حكايات حنكشتيكا

اكتشف حنكشتيكا أن حماره إرهابي..!

بقلم: الكاتب سعيد الغزالي*
خاص بـ"أمين"

كل يوم يمر يزداد حنق حنكشيتكا على حماره...

لعنة الله على اليوم اللي شفتو فيه. كنت مضروب براسي لما قابلته، ومشيت معاه رحلة العمر.

كنت مطرود من شغلي.. كنت فقير ومشرد.. كنت شاب صغير ما فش عندي تجربة.. كنت أشوف الدنيا أسود وأبيض. لما شفت مدير المؤسسة الوطنية، كان يلطش مصاري المؤسسة. زعلت. وصرت أحكي. راح طاردني من شغلي، صاروا أصحاب المؤسسات الوطنية يخافوا مني، ولا واحد أعطاني شغل مع إنو عندي مؤهلات كتيره. علشان لساني سليط. بحكي كتير. بدي بلد بدون فساد.. بدي قياده بدون أخطاء.. بدي كل الشعب ياخد كل حقوقو، واذا ما صارش هادا، معناه الدنيا خربانه.

شفت الحمار، اعجبت بافكاره.. كانت أفكاره متل أفكاري.. صرنا نمشي مع بعض، نسهر، نفكر، نعمل بيانات، نحتج، نتظاهر. صارت أحداث كثيره. ناس خربت أحوالها وتدمرت بيوتها.. ناس ماتت.. أربع آلاف ماتوا، عشرات الالاف انجرحوا. السجون تعبت. والبيوت اتهدمت.

انا تعبت، بس الحمار ما تعبش. قال بدو يكمل المسيرة. أنا تعبت. اربعين ولا خمسين ولا أكثر واحنا في المسيرة. انا تعبت والحمار ما تعبش.

أنا صرت أشوف أحسن، أفهم أحسن. طبعا، مش لازم أقارن نفسي بالحمار. الحمار بيفهمش. بياكل برسيم، بنهق. ما شافش العالم. طول عمره في البلد. أنا سافرت كتير. قاعد في الاسطبل. بيشوفش تلفزيون. أنا عندي كل محطات العالم. أنا عندي انترنت. بشوف كتير. خصوصا مواقع الصبايا.. أخ على مواقع الصبايا الحلوين. كل ما أشوف موقع جديد، بندم على الحمرنة اللي كنت فيها.. قال مبادىء..!!

انا بروح حفلات. رقص وشرب. الحمار ما بيرحش. أنا بتكلم لغات، هو بيعرفش ولا لغة. كل اللي بعيرف يقولو لا. لا. أنا أرفض.. أنا لا أقبل.. أنا أعترض.. أنا أنهق... بنفعش يا ناس. اذا ضلينا نعاند، راح تتكسر روس.

الحمار ما غير رأيه.

صار تغيير كبير في الدنيا. شوف مثلا الكلاب صارت تتمكيج وتلبس اواعي. صارت تروح عل الحفلات. وتاكل احسن أكل. أحسن من أكل بني أدمين كتير. والحمار ما بدوش يتغير. بدو ياكل برسيم ويشرب ميه. ما لها الشمبانيا. مالو الويسكي. أي الويسكي بينعش الذاكرة. بخلينا نتفاوض احسن.

أبو حطة مات الله يرحمة، إجا أبو اكرم، عندو مشاريع كتيره. عندو أفكار عصرية. بدو يغير، بدو يحسن الاوضاع، بس الحمار ما بدو يتنازل عن الشعارات الكبيرة، بدو دوله وسيادة كاملة، وبدوش يتنازل عن أي شي. طب وين هيه القوة اللي يمكن تخلينا ناخد اللي بدنا إياه؟

الحمار بيحلم. أحلامو مستحيلة. بيركض ورا السراب. اللي بيزرع أحلام راح يحصد أوهام.

وين قوة أبي أكرم منشان يرغم أبي فوزي أنو يعطينا كل اشي منطالب فيه. قال حقوق كاملة. يا خيبتي من ها الكلام الكبير.

أبو أكرم بيفهم لغة المصلحة والمنطق والقدرة. الحمار ما بيفهمش.

