قبل كل شي لازم أعتذر من كريم الغائب حالياً - لأسباب لا يعرفها إلا الجن الأزرق والأبيض والأسود - لازم أعتذر لأنو رح نزل عدد من مجلة خاصة به مجلة النعيق .. بس بتوقع أنو كريم رح يفرح لما يشوف الشباب مو ناسيين الشغل اللي بلش هو فيه .. بكل الأحوال تحية لكريم أقوىمن الأقفال الموجودة على باب غرفتو الحالية ..

النعيق
(تحشيشية، فاشلة، تصدر غالبا بعد هزة بدن)

عدد خاص جداً : خصيصاً للحمير .
عنوان فرعي : وصل البل لدقننا .

* خصيصاً للحمير مجموعة قصصية للكاتب التركي عزيز نيسين ..

* أنو ما تلاقي شغلة تعملها وما يكون عندك مكان لتجعر فيه غير النت فهذا يعني قطعاً أنك مثلي من معشر الحمير اللي ما بيعرفو أيمت وكيف ووين بيجعرو - الجعير = النهيق - مشان هيك ما لقيت عنوان أحسن من هاد للنعيق في هاد العدد الخاص جداً ..

* وصل البل لدقننا :
مثل ما بعرف صيني ولا ياباني بيعبر عالعموم عن الحال اللي بتصلا الأمور لما بتكون نايم ولا على بالك شي فلما بيبلش المي يمشي من تحتك وبياخد اللي جنبك واللي وراك واللي قدامك بتقول لشريكك اللي عم بيحشش معك وليّ وصل البل لدقننا ..
طبعاً الجملة هاي مين أكتر الناس اللي بيستعملو طبعاً هنن المشؤوليين بشكل عام وبشكل خاص المسؤوليين اللي بيكون في تحت أيديهم شوية سيولة مادية , يعني لما بتجي الرقابة والتفتيش اللي ما بتجي غير كل كم مية سنة مرة وبتبلش تفلح بنائب المدير و مسؤول المشتريات وأمين المستودع بيجي تلفون للمسؤول اللي بيكون نايم بالفيلا مع مندوبة الوفد الطاجكستاني هالتلفون بيقول للمدير أنو لازم يدير بالو على حالو لأنو الرقابة والتفتيش بلشت تدور بالأوراق عن شي ضد المسؤول هاد نفسو فهيك المسؤول بيطبق السماعة فوراً وبيقول للمندوبة بالطاجكستاني وليّ وصل البل لدقننا , طبعاً هاد البل - البلل - بيتنشف فوراً عن طريق أصغر سيشوار موجود يعني عن طريق شي أبن حلال بالرقابة و التفتيش بيكون مسكين ما بدو شي غير سيارة مرسيدس صغيرة متل النملة بياخد سيارتو وبياخد الرقابة والتفتيش معو بالسيارة وبيبعد عن المسؤول وعن الوفد الطاجكستاني كلو ..
طبعاً نحنا معشر الحشاشين البل عم يصل لدقننا كل يوم من كتر غسل الوجه والأيدين والأجرين واللللللللل .. بالمي من يوم ما بلشت إدارة الكهرباء الموقرة ببنامجا الخارق الحارق بتقنيين الكهربا .. يعني إذا ما في كهربا عليك بالمي وإذا حضرت الكهربا" بطلَّ التيمم " .

* عقل بالكف :
- انتباه: في أيلول يبدأ تطبيق التعرفة الجديدة للكهرباء
يعني إذا هلا ما بعرف بأي شهر نحنا والكهربا عم تنقطع أربع خمس ساعات باليوم وطبعاً وزارة الكهربا بشو بتحجج بتحجج بزيادة عدد سرقات الكهربا اللي صايرا بالبلد يعني إذا هيك والسرقات عم تتزايد كيف إذا غليت الأسعار أكتر .. اللي بيسرق الكهربا بينفد بجلدو واللي روحو الوطنية وأخلاقو ما بتسمحلو يسرق الكهربا بيتخوزق بفاتورتو وفاتورت اللي عم يسرق ..
- القيادة القطرية تدعو للمشاركة الواسعة في انتخابات الادارة المحلية ترسيخاً للديمقراطية
وينك يا ديمقراطية .. شم ولا تدوق .. الديمقراطية : التوزيع العادل لنسبة الثلث اللي ما بياخدا حزب البعث وبيوزعا تلت رباع هالثلث لأحزاب الجبهة والباقي للشباب الطيبة اللي بيكونو مستقلين أسمياً , وعملين من شلة الشباب الطيبة .. بعثراطية ..

