زوربا و الفراشة ....

[butterfly]

((أذكر ذات صباح، أني اكتشفت شرنقة في قشرة شجرة، وفي لحظة كانت الفراشة تكسر جدارها وتستعد للخروج منها. انتظرت طويلا لكن الفراشة تأخرت في الخروج. وبعصبية،لا. وبعصبية ، انحنيت عليها وأخذت أدفئها بحرارة زفيري وأنا فاقد الصبر . فبدأت المعجزة تحدث أمامي، ولكن بنمط أسرع من النمط الطبيعي. وتفتحت القشرة وخرجت الفراشة وهي تزحف. لن أنسى فظاعة ما رأيته حينذاك: لم يكن جناحاها قد افترقا، وكانت جميع أجزاء جسمها الصغير ترتجف، والفراشة تجهد في فتح جناحيها. فانحنيت فوقها وحاولت مساعدتها بنفسي ولكن بدون جدوى. كانت تحتاج إلى نضوج صبور، وفتح الأجنحة يحتاج إلى دفء الشمس ليتم ببطء. ولكن الأوان قد فات الآن. لقد أجبر تنفسي الفراشة على الخروج من الشرنقة وهي ترتعش، قبل موعد نضوجها. كانت تهتز فاقدة الأمل. وبعد ثواني، ماتت وهي في راحة يدي. )
من رائعة نيكوس كازنتزاكيس زوربا

[layla]

مابعرف شو قللك
هي تاني مشاركة بقرالك ياها اليوم ولتاني مرة ببطل اعرف شو قول

مشكورة كتير
بيجوز هالمقطع كتير صغير بس ماتتخيلي اديش أثر فيني.
من قلبي بشكرك

[mhmary]

كتير حلو برافو بس حاببك نقوليلي شو كان قصدو زوربا من هالمثل؟؟؟؟؟

[butterfly]

مع أنو حاسة من طريقتك أنو عم تمتحنني او كأنو مضطرة هلق انو استعرض أرائي قدامك طمعاً بكمان برافو منك ..... بس ولا يهمك يمكن ما أقدر قلك شو قصد نيكوس ؟؟؟ بقلك كيف فهمت أنا اللي كتبو نيكوس ... مع انو رح يخفف كتير من جمالية النص
أنا بظن أنو التغيير والنمو في كل شخص فيو ألم( التخلص من الشرنقة ) ... بدو الانسان وسط دافي وحب لينمو و يكتشف ذاتو ... وبحاجة كمان لوقت يقدر هوي لحالو أنو يتخلص من شرنقتو وتعلقو بالمرحلة الآمنة ليخرج للعالم ...
وأي استعجال وتخطي وضغط على شخص لينمو قبل أوانو بيشوه فيو شي حلو
أنا هيك بفسر النص ... بس بالآخر هادا رأيي ... وحلو أنو يثير فينا الأدب انطباعات مختلفة
وعذرا من نيكوس
وميرسي كتير للوش عالتشجيع

[mhmary]

كاتب النص الأصلي : butterfly

مع أنو حاسة من طريقتك أنو عم تمتحنني او كأنو مضطرة هلق انو استعرض أرائي قدامك طمعاً بكمان برافو منك ..... بس ولا يهمك يمكن ما أقدر قلك شو قصد نيكوس ؟؟؟ بقلك كيف فهمت أنا اللي كتبو نيكوس ... مع انو رح يخفف كتير من جمالية النص
أنا بظن أنو التغيير والنمو في كل شخص فيو ألم( التخلص من الشرنقة ) ... بدو الانسان وسط دافي وحب لينمو و يكتشف ذاتو ... وبحاجة كمان لوقت يقدر هوي لحالو أنو يتخلص من شرنقتو وتعلقو بالمرحلة الآمنة ليخرج للعالم ...
وأي استعجال وتخطي وضغط على شخص لينمو قبل أوانو بيشوه فيو شي حلو
أنا هيك بفسر النص ... بس بالآخر هادا رأيي ... وحلو أنو يثير فينا الأدب انطباعات مختلفة
وعذرا من نيكوس
وميرسي كتير للوش عالتشجيع

شبنا هلق هيك بدنا نشتغل سؤالي كتير عادي لا بدي قلك برافو ولاشي ولاني عم امتحنك مبينتك حساسة كتير...... بعدين تفسير هيك شغلات بيزيدا جمالية متل تفسير قصائد الشعر......

