تقنين الكهرباء في سورية

[I_Love_Syria]

قال وزير الكهرباء أحمد قصي كيالي إن وزارة الكهرباء لجأت إلى تقنين الكهرباء بسبب "الانخفاض الملحوظ في درجات الحرارة وزيادة الطلب على استجرار الطاقة لأجل التدفئة".

وأضاف في تصريح صحفي أن ما ساهم في اللجوء إلى التقنين "تعطل مجموعتي توليد وصعوبة تأمين الكمية الكافية من الغاز الضروري لتشغيل المجموعات والمحطات, إضافة إلى انحباس الأمطار على حساب غزارة ومنسوب السدود".

وشهدت مختلف المحافظات في سورية خلال الفترة الماضية ما يشبه التقنين لفترات طويلة تصل إلى أربع أو خمس ساعات يوميا, وهي أزمة تتكرر صيفا عند ارتفاع دراجات الحرارة وشتاء عند انخفاضها.

ولم تشهد سورية في هذا الشتاء أي موجة برد حادة ولا تزال درجات الحرارة في حدودها الطبيعية منذ دخول فصل الشتاء.

وقال وزير الكهرباء إن "الوزارة تتحرك بكل طاقاتها وإمكاناتها لمواجهة هذه المشكلة على عدة محاور حيث تعكف على استقدام خبراء من اليابان لإصلاح مجموعتي التوليد المعطلتين وتعمل بالتعاون والتنسيق مع وزارة النفط لتأمين احتياجات المجموعات والمحطات من مادة الغاز".

وأضاف كيالي أنه "سيتم إعداد برامج وجداول تحدد وتنظم مواعيد ومدد التقنين في كل محافظة على حدة سيتم تعميمها وإعلانها رسمياً خلال يومين", متوقعا أن يستمر نظام تقنين الكهرباء شهرين لحين إيجاد معالجة متكاملة للمشكلة، "إلا أن الوضع قد يتحسن حسب الأحوال الجوية".

ودعا الوزير المواطنين إلى ترشيد استهلاك الكهرباء حتى لا تؤدي زيادة الاستهلاك إلى أعطال تتسبب في انقطاع الكهرباء تضاف إلى مدة التقنين.

سيريانيوز

[I_Love_Syria]

هلأ السؤال الي بيفرض نفسه انو نحنا عنا مشكلة بالكهربا ولا لاء
من فترة قالو انو عنا فائض وبدنا نبعت للبنان مدري للأردن معد اتذكر المهم بدنا نبعت
هلأ صار ما عنا كهربا وبدهون يقطعوها
تناقض غريب عجيب

[saman]

لك يلعن !!
لك بالصيف بيقطعوها .. لانو البشر عمتشغل مكيفات وما عم تقدر تتحمل حر الصيف!
وبالشتي كمان بيقطعوها لانو البشر عمتشغل مدافئ وما عم تقدر تتحمل برد الشتي !
لك المي بيقطعوها من العشرة الصبح والكهربا صارت كل يوم تنقطع ساعتين !... مع العلم انو حضرتي ساكن بمنطقة سياحية وكلها فنادق ومطاعم ..! انو الفنادق والمطاعم بيدبروا حالهن بالمولدات .. بس باقي البيوت انشالله عمرها لا تدفا ولا تشرب مي ... اي يلعن اخت هالعيشة
مشكورة على هالخبر يلي بيسم البدن

[I_Love_Syria]

كاتب النص الأصلي : saman

مشكورة على هالخبر يلي بيسم البدن

مشكورة

خيو بالصيف الواحد بيتحمل حالو شوي بالشوب بس البرد مافي كائن بالأرض بيقدر عليه وخصوصي الولاد الصغار

[ayhamm26]

لك الله يعي هالشعب بس على هيك دولة

سعر برميل النفط انخفض من حوالي ال 200 دولار لتحت ال 50 دولار واسعار المازوت لسا متل ما هي

وهلق تقنين كهربا يعني المواطن ما ضل قدامو الا يكسر سحارات الخشب ويتدفا علين


دولة فاشلة بكل المعايير

[حموده ابو حميد]

بدنا نسأل السيد وزير الكهرباء يعني المشكلةمتوقفه على الحالة الجويه علما أن الطقس في هذه الايام بحالة جيده
وممكن يخبرنا من وين منجيب هالغاز لميشي الحال عشان نجيبو نحنا الطلبة

ونسمع أن الكرباء السورية تغذي بعض الدول المجاورة مع العلم أنها مفقودة لدينا نحنو السوريين

وسؤالي ليش ما بيصير هاشي بالدول التي تكون فيها درجات الحرارة منخفضه في معظم الأحول

شكراااااا لهذا الموضوع المهم لكافة الطلاب

[مايسترو]

لك الله يعي هالشعب بس على هيك دولة

سعر برميل النفط انخفض من حوالي ال 200 دولار لتحت ال 50 دولار واسعار المازوت لسا متل ما هي

وهلق تقنين كهربا يعني المواطن ما ضل قدامو الا يكسر سحارات الخشب ويتدفا علين


دولة فاشلة بكل المعايير

اليوم سمعت انو بمجلس الشعب طالبوا الحكومة انو تنزل اسعار المحروقات

[MadMax]

كاتب النص الأصلي : I_Love_Syria

حيث تعكف على استقدام خبراء من اليابان لإصلاح مجموعتي التوليد المعطلتين

اهاا



يعني لسا عم يفكرو بالحلول .... و لسا ما بدأوا بتنفيذ أي حل ..؟؟







عالهامش ... يا ريت يصير شوية مساواة بمدة التقنين بين كل المناطق

[MadMax]

