هل توافق على الغاء الخدمة الالزامية؟

[رجل من ورق]

مرحبا
استفتاء شفته بموقع الجمل بيقول
هل توافق على الغاء الخدمة الالزامية في سوريا

ياريت تخبرونا في حال كان جوابكون سلبا او ايجابا انو ليش
وممكن يكون في خيار بديل

رجل من ورق

[ابو ريتا]

لا مابوافق لأنو الدولة بدون الجيش متل الحمام بدون موي

[رجل من ورق]

قلت الخدمة الالزامية مو الجيش

يعني وقت بتروح انت للعسكرية مو وقت بتتطوع بالجيش او تنتسب للكليات العسكرية

[VivaSyria]

لاء طبعاً ما حدا بيوافق تكون بلدو بدون جيش.. بس الوضع الحالي للجيش مزري وبدو علاج من طريقة السحب لطريقة الفرز وصولاً لممارسات الضباط والفساد المستشري بالجيش.

[رجل من ورق]

كاتب النص الأصلي : VivaSyria

لاء طبعاً ما حدا بيوافق تكون بلدو بدون جيش.. بس الوضع الحالي للجيش مزري وبدو علاج من طريقة السحب لطريقة الفرز وصولاً لممارسات الضباط والفساد المستشري بالجيش.

اي هاد اللي بدو اوصله انو شو ممكن ينعمل ؟

[ابو ريتا]

كاتب النص الأصلي : رجل من ورق

قلت الخدمة الالزامية مو الجيش

يعني وقت بتروح انت للعسكرية مو وقت بتتطوع بالجيش او تنتسب للكليات العسكرية

مافي شي اسمو خدمة إلزامية بدون ماتكون تتعلق بالجيش ، ودولتنا من الدول النامية يعني مانها دولة غنية ، لهيك شي طبيعي اني ماوافق على الغاء الخدمة الإلزامية .

[ابو ريتا]

كاتب النص الأصلي : رجل من ورق

اي هاد اللي بدو اوصله انو شو ممكن ينعمل ؟

بدك تلغيه ، روح الغيه ، يازلمي انت خيالك مو بس واسع وضارب كمان

[VivaSyria]

كاتب النص الأصلي : رجل من ورق

اي هاد اللي بدو اوصله انو شو ممكن ينعمل ؟

هلأ هون عم نقول انو في خلل بهالمفاصل هي.. شو ممكن ينعمل ببساطه يكون وضع جيشنا ومجندينا متل أي وضع تاني بالعلم.... قولك بالدول التانيه شو عملو؟؟؟

يعني مو صعبه كتير هو الوضع الطبيعي هو الوضع الصح بس الوضع الحالي هو الوضع الغير طبيعي... فالصعب هو تساوي وضع متل وضع جيشنا هلأ... مو الصعب انك ترجع الأمور لنصابها الطبيعي.

[souriana]

ضد الغاء الخدمة ولكن مع اصلاح الفساد المستشري بوزارة الدفاع

[فسحة أمل]

إلغاء الخدمة الالزامية مع أنو يكون في جيش من المتطوعين يعني مو المهم العدد بقدر ما المهم الخبرة يعني تكون شغلتو جندي

[رجل من ورق]

طب هلق الواحد لما عما يروح للعسكرية شو عم يرجع ؟ بهدلة وورجع راس وحالة بتقرف


عدا الاموال الهايلة اللي عم تتكب

طب ليش ما تصير الخدمة 3 شهور او 6 مثلا يتعلم فيها الزلمي اشيا بالتعامل مع حالات الحروب والكوارث مثلا
مو احسن من وجعة الراس
او انو باقي الجامعيين يخدموا باختصاصاتون

[sona78]

لا ما بوافق ( مع انو ما دخلني بالقصة !!!!!!!!!!!!!!!)
بس الفساد المستشري بالجيش وخاصة بوضع مجندي الخدمة الالزامية بدو علاج حقيقي وبلاقي انو لازم تقصر مدة الخدمة ويتحسن بند العمر للدخول بالخدمة يعني يصير في شي من المرونة مثلا من عمر 18 لعمر 35 ملزمة الناس بالخدمة من دون تحديد لشروط مسبقة للتاجيل ( دراسة او غيرها )يعني حتى يلي ما عم يدرس يقدر يعمل تاجيل.

[رجل من ورق]

ما دخلك ؟
طيب يعني كلنا متفقين انو وضع الجيش هيك بهدلة
وبدو اصلاح

[VivaSyria]

كاتب النص الأصلي : فسحة أمل

إلغاء الخدمة الالزامية مع أنو يكون في جيش من المتطوعين يعني مو المهم العدد بقدر ما المهم الخبرة يعني تكون شغلتو جندي

أحد الحلول الجيدة ويلي أثبتت نجاح بكتير دول... وتحديداً اذا كان العائد المادي للمتطوعين جيد

[فسحة أمل]

يعني توفير بالميزانية وبنفس الوقت بكون عنا جيش من ذوي الخبرة .

[sona78]

كاتب النص الأصلي : رجل من ورق

ما دخلك ؟

ما دخلني يعني....... ما رح اخدم الزامي اذا ضلت او التغت الخدمة

[was616im]

هلق ما رح حط رد عالموضوع بس انو سؤال فني صغير يعني....

اذا كل هالبشر اللي باخوية صوتو على الغاء الخدمة الالزامية شو رح يتغير يعني؟؟ رح تلتغى يا ترى ؟؟

[VivaSyria]

كاتب النص الأصلي : was616im

هلق ما رح حط رد عالموضوع بس انو سؤال فني صغير يعني....

اذا كل هالبشر اللي باخوية صوتو على الغاء الخدمة الالزامية شو رح يتغير يعني؟؟ رح تلتغى يا ترى ؟؟

على هالمنوال بلا ما نتناقش بشي ونضب غراضنا ونمشي.. لأنو بتخيل فيك تعتبر أي نقاش بأخوية مارح يغير شي... فمن قصيرها بلا النقاشات ومنقضيها تسالي وسلامات.