل .. أنا ماني عم أحكي عن الفلسطينيين اللي خارج البلد .. أو عن الفلسطينيين اللي بالمناطق الفلسطينية المستقرة .. هدول طبعا" بدهون السلام .. يعني على مبدأ قبل ما يوصل البل لدقنا ... أنا حكيي على الفلسطينيين الحقيقيين اللي لهلا رافعين الحجر وعم يحاربو

أنا عم بحكي عن شباب عم بيدرسو معي هون, أهلون بفلسطين يعني, وكل صيفية بينزلو يشوفو أهلون...يعني عم بيحكو من منطلق الواقع اللي عايشينو ... ما عم بينظرو عالفاضي

واللي من عمر الخمس سنين عم يروحو ليفدو الأرض بطفولتهن .. هدول هنن أحق العالم في تقرير اذا لازم يصير سلام ولا لأ .. لأنو هدول ما باعو وما خانو وما استكانو .. وأنا بالنسبة لألي ضد السلام .. ما دام في فلسطيني ولو واحد بس رافض السلام ..
طيب... هاد حكينا, ليش الناس انتخبو محمود عباس رغم أنو هوي شخص شعبيتو تحت الصفر؟؟؟ و لا تقللي حماس و غير حماس....لأنو برأيي الشخصي اذا في حدا خلى الخيار العسكري وباء على الفلسطينيين هيي حماس, بس مو هلأ وقت الحكي بهالموضوع

أبو مارل أنا ممكن رومنسي كتير بس هون عم نحكي على أرض عم تروح هيي وينابيع الدماء اللي مختزنة فيها ..
أبو مارل .. هي فلسطين.. لك هي آخر ما تبقى من عروبتنا وكرامتنا .. لك هي الشيء الوحيد اللي مخليني ما حس بالغربة في وطن مقيد بالحكومات الخائنة .. من سوريا وجر.. ممكن انا حالم كتير وممكن رومنسي كتير .. بس هادا حق وهي أرضنا ..
طيب........... و يعني مشان نحس بعروبتنا لازم نسمح أنو الفلسطينيين يتذبحو كل يوم مشان نقدر نكتب قصائد عن الانتفاضة؟؟ لا يا شيخ....بهيك حالة تضرب هيك عروبة, بلاها
الحل السلمي ممكن جدا ...وما بفهم ليش هلأ عم تعتبر الحل السلمي هوي أهانة لفلسطين, شيل هالفكرة من راسك شريك,

أنا عم بحكي عن شباب عم بيدرسو معي هون

وضامنين مستقبلهن محل مو عم يدرسو .. يعني ماني عم لومهون بس يعني هدول أمنوا حياتهون ..


طيب........... و يعني مشان نحس بعروبتنا لازم نسمح أنو الفلسطينيين يتذبحو كل يوم مشان نقدر نكتب قصائد عن الانتفاضة؟؟ لا يا شيخ....بهيك حالة تضرب هيك عروبة, بلاها

لك أبو مارل نحنا عم ندفع هون بسوريا دم كرمال نتحرر من حكومة ديكتاتورية .. بقى معتبر دفع الدم كرمال أرض مغتصبة بس مشان نكتب قصائد .. عنجد هيك جرحتني كتير :cry: :cry: .. يا أخي السلام يعني تسليم الأرض .. وما بظنك انت أو أي واحد سوري بيرضى يعملها لو صار بسوريا متل مو عم يصير بفلسطين .. لك يا اخي والله انا مو مابدي السلام مشان أكتب قصائد للشهداء والأرض .. ولا مشان لاقي قضية عيش مشانها .. لك السلام يعني التسليم .. وأنا واثق أنو اسرائيل رح تستغل أي لحظة ضعف كرمال تكفي شعارها اللي على أساساو قام الكيان الصهيوني وعلى أساسو التفوا اليهود ونسجوا حلمون (حدودك يا اسرائيل من الفرات الى النيل) ممكن تقول أنو هالحكي خزعبلات .. بس الأيام كفيلة أنو تأثبت هالشي ويا أسفي ويا خوفي ويا عجزي من انو حكيي مالو اثبات الا لما يصير حقيقة وتتحقق الرؤية الصهيونية ...
:cry: :cry:

طيب........... و يعني مشان نحس بعروبتنا لازم نسمح أنو الفلسطينيين يتذبحو كل يوم مشان نقدر نكتب قصائد عن الانتفاضة؟؟ لا يا شيخ....بهيك حالة تضرب هيك عروبة, بلاها
الحل السلمي ممكن جدا ...وما بفهم ليش هلأ عم تعتبر الحل السلمي هوي أهانة لفلسطين, شيل هالفكرة من راسك شريك,

