تع دوّن تع دوّن تع - بلوغ سبوت / ما تمّ منه /

[Abu ToNi]

مرحبا شبيبة

من فترة طلعلنا حج ياسين بفكرة التدوين وعرفنا على شي اسمه عالم التدوين وكيف بيفتل وكيف بتطلع من الحيطان الفايتة فيك بالموضوع هاد :

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -
 

واللي كان السبب الأساسي لأكتر من 10 أشخاص ليفوتوا بعالم التدوين "بيناتن انا "
- بنصح الكل قبل الفوتة بالموضوع هون قراءة الموضوع تبع ياس بالتفصيل الممل لأن اذا ما فهمت شو هية المدونة ما فينك تعمل شي بالموضوع هون -

وكان في حلم او شبه حلم انه ينعمل شبكة أخوية ( واللي على فكرة بديت تنشأ بشكل أو بآخر .. حالياً في أكتر من 15 مدونة جدا راقيين بمجتمع المدونات السورية أصحابن أعضاء عنا بالأخوية والحلو فيها أنه المدونات كلها بتحسها "أخوية " يعني بحكي عن حالي بأن مدونات الاخويين فيها شي مميز من التفكير أو العرض أو حتى البساطة والمتعة )


ومن فترة كمان طلعتنا الحجة مرسيل بفكرة أنه كل شخص مدون لازم يلعب دور فعال بعالم التدوين ويعرف بقية الشعب على هلعالم الرائع لنتساعد كلنا بتطوير الشي اللي اسمه " مجتمع المدونات السورية "

محسوبكم ما بيطلع بأيده يشجع حدا وما بيطلع بأيده يمسك بأيد حدا ويقطعه السكه .. فانه يعني خطرلي غير طريقة بقدر ساعد فيها الأشخاص اللي فعلا حابين يفوتوا بعالم التدوين ، العالم اللي كتير من اللي بعرفن بيترددوا من الفوتة عليه لأسباب تقنية بحته متل انه ما بيعرف كيف يغير القالب ما بيعرف كيف يدير المدونة تقنيا
فخطرلي انه ليش ما بفيد العالم بهلكام معلومة برمجية اخدتها بالجامعة ؟

لأني تذكرت وقت بلشت اعمل مدونتي لاقيت أكتر شي مشاكل تقنية وكفرته لزين لبين ما مشي حالي وعرفت اشتغل بالمدونة
فالموضوع هون هوي مخصص لكل شخص حابب يغير بمدونته ( لون الخط الافتراضي - حجم الخط الافتراضي - محاذاة الأحرف بالمدونة-مكان القوائم - حجم القوائم - أبعاد المدونة ككل - حجم الصورة بالبانار الفوقاني -اضافة غنية بتشتغل من المدونة ذاتها - اضافة ألبوم بصور انت بتنقيها - .. الخ من حشكيل المدونات) أو صاير معه مشكلة تقنية وما عم يلاقي الها حل أو حابب ينسف مدونته عن بكرة أبيها ويغير القالب تبعها فأنا جاهز بالخدمة وبتعديل القوالب وتعريبا .

بتمنى أقدر فيدكن على قدر استطاعتي

هاموش : بدي حاول كل فترة والتانية الطشلي كام فكرة من النت وجبلكن ياها لحتى جماعة المدونات الماشي وضعن تقنيا يطوروا حالن ويطورا مدوناتن .

[Nay]

اي الله وايدك..
ياريييت.. انا اول وحدة ابو طوني هااااا.. حجزت الدور.. عندي مشاكل كتير
بس بعد الامتحانات

[Sarita]

انو من زمان كنت فاتحة Blog وحدة بالعربي ووحدة تانية بالفرنسي
بس مشكلتي اني نسيت اسم المستخدم والباسورد
وما بعرف باي موقع اكزاكتلي
لانو كنت مشغولة ومافضيت حط اللي كتبتو من خواطر
وكمان كسلانة كتيير انا بفضل اكتب ع ورق احسن من الكيبورد
اني واي ميرسي اب طوني شجعتني تأرجع افتح مدونة بعد ما قريت موضوعو لياس مابعرف كيف غفلت عنو

يسلّمن ناطرة الجديد

[yass]

كلام جميل!


حيو ابو طوني خيّال البلوغ سبوت


ع سيرة مدوني أخوية... من دواعي الفخر الشديد انو حالياً مدوني أخوية رغم انو ما صرلون زمان و مانون كتار بس متصدرين ضمن التدوين السوري و بقوة

[Nay]

كاتب النص الأصلي : yass

كلام جميل!


حيو ابو طوني خيّال البلوغ سبوت


ع سيرة مدوني أخوية... من دواعي الفخر الشديد انو حالياً مدوني أخوية رغم انو ما صرلون زمان و مانون كتار بس متصدرين ضمن التدوين السوري و بقوة

هلأ ياسين في تجمع للأخويين هيك يعني بمعنى تجمع..
ولا عم يصير متل الاتفاق.. يعني الغير منظم..؟؟!!!!!!!

