قصيدة للشاعر طارق المحياس و أصايل

1: من متى تسأل علي من متى صاير حنون
شللي رد لذكريات من بعد منته نسيت
صعبة مو قادر اصدق ليش دمعك بالعيون
كيف تطلبني حناني من بعد منته قسيت
كنت الأول في عيوني عالي وغالي وتمون
بس حسافة من عيوني طحت يوم أني بكيت
كنت اسأل نفسي دايم ش السبب انه يخون
ما تصدق لو أقول لك أني والله ما دريت
وش تقول انت وتردد أي محبة واي شجون
كنت ادورلك عذر واحد ولكن ما لقيت
كان به كلمة أخيرة من قبل لا ترحلون
ما هجيت بهالسهولة تنسى حبي ما هجيت ....

2: زادت بقلبي الهواجس واتعبت قلبي الشجون
صرت اعيش بذكرياتي من بعد منته جفيت
ليه تبعد في مسيرك ليه يالغالي تخون
كيف تقسى بالتعامل مع هذاك اللي هويت
ابتعدت وغبت عني وانته تسكن بالعيون
ارفعك لا تطحت منها كل ما صحت وبكيت
دايم اسأل عنك نفسي وين هذاك اللي يمون
واشهد اني في غيابك عذر واحد لا ما لقيت
لأ أخصلت بغرامي ما سمعت اللي يعذلون
صاين عهد المحبة وكل ما تطلب عطيت
صعبة ما أقدر أصدق من بعد ذاك الجنون
الحين صدقت العواذل يا حسافة ما هجيت....

1: تحسبيني يا أصايل جاهل أسرار العيون..
هه لأ وأنا من قبل اللي يدري كاشف السر ودريت
هالقصيدة ادري انها هيجت في(تش) الشجون
ومن قبل ما اقراها ادري فيها من احساسي بيت
هذا شعر(تش) ادري انه رد على شعري يكون
وانا احساس(تش) اعرفه لا تظنيني نسيت
البلا يا بنت اني لا أصون ولا أخون
مالي بدنيا المحبة لا عشقت ولا هويت
محترم نفسي ولا يهمني عواذل يعذلون
واللي يعذل خله يعذل عنه والله ما دريت
يكفي انه لي فؤاد ممتلي هم وطعون
حتى لو حاولت ادور قلب غيره مالقيت....

2: والله ما عاش اللي يملي خافقك هم وطعون
انت مَرَهَف حس وشاعر مبدع ولو ما حكيت
ينعرف انك تعاني واضحة فيك الشجون
ادري من نظرة عيونك حتى لو ما جيت شكيت
تدري هالدنيا يا طارق فيها من كل شكل ولون
صعبة يوفي من تحب حتى لو انت وفيت
أشعر انه الوقت هذا بالفعل وقت الجنون
الوفا والحب نادر لو تدور ما لقيت
والقهر إن انته طيب وافي مخلص وحنون
قلبك انته قلب أبيض ما أظن عمرك قسيت
يا أخي هونها وتدري من يهونها تهون
انصحك لا لاتشاكي حد مدام انته ابتديت....

1: ما شكيت وما حكيت إن زاد همي والطعون
ولو يزيد الهم فيني ما حكيت وما شكيت
بس كلهم يسألوني ليش ذبلانة العيون
يحرجوني دووم واسكت لأني فعلا ما دريت
إن سكت يزيد همي ولو اشاكي يعذلون
ولو ادور حل واحد يا أصايل ما لقيت
مدري شسوي في عمري ولو اقول انها تهون
تكبر ونكبر زيادة وأشعر أني انتهيت
ما بقت فيني مشاعر ما بقت فيني شجون
مات كل احساس فيني من حياتي وش جنيت
غير همي والمشاكل والمصايب والجنون
والقهر والضيق يكفي بس والله ما قويت....

2: انصحك واسمع كلامي قلت هونها وتهون
والصبر صدقني أفضل حال مدام انته ابتليت....

1: بصبر وشكواي لله ويا عسى الضيقة تهون
صدقيني من كثر ما قمت أشاكي استحيت....