كاتب النص الأصلي : I_Love_Syria

هلأ السؤال الي بيفرض نفسه انو نحنا عنا مشكلة بالكهربا ولا لاء
من فترة قالو انو عنا فائض وبدنا نبعت للبنان مدري للأردن معد اتذكر المهم بدنا نبعت
هلأ صار ما عنا كهربا وبدهون يقطعوها
تناقض غريب عجيب

نحنا عنا كهربا ........ طالما الشعب السوري ما عم يستخدمها




يعني بالصيف بصير تقنين لأنو الناس عم تشغل مكيفات
و بالشتي بصير تقنين ... لأنو الناس عم تشغل دفايات


دخلكون لشو منحتاج الكهربا لكن ....؟؟

[I_Love_Syria]

كاتب النص الأصلي : MadMax

نحنا عنا كهربا ........ طالما الشعب السوري ما عم يستخدمها




يعني بالصيف بصير تقنين لأنو الناس عم تشغل مكيفات
و بالشتي بصير تقنين ... لأنو الناس عم تشغل دفايات


دخلكون لشو منحتاج الكهربا لكن ....؟؟

معناها الحل انو الشعب يبطل يشغل مكيفات بالصيف والشوفاجات بالشتا بالصيف بيشلح وبالشتا بدل ما يلبس كنزتين بيساويهون تلاتة شغلتها بسيطة

عفكرة بالنسبة لموضوع المساواة بفترة قطع الكهربا بين المناطق أو المحافظات ففي مناطق بالشام ما بينقطع فيها الكهربا بالمرة

[ayhamm26]

كاتب النص الأصلي : مايسترو

اليوم سمعت انو بمجلس الشعب طالبوا الحكومة انو تنزل اسعار المحروقات

اي سلملي على مجلس الشعب, لسا هلق لسمحولن يطالبو معناها لبين ما توصل القصة للقيادة الحكيمة بتكون اسعار النفط رجعت طلعت

[MadMax]

كاتب النص الأصلي : I_Love_Syria

عفكرة بالنسبة لموضوع المساواة بفترة قطع الكهربا بين المناطق أو المحافظات ففي مناطق بالشام ما بينقطع فيها الكهربا بالمرة

اي ...
بكل المحافظات ... بتلاقي أحياء فيها مواطنين درجة أولى ....و أحياء درجة عاشرة

[mhsen77]

يا جماعة الخير و بما اني احد موظفي وزارة الكهرباء الرشيدة رح خبركن هالخبرية
التقنين قبل ما يبلش بالكهربا بلش بحضرتنا نحنا موظفين الوزارة وبما انو زادت السعار وزاد الطلب عالفلوس ومشان ما نهدرها عالملذات الشخصية شاف سيادة الوزير انو من الاحسن للموظف انو يقنن عليه ولغانا تعويض الاضافه
وبالنسبة للمجموعتين العطلانين (( في محطة الزارة الحرارية )) بحب خبرو لسيادة الوزير انو بيشتغلو عالفيول وانو اذا دبر الغاز ما بينفعون اصلا المشكلة مو بالغاز لانو العوازل ضمن المولد انفجرو مش لانو نقصون غاز يلي ما بيعرفوه هالمجموعتين المساكين
والله يجيرنا من الاعظم

[توم و جيري]

كهربا للبنان ومياه للاردن مع احترامي للشعبين ونحنا منكفر ومنعيش لينبت النعنع ..........

[MadMax]

كاتب النص الأصلي : mhsen77

يا جماعة الخير و بما اني احد موظفي وزارة الكهرباء الرشيدة رح خبركن هالخبرية

التقنين قبل ما يبلش بالكهربا بلش بحضرتنا نحنا موظفين الوزارة وبما انو زادت السعار وزاد الطلب عالفلوس ومشان ما نهدرها عالملذات الشخصية شاف سيادة الوزير انو من الاحسن للموظف انو يقنن عليه ولغانا تعويض الاضافه

اطلاع من هالبواب
قبل ما تحكوا بتعويض الإضافة .... ادفعوا فواتيركون

موظفين الكهربا بكل سوريا ما بيدفعو فواتير بيدفعو 180ليرة مقطوع عن كل دورة ( شهرين يعني )
و لأنو كهربتون ببلاش .. كل موظف بالكهربا بيصرف قد 20 مواطن عادي

[nour333]

كاتب النص الأصلي : توم و جيري

كهربا للبنان ومياه للاردن مع احترامي للشعبين ونحنا منكفر ومنعيش لينبت النعنع ..........

ليش النق ما شاء الله انتو عندكم كتير ميه بعدين انا بعرف جنوب سوريا كهربتها من الاردن

[I_Love_Syria]

كاتب النص الأصلي : nour333

ليش النق ما شاء الله انتو عندكم كتير ميه بعدين انا بعرف جنوب سوريا كهربتها من الاردن

ما هي المشكلة ما عنا مي كتير وبنعطي الأردن
وبعدين كيف الأردن بدها تعطي سوريا كهربا إذا قبل شهرين كانوا عم يقولوا انهن بدون يعطوا الأردن كهربا فكيف زبطت معك ما بعرف

[saman]

ما هي المشكلة ما عنا مي كتير وبنعطي الأردن
وبعدين كيف الأردن بدها تعطي سوريا كهربا إذا قبل شهرين كانوا عم يقولوا انهن بدون يعطوا الأردن كهربا فكيف زبطت معك ما بعرف

اختي .. سبحان الذي خلق هالحكومة .. شو كريمة ..... لأنو من كيسها عم تتبرع