لعنة الله على هذا الحمار اللي بيجلدنا بمبادئه. ما فش إشي بيعجبو. ما بيعجبو عجب ولا الصيام برجب. إذا وافق أبي فوزي عل إطلاق السجناء، بيقول الحمار أنو الصفقة مش مليحة، بدو أعداد أكتر، وسجنا أمضوا سنوات كثيره في السجن، ويريد إطلاق سراح الأسيرات والسجنا العرب. ليش ما يعترف الحمار بمبدأ: خود وطالب. ألا يتذكر هذا الحمار المثل الشعبي القائل: إذا بتطلبو كلو راح تخسرو كلو.

إذا وافق أبي فوزي على إخلاء بعض المستوطنات، يقول الحمار: هذا لا يكفي. خلينا نغير ها السياسة، ونشوف وين راح نصل مع أبي أكرم؟ يمكن الوضع يتحسن؟ يمكن تكون بداية مليحة لـ إشي مليح.

راح أواجه الحمار بهادي المواقف. يمكن أقدر أقنعه أنو يغير. بدي أشوف شو بيحكي.

توجه حنكشتيكا إلى الاسطبل الذي يعتكف به الحمار.

كان الحمار جالسا على الارض بأربعته. عندما دخل حنكشتيكا بوابة الاسطبل. أشاح الحمار بوجهه عن حنكشيتكا، وهمهم بنهقة قصيرة. كأنه يستهجن وصوله. لاحظ الحمار أن حنكشيتكا لا يحمل نبوتا ولا سوطا بيده، فاطمأن قلبه قليلا. نظر الحمار إلى وجه حنكشتيكا، وكان مبتسما. فاستغرب من أحوال سيده. هل غير حنكشتيكا مواقفه، هل استقال من رئاسة اللجنة الإعلامية، وعاد إلى مواقفه السابقة، ومبادئه؟

سيعرف ماذا يجري بعد لحظات.

ها ها ها ها ها نهق الحمار مستفسرا عن سبب مجيء حنكشتيكا.

- إطمأن لن أضربك بالنبوت، ولكني أريد أن افهم لماذا تستمر بعنادك. بتقول لا لا لا. ما تعبتش. الناس كلها تعبت. خلينا نجرب إشي تان.

- ها ها. ما احنا جربناه. مفاوضات سبع سنين. شو أخدنا!

- ما هو الحق عليك. رحت تعمل إنتفاضة وعنف.

- ها ها. يعني أبو فوزي راح يعطيك كل إشي بدون انتفاضه ولا عنف.

- ليش لا؟

- ها ها. نشوف شو اعطاك حتى الان. رجعنا على موال غزة واريحا. رجعنا على موال الفالصو اوسلو. بدو ابو فوزي ينسحب من المستوطنات في غزة. ويقويها في الضفة. يعني راح تخسر الضفة. بدو يخلي المستوطنات الكبيرة في الضفة. ويضمها إلو بدوش يطلع منها. راح يخليها تابعة إلو، حتى لو قلت أنا اعترض. بدو يدمر المستوطنات في غزة. بيقول إلك يعني يمكن تشتريها. يعني كل دورك إنك تساعدو في كل مشاريعه وخططه. يعني تساعدو بالتوقيع على اتفاقيات منشان مصلحته هو ومش مصلحتك. شوف يعني فكرة إنك تشتري المستوطنات. هاي فكره بيكسب فيها اموال.

- شو فيها لو اشتريتها؟

- ها ها. يعني شو ها المنطق اللي بتحكيه. تشتري مستوطنات بناها ابو فوزي في أرضك. وسرق خيراتك الميه والارض لاكتر من 37 سنة، بعدين بدك تشتريها. هادا منطق أعوج. بدل ما تطلب تعويض عن الخسائر اللي خسرها شعبك من ها المستوطنات، بدك تدفعلو مصاري. شو ها المنطق.

- يعني أحسن ما تدمر. إحنا مش راح ندفع. المستثمرون العرب راح يدفعوا.

- ها ها. بعدين يشتروها الناس اللي معاهم مصاري. بس مش الناس اللي تهدمت بيوتهم ومصانعهم، والناس اللي تصادرت أراضيهم، والناس اللي خسرت ولادهم. يعنوا وين يروحوا. فكر كويس يا حنكشتيكا: هو أنا الحمار ولا إنت الحمار. يعني انت بتشتري مستوطنات غير شرعية والشعب مش راح يستفيد منها.