السبب الي خلاني اسألك اني قريان هاي الخاطرة من قبل وحسيت انو كل واحد بيفسرا شكل من شان هيك حبيت اسمع تفسيرك
مثلا انا فسرتا بطريقة مختلفة انا بقول انو زوربا قصدو يوصل رسالة للفنانين والكاتبين بشكل عام انو ما يحاولو يشهرو الفن تبعون بسرعة وما يهتمو بالشهرة والخروج من الشرنقة بقدر ما يهتمو بأنو يعطو هالفن وقتو لحتى يكتمل تماما وبعدين بينشهر لحالو أما اذا انشهر بسرعة اكيد رح يكون ناقصو شيء و رح يموت بسرعة

شايفي شلون كل واحد بيفسر شكل فما في داعي تعتزري من زوربا ومتل ما قلتي حلو انو يثير فينا الفن انطباعات مختلفة

[Kliopatra]

مسا الخير


زوربا الذي يرقص .. يرقص يرقص ويرقص ......ولتذهب الدواة والأقلام إلى الجحيم، ولتلحق بها الأملاك والأشغال... الآن أصبحت تعرف لغتي. لو استطاع الإنسان أن يرقص أفكاره لتفاهم كلُّ البشر.

[SIRIUS4F]

عذراً



بس في مجال تعطونا معلونات عن زوربا

للاسف ما عندي معلومات عنو

[mhmary]

كاتب النص الأصلي : SIRIUS4F

عذراً



بس في مجال تعطونا معلونات عن زوربا

للاسف ما عندي معلومات عنو

عادي يا مان ما في داعي تعتزر وين المشكلة يعني......

ليك سماع لقلك في كاتب روائي يوناني كتير مشهر أسمو نيكوس كازنتزاكيس هادا الزلمي مرة كتب قصة كتير حلوة ..... أسم القصة بقا هي زوربا وزروبا هو بطل هاي القصة فهمت علي شلون

القصة كتير حلوة نصيحة قراها بتحكي كيف هادا الشب زوربا حب وحدة أرملة وهيك شغلات

نشاء الله كون استفدت من حكي واذا عندك اي سؤال ديبك انا

[butterfly]

كاتب النص الأصلي : mhmary

عادي يا مان ما في داعي تعتزر وين المشكلة يعني......

ليك سماع لقلك في كاتب روائي يوناني كتير مشهر أسمو نيكوس كازنتزاكيس هادا الزلمي مرة كتب قصة كتير حلوة ..... أسم القصة بقا هي زوربا وزروبا هو بطل هاي القصة فهمت علي شلون

القصة كتير حلوة نصيحة قراها بتحكي كيف هادا الشب زوربا حب وحدة أرملة وهيك شغلات

نشاء الله كون استفدت من حكي واذا عندك اي سؤال ديبك انا

زوربا هية وبلا منازع روايتي المفضلة بتحكي عن شخص يوناني أسمو زوربا ... شخص بري ألو منطقو الخاص في النظر لكل الأمور ابتداءا بالدين انتهاءاً بالمرأة وبتحكي عن علاقة الكاتب بزوربا ...
بنصحك تقراها .... وتعطيني رأيك

[توت توت توت]