الفلسطينين والعرب ما عم يندبحوا يا سيد عم يستشهدوا وفي فرق بين البح والاستشهاد
وراح يضلوا يستشهدوا ولو صارت دولة فلسطين ودولة اسرائيل
ما راح يقبلوا انو تنخلق دولة عنصرية من العدم ويا خدوا من ارضون السلام ما بيصير لتنلاغى اسرائيل وبس ولو هالشي باين انو شبه مستحيل بس دو يصير
فلسطين للعرب
وما في شي اسمو اسرائيل
وراح نضل هيك عم ندبح على حسب حكيك ما عنا مشكلة بس المهم ما نبيع كرامتنا ونتنازل عن شبر من فلسطين او شبر من سوريا او اي بلد محتل بكل العالم
:gem: :gem: :gem: :gem: :gem: :gem: :gem: :gem: :gem: :gem: :gem:

الفلسطينين والعرب ما عم يندبحوا يا سيد عم يستشهدوا وفي فرق بين البح والاستشهاد
تماما....وبفلسطين اللي عم بيصير اسمو دبح

وراح يضلوا يستشهدوا ولو صارت دولة فلسطين ودولة اسرائيل
ما راح يقبلوا انو تنخلق دولة عنصرية من العدم ويا خدوا من ارضون السلام ما بيصير لتنلاغى اسرائيل وبس ولو هالشي باين انو شبه مستحيل بس دو يصير

أكتر الناس عنصرية هنن العرب ... و المشكلة أنو ما نعترف بهالشي, ما عم بدافع عن اسرائيل اللي أكن لها شديد الكراهية....بس بهالعقلية اللامنطقية ما راح نوصل على أي مكان, لازم نكون واقعيين

فلسطين للعرب
فلسطين للفلسطينيين, هنن اللي عم بيناضلو و يموتو عشانها, يلعن أبو العروبة ع أبو اللي اخترعها , ما منهون الا الحكي عرب الكاديلاك و المارلبورو

وما في شي اسمو اسرائيل
و الله يا ريت, بس الواقع بيحكي غير شي

وراح نضل هيك عم ندبح على حسب حكيك ما عنا مشكلة بس المهم ما نبيع كرامتنا ونتنازل عن شبر من فلسطين او شبر من سوريا او اي بلد محتل بكل العالم
اساسا هيك عم تتنازل....دخلك بهالـ " نضال " تبعك رجع الجولان بعد أربعين سنة.....

بعدين ممكن تهدو شوي, عم بتحكوني كأنو اسمي شارون عبد ربو

يا أخي رح جاوبك على سؤالك أكيد ما رح أقبل وما حدا في شرف بيقبل بس وقت بدو يصير متل ما صار بفلسطين بدك غصب عنك تنحط تحت الأمر الواقع عند فوق 3 ملايين أسرائيلي بون يعيشو بفلسطين لامجال خلص الشغلة ما بلاعواطف على عيني بجوز هادا الشيء مؤلم بس أنت تحت الأمر الواقع بس الأستسلام وقت بتخلى عن حقوقك خلص يا أخي يعيش الشعب الفلسطيني والأسرائيلي بدون أي تميز ويكون عندون نفس الحقوق وخلص فينك تتعبر هادا الشيء كمرحلة أولية حتى تقوا الدولة وتتمكن من مثلا أستعادة أراضيا أو شو بيعرفني شو بدون يعملو

شاطرين بالشعارات و الأغاني الوطنية و مسيرات التأييد....طيب شو نفع مسيرة مليون شخص دعما للانتفاضة لما غزة عم تنفنى بالقصف...فرحانين علينا يعني عم بنصفقلهم؟!!!

يا مان شلون شو نفعا أهم شيء المظاهرات ما هو أسرائيل غلبتنا لأنو الرأي العام العالمي معا صدقني ما رح نغلب أسرائيل بالجهاد المسلح وليس من المنطق مقاومة أقوى دولتين عسكريا وبرجع ذكر أنو ديغول رئيس فرنسا قال للفلسطينين أنتم محامون فاشلون أمام قضية عادلة

أنو ديغول رئيس فرنسا قال للفلسطينين أنتم محامون فاشلون أمام قضية عادلة

الله يخليلنا الغرب يا عمي .. فهمانين .. والله يخليلنا أمريكا .. واسرائيل .. وأحلى تحية لدولة اسراطين ..