- الفكرة مش بالضبط فكرتي. هذا كلام مستثمر بدو ييجي يستثمر. قابل أبي فوزي، وعرض عليه الفكرة. لسه كلو كلام.

- ها ها اليوم كلام وبكره أفعال. اليوم بيحكو وبكره بيشتروا. وانت ليش ما تقول لا.

- أنا بقدرش اقول لا. تعبت من كلمة لا. بدنا عيشة أحسن من ها العيشة. إذا بنضل نقول لا، عيشتنا راح تضل تعبانه. أبو اكرم ما عمرو قال لا. هو عارف شو بيصير. إنسان واقعي. بيقدرش يحارب أبي فوزي ولا أبي العالم. ولا واحد بيقدر يقول لا. إذا قلنا بدناش نقبل وبدنا نرفض. راح نضل نعيش في مشاكل.

- ها ها. إذا قلت نعم في كل مرة. كل إشي كويس في كل مرة. تقبل في أي شي صغير. وتقول الاشيا الكبيرة بعدين. إذا ابو فوزي ما بيعطيك الاشي الكبير اليوم ليش يعطيك إياه بكرة. وين راح توصل؟ راح توافق عل كل اشي بيقولو أبو فوزي. أبو فوزي قالك بدناش ندفن ابو حطة في مدينة السلام. وافقت. قال لك: بدناش نتفاوض على الحل الدائم. بدنا حل مرحلي. قلت لا. الأفضل الحل الدائم، لكنك مشيت في الحل المرحلي. ما هي الاتفاقية اللي عملها أبو العالم كلها مرحلية. يعني دولة مرحلية. شو يعني دولة مرحلية؟ كلام عجيب. يعني يمكن أبو فوزي يبطل عنها. يعني دولة بدون سيادة. أنت وافقت. ابو فوزي قال بدناش انتفاضة. انت وافقت. أبو فوزي عندو خطة. انت بتمشي على الخطة تبعتو حتى لو قلت لا، قدام الناس. ابو فوزي راح يقول أنا عملت سلام معاك واتفاقيات. إنت لازم توقع عليها. بتقدر تقول لا؟ بتكون الضفة رايحه. والمستوطنات في الضفة بتضل. والغني بضل غني، بس بصير غني اكتر. والفقير بصير أفقر. والارض بتروح. يعني الوضع راح يصير أسوأ. أنا خايف كتير من ها الوضع.

- لا لا. الامور راح تتحسن. وراح نعمل حكومة جديدة.

- ها ها ها ها ها ها ها. حكومة جديده. ضحكتني... حكومة جديدة بقيادة هادا اللي بيقولوا أبو سلاخة.

- شو أبو سلاخة. شو ها الكلام؟

- ها ها ها يعني انت بتعرفو. كل شغلوا بغير الطواقي. وزير الاشغال قصدي وزير قله الاشغال بيصير وزير التخطيط قصدي وزير التخبيط، وزير الاعلام قصدي وزير الاوهام بيصير وزير الامن. يعني الوضع بضل زي ما هو بل أسوأ، أي أنا الحمار والله بفهم اكتر من ها الوزرا. الوضع خيبة وشوربة. يا حبيبي. ليش ما تجيبوا حب الفهم لـ ها الوزرا. كل وزير ياخدو إلو حبة فهم. يمكن يتحسن وضعه، يعني أحسن تاخدوا حبة فهم. بعدين أبو فوزي بدو ناس يفهمو، يشتغلو عندو وزرا من الناحية التانية. يعملو كل إشي. يوقعوا على اتفاقيات اللي هو عاملها ومخططها. تشتغلو عنده بالامن. تعملو حرب عا الشعب. يعني إنت بتقول الشعب عاجز، وضعيف. خلينا نجرب إشي جديد. وين هو الإشي جديد. صحيح فيه إشي جديد؟ فيه مستوطنات جديده. فيه فقرا أكتر. فيه غضب اكتر. فيه مشاكل اكتر.

روح يا حنكشتيكا، إرجع لاصحابك. روح عا الحفلة. فكرتك تغيرت. ها ها ها ها ها.

غضب حنكشتيكا. وصاح بأعلي صوته:

- إنت حمار إرهابي.. إنت حمار إرهابي.. إنت إرهابي إرهابي.. الله يعلن السيعه اللتي تعرفت عليك فيها.



* كاتب وصحافي فلسطيني يقيم في مدينة القدس ////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////