كاتب النص الأصلي : SIRIUS4F

عذراً



بس في مجال تعطونا معلونات عن زوربا

للاسف ما عندي معلومات عنو

شوف يا سيدي ..
نيكوس كازانتزاكيس كاتب يوناني كتير رائع ... وروايتو زوربا من اشهر واحلى ما كتب ...
وزوربا بعكس ما عم يحكو الشباب .. بطل هالقصة ماعم يحكي الكاتب عن حالو ...
انما زوربا هيي من اغرب الشخصيات واكتر الشخصيات اللي اثرت بحياة الكاتب نيكوس ..
وزوربا هادا .. كان يوناني بيشتغل بمنجم فحم .. بمنطقة باليونان ...
كان نيكوس وزوربا عايشين بهديك المنطقة .. و بعد ما انهارت المناجم هنيك .. افترقو ولك واحد راح بطريق ..
نيكوس راح على سويسرا .. وزوربا راح على مناجم تانية بصربيا ...
هلأ طبعا .. زوربا مو هو نفسو بطل القصة .. بس بطل القصة استوحاه الكاتب من زوربا العامل بمنجم الفحم ...
زوربا صاحبنا ماكان متعلم .. بس كان حكيم ومجرب بهالحياة .. وكان فيو نشاط وقوة غريبة ..

ومشان قصة الرقص اللي حكت عنا كليوباترا ..
مرة بيتعرف زوربا على عامل روسي .. وما بيقدرو يتفاهمو ...
بصير زوربا يرقص ..ويحكيلو للروسي بلغة الجسد والرقص كل شي بدو يحكيه .. بعدها بصير الروسي يرقص معو وبيتفاهمو على كل شي ..
وفي فلم لأنتوني كوين ... بيحكي قصة زوربا ... واسم الفلم . زوربا ...



وشكرا الك butterfly على الموضوع الحلو ..

[butterfly]

هالمقطع ... انا كتير بحبو من الرواية
لماذا لا تعيش هذا العالم بدل أن تفكر فيه؟! يجب أن لا تصدق كلَّ ما تقوله الكتبُ لك، بل يجب أن تصدقني أنا." فأنا "خَبِرْتُ جميع أسرار هذا العالم، وليس لديَّ الوقت لأكتب عنه... مرة النساء، ومرة الحرب، وأخرى الخمر والموسيقى. ومن عنده الوقت لا يختبر هذه الألغاز. " هل تظن أن الله سيتنازل ويحاسب دودة أرض مثلي؟ لا أظن ذلك! أدرك تمامًا بأني "لم آتِ إلى هذا العالم لأعيش كحصان أو كثور. الحيوانات فقط تعيش لتأكل. أنا أخلق العمل لنفسي ليلاً نهارًا. لذلك فأنا أغامر بخبز يومي من أجل فكرة أعيشها. حياة الإنسان مليئة بالمرتفعات وبالوديان. وما يجعلني ذا قيمة أنني رميت العنان منذ مدة طويلة، لأن الصدمات لا ترعبني. في كلِّ مكان لي ذكرى. أفعل ما أريد، ولا يهمني إن متُّ. نعم، لقد تحررت من كلِّ القيود... تحررت لأصبح إنسانًا من جديد. ...

- إذًا ارقص... هيا... ارقص، ولتذهب الدواة والأقلام إلى الجحيم، ولتلحق بها الأملاك والأشغال... الآن أصبحت تعرف لغتي. لو استطاع الإنسان أن يرقص أفكاره لتفاهم كلُّ البشر.
- هيا... ارقص... ابعد عنك "الأسئلة الخالدة التي لا تنفع". تلك الأسئلة الغبية، لما... لماذا؟ لأن العقل لم يخترعها إلا "لتسمِّم القلب"!
"لا تجهد نفسك في البحث عن السعادة. فالإنسان غالبًا ما يبحث عن سعادته في مكان أعلى منه، وآخرون يبحثون عنها في مكان تحتهم. لكن السعادة تكون دائمًا في حجمهم. فلكلِّ إنسان سعادته التي تساويه"