- وفد دنماركي : سورية مثل يحتذى به للعيش المشترك
لك دخيل رب النمارك والببقرات الدنماركية ودخيل رب نيكول سابا بعد ما مثلت بالتجربة الدنماركية ..
لك هاد الحكي اللي بيجي بالفحص يا هيك تعايش يا بلا .. حمودي بيجوز بنتو لعلوشي بكل روح رياضية و آرتينو بيقرا الفاتحة بعزا كردو .. وتوم وجيري بأوقات الهدنة ليصيفو بالشام ..

- الشيوعيين بعد توجهاتهم الأخيرة غيرو شعارهم ليصبح " يا عمال العالم صلو عالنبي "
سورية لن تركع .. سوريا شوكة في قلب الأمبريالية .. سوريا الله-بعدي أسمو وكسمو- حاميها ..

* عشنا وشفنا :
منتخب سوريا للناشئين يتعادل مع نظيره الأرجنتيني في كأس العالم للناشئين ويؤكد على نجاح الخطة التاريخية للمنتخبات السورية خطة فتت لعبت
" مع الإعتذار من خالو لقمان ديركي "

* قوم فوت نام وصير حلم :
كم مسسلسل رح يعرض برمضان الكريم القادم .. سهلة :
عد الممثلين السوريين والمخرجين السوريين و كتاب السيناريو السوريين وقسمهم ع 2 لأنو كل مسلسل بدو بطل و عدو للبطل - متل الزير سالم وجساس - بيطلع معك عدد ضربو ب 2 وقسم الناتج ع 0.001 وزت نص العدد اللي بيطلع معك بالبحر وغمض عينك اليسار وسكر اليمين بتشوف رمضان خلص بلا ماتفهم أي ممثل بأي مسلسل كان .. يا ما كان .

* عذب الكلام : الصفحة الأخيرة :
الإقتصاد السوري يحقق نمواً سنوياً بمعدل 6.8 % .. يا بلاش .

إلى اللقاء في أعداد أخرى - أخرى بضم الهمزة - .. لا يروح فكرك لبعيد ..

حلوة حلوة.
بس عميتلي عيوني. زبط الخط المرة جاي.

الإقتصاد السوري يحقق نمواً سنوياً بمعدل 6.8 % .. يا بلاش .
هاي كان لازم تكون ب "سمعنا وما شفنا"

ايه
الله يبشرك بالخير
كل هذا صاير وانا ما بعرف
اكيد كنت محشش
سلامى

انو ما عاد تحلو عن ضهر هالحكومة ............. والله امركون غريب انتو ...
على كل انا مو قصدي انكون غلطانين بحقون بس لنتو غلطانين بحق حالكون يا حرام كالهلجعير اللي عم تصرفو عليه طاقة (كهربا مثلا ) يروح عالفاضي .
بعدين انا مستغرب انو انتو ما وصلتوا لحالة اليأس بعد؟؟؟؟
س}ال معروف جوابو!!!! لا
لانو انا كمان لسا لا مع انو كل شي يدعو اليه بس ما بعرف يمكن فعلا في الله و يمكن (هنين) عندون شي منو بحيث بيأسوك من دون ما تيأس و هالقدرة وحدها تستحق انو ننحني لهم اجلالا و (على ارواح الشهداء كمان).

بعدين انا مستغرب انو انتو ما وصلتوا لحالة اليأس بعد؟؟؟؟

انا شخصيا, ومع الاسف.
وصلت.

هالحكي هيك. من القهر.
بس مافي امل.

انتباه: في أيلول يبدأ تطبيق التعرفة الجديدة للكهرباء

:shock::sick:

- الشيوعيين بعد توجهاتهم الأخيرة غيرو شعارهم ليصبح " يا عمال العالم صلو عالنبي "




حلو كتير هالحكي