[yass]

كاتب النص الأصلي : Nay

هلأ ياسين في تجمع للأخويين هيك يعني بمعنى تجمع..
ولا عم يصير متل الاتفاق.. يعني الغير منظم..؟؟!!!!!!!

لأ هو مافي تجمّع, بس يعني في مجموعة شباب و صبايا من أخوية ناشطين بحقل التدوين و لامعين جداً, و من دون أي مبالغة عملو ثورة في التدوين السوري من كم شهر و جاي...

[saman]

انو ابو طوني انتي واعدني تهديني مدونة بس لخلص بكلوريا
ازا ما بتزبطلي مدونة بلاك اند وايت على كيف كيفك .. بشختك ها

هع هع .. احلى ابو طوني

[butterfly]

أي انا كمان سعيدة بالمدونات الأخوية
بحس أني فيها شيء كتير مميز


بس بحب أخبركن بكل أسف أني قررت أنتقل ع الورد بريس

[أإأبو العبد]

هاموش: كتبت هالرد بهالموضوع قام نط عموضوع تاني


مابعرف ليش فكرة التدوين مابتستهويني يمكن لانو بدا متابعة مستمرة حاولت اعمل مدونة بس مابعرف ليش على طول مليت

بس سؤال شو الفائدة من التدوين يعني اصحاب المدونات بشو بيحسو وهن عميدونو

وهي لكل اصحاب المدونات

[Abu ToNi]

كاتب النص الأصلي : Nay

اي الله وايدك..
ياريييت.. انا اول وحدة ابو طوني هااااا.. حجزت الدور.. عندي مشاكل كتير
بس بعد الامتحانات

لا تاكلي هم امتحاناتي بالعادة باخد كتير استراحات بالدراسة يعني فبقدر ساعدك باللي بدك ياه
بقولولك دق الحديد وهوي حامي من هلق حطي ايا شي لازمك وابو طونياه بالخدمة

كاتب النص الأصلي : Nay

هلأ ياسين في تجمع للأخويين هيك يعني بمعنى تجمع..
ولا عم يصير متل الاتفاق.. يعني الغير منظم..؟؟!!!!!!!

هوي مانه منتظم بالمرة
الصاير بان الاخويين عندن مدونات بعض وكل واحد ضايف التانيين علقائمة عنده
عقبال ما تصيري معنا بالقائمة
" على فكرة انا كتير متفائل بمدونتك وبتوقع بدها اتضيف شي جديد كليا على ساحة التدوين "

كاتب النص الأصلي : Sarita

انو من زمان كنت فاتحة Blog وحدة بالعربي ووحدة تانية بالفرنسي
بس مشكلتي اني نسيت اسم المستخدم والباسورد
وما بعرف باي موقع اكزاكتلي
لانو كنت مشغولة ومافضيت حط اللي كتبتو من خواطر
وكمان كسلانة كتيير انا بفضل اكتب ع ورق احسن من الكيبورد
اني واي ميرسي اب طوني شجعتني تأرجع افتح مدونة بعد ما قريت موضوعو لياس مابعرف كيف غفلت عنو

يسلّمن ناطرة الجديد

الله حيو الحماس ولتفاعل
علسريع فوتي على

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -
 

وبـ 5 ثواني بتكوني عاملة اشتراك عندن
الاشتراك فيه 3 مراحل
بس تخلصي من المرحلة الاخيرة طيري لهون لقلك كيف بتتعاملي مع المدونة وكيف بتغيري الستايل تبعها
سعدو يقويكي

كاتب النص الأصلي : yass

كلام جميل!


حيو ابو طوني خيّال البلوغ سبوت


ع سيرة مدوني أخوية... من دواعي الفخر الشديد انو حالياً مدوني أخوية رغم انو ما صرلون زمان و مانون كتار بس متصدرين ضمن التدوين السوري و بقوة

الكل بيعرف أنه أبو طوني آخر شخص بالبشرية ببيع حكي وبصف جمل أدبية
ما رح كترن كتير بدي أكتفي بـ " ميرسي الك "

كاتب النص الأصلي : saman

انو ابو طوني انتي واعدني تهديني مدونة بس لخلص بكلوريا
ازا ما بتزبطلي مدونة بلاك اند وايت على كيف كيفك .. بشختك ها

هع هع .. احلى ابو طوني

ابو طوني ما بتصير كلمته تنتين
أحلى مدونة لميرو كهدية نجاح
وعندي عرض الك
اذا بتجمع أكتر من 180 بالبكلوريا رح تكون المدونة بدومين مدفوع لمدة سنة
واذا ما صار هلشي وجمعت أقل بتكون وفرت علينا 10 دولار