" نعم، أنا لا أؤمن بأيِّ شيء، ولا بأيِّ شخص. لا أؤمن إلا بزوربا، ليس لأن زوربا أحسن من غيره – كلا، فهو بهيمة كغيره – ولكن لأن زوربا هو الوحيد الذي يقع تحت سلطاني، وهو الوحيد الذي أعرفه. أما الباقون فكلُّهم أشباح! عندما أموت سوف يموت كلُّ شيء معي. كلُّ العالم الزوربي سوف يغوص إلى الأعماق. "
"وأكثر من ذلك. أنا أتصور أن الربَّ يشبهني، لكنه لا يحمل بيده سيفًا ولا نيرانًا، بل يحمل قطعة كبيرة من الإسفنج مليئة بالماء، وكأنها غيمة مطر. وعندما تحضر إليه روح من الأرواح عارية تمامًا، تعيسة، بعد أن تاهت عن جسدها، يحدجها الربُّ بنظرة وهو يكتم ضحكته، متظاهرًا بالغضب، ويرفع صوته الجهوري: "اقتربي مني، أيتها الملعونة!" ويبدأ السؤال، ويأتي الجواب. وترتمي الروح عند أقدام الربِّ مسترحمة، ضارعة، متوسلة، فيبدأ بتعداد خطاياها وضحاياها. تبدأ دون أن تنتهي. يتململ الربُّ ضجرًا، ويتثاءب، ويصرخ بها: "اسكتي! فقد أصاب رأسي صداع من كثرة كلامك." ثم يمسح بإسفنجته كلَّ ذنوبها ويقول لها آمرًا: "هيا... اغربي عن وجهي، وادخلي الجنَّة. يا بطرس، دعها تدخل."
"فالله، كما يجب أن تعلم، سيد عظيم، والأخلاق العالية في أن تغفر وتسامح عندما تستطيع ذلك."

[Tony 124]

والله موضوع بياخذ العقل انا حبيتو كتير

[mhmary]

كاتب النص الأصلي : butterfly

هالمقطع ... انا كتير بحبو من الرواية
الحيوانات فقط تعيش لتأكل. أنا أخلق العمل لنفسي ليلاً نهارًا. لذلك فأنا أغامر بخبز يومي من أجل فكرة أعيشها.
"لا تجهد نفسك في البحث عن السعادة. فالإنسان غالبًا ما يبحث عن سعادته في مكان أعلى منه، وآخرون يبحثون عنها في مكان تحتهم. لكن السعادة تكون دائمًا في حجمهم. فلكلِّ إنسان سعادته التي تساويه"

اجو بوقتون هدول............ بيريحو الواحد من التعب شوي........

[اممي]

مافي شك انو نيكوس هو واحد من اعظم الكتاب في القرن الماضي واكثرهم انظلم لان ماخذ جائزه نوبل علما انو كان بيستحقها عن جداره الزلمه بلش راهب وبعدين صار بوذي واخر شي كان شيوعي ولكن قبل مايموت استنتج شي كتير عظيم انو الله فيك توصلو بكل الطرق عن طريق الصليب او رقصه المتصوف ولاالزهد او حتى الثوره وهذا الي كان مؤمن في بالنهايه انو الانسان هو نفس وين مارحت كتله مشاعر واحاسيس وبنصح كل الي قراء زوربا يقرا تقرير الى غريكو صحيح الكتاب شوي سميك ابو700 صفحه بس بيحكي فيه كيف اتشكل فكرو وعن ياجماعه كتير كتير حلو وحتى راح تشوفو اعظم من زوربا

[tiger]

انه الحب ...
انه اللذي يهب الحياة وهو اللذي يصنع المعجزات ...
لكن احيانا نحتاج لمن يذكرنا به!!!
Butterfly شكرا ....
(كالعادة ... حلو )

[maro18]

كاتب النص الأصلي : butterfly

هالمقطع ... انا كتير بحبو من الرواية
"لا تجهد نفسك في البحث عن السعادة. فالإنسان غالبًا ما يبحث عن سعادته في مكان أعلى منه، وآخرون يبحثون عنها في مكان تحتهم. لكن السعادة تكون دائمًا في حجمهم. فلكلِّ إنسان سعادته التي تساويه"

كتير حبيتها