كاتب النص الأصلي : butterfly

أي انا كمان سعيدة بالمدونات الأخوية
بحس أني فيها شيء كتير مميز


بس بحب أخبركن بكل أسف أني قررت أنتقل ع الورد بريس

ليش ولو
اذا مشان الستايل فالبلوغ سبوت بتقدري تركبي عليه ستايلات نفس تبع الوورد بريس 100 %
واذا مشان الحجب فأنتي بالاصل ما عندك مشكلة بهلموضوع فليش يعني هلخطوة هي
بعد ما تعلموا العالم على صفحتك جاية تفقسي كل الطبخة

كاتب النص الأصلي : أإأبو العبد

هاموش: كتبت هالرد بهالموضوع قام نط عموضوع تاني


مابعرف ليش فكرة التدوين مابتستهويني يمكن لانو بدا متابعة مستمرة حاولت اعمل مدونة بس مابعرف ليش على طول مليت

بس سؤال شو الفائدة من التدوين يعني اصحاب المدونات بشو بيحسو وهن عميدونو

وهي لكل اصحاب المدونات

انا بعرف بان طعم الفريز طيب وبعرف أني حاليا كتير بنبسط وقت بينحط قدامي صحن فريز
بس اني اشرحلك بشو حس وانا عم آكله ما رح اقدر اعمل هلشي لو شو ما كتبتلك
اذا ما انت جربت بنفسك اتذوق فرحتك وقت بتشوف عداد زوار مدونتك عم يزيد .. وقت بتلمس تفاعل العالم مع كلمتك .. وقت بتعرف أن العالم عم تقرالك الأفكار اللي انت عم تكتبا متلك متل أي كاتب كبير بهلأيام .. الشي اللي كتاب الماضي ما حصلوا عليه حتى !!
وقت بتحس انه في عندك بيت صغير انت الرب فيه بتقدر تغييرله ألوان الديكور على كيفك بأي لحظة
أول فترة بتتحول المدونة لهم وانا عشت هلفترة
واللي بفوت على مدونتي بلاحظ بأرشيفي عندي انقطاع تقريباً شهرين كاملين ما كتبت فيهن ولا حرف
حسيت بأن الشغلة فاضية وما الها طعمة وبأن مستحيل مع الأيام تصير مدونتي مستحبة من العالم خصوصا اني ما كنت كاتب ولا مقال من قبل " الا ما ندر طبعاً " وبعرف مسبقا شو وضعي بالكتابة أو بالاصح كنت بتوقع أني بعرف
نصيحتي الك رجاع عيش مدونتك ودخول أكتر بمجتمع التدوين لأن عنجد مجتمع راقي جدا وفيه متعة مميزة ما بتشوفها بأي محل تاني




هاموش 1: رح انبلش من بكرا بالدورات التعليمية المصورة
هاموش 2 : شكرا علتثبيت

[Sarita]

الي سؤال اب طوني
انو مدوني اخوية ع شو بيقتصر التدوين تعولون؟
ع خواطر اما مختارات من كتاباتون
لانو جايي ع بالي الّف رواية
وكمان في الي مشكلة بالاسم ما بعرف شو بدي اختار اسم

[satoman]

محسوبكم ما بيطلع بأيده يشجع حدا وما بيطلع بأيده يمسك بأيد حدا ويقطعه السكه

لا وسعدو كفو ياأبو طوني كفو

[Nay]

كاتب النص الأصلي : Abu ToNi

لا تاكلي هم امتحاناتي بالعادة باخد كتير استراحات بالدراسة يعني فبقدر ساعدك باللي بدك ياه
بقولولك دق الحديد وهوي حامي من هلق حطي ايا شي لازمك وابو طونياه بالخدمة

هوي مانه منتظم بالمرة
الصاير بان الاخويين عندن مدونات بعض وكل واحد ضايف التانيين علقائمة عنده
لازم يصير جدي اكتر مو هيك.. لازم يصير دعم لبعض أقوى من هيك.. ويصير لدعم بطريقة مدروسة وممنهجة..لأنو بس اللي بيعرفو بعض هنن اللي بيدعمو بعض يعني اذا ما كنت رفيقي ما بتحط مدونتي عندك بالقايمة
عقبال ما تصيري معنا بالقائمة
" على فكرة انا كتير متفائل بمدونتك وبتوقع بدها اتضيف شي جديد كليا على ساحة التدوين "

شكراً ما بعرف ..يمكن انت شفت مدونة زوجي طالب ابراهيم واللي كتير بحاجة لتزبيط تقني
اما انا فقريبا جدا

هاموش 1: رح انبلش من بكرا بالدورات التعليمية المصورة
اي هي الطريقة ممتازة وافضل من السؤال والجواب وكل درس منسألك عليه لوحدو
هاموش 2 : شكرا علتثبيت

وانا كمان بشكر التثبيت

[i m sam]

اذا بتجمع أكتر من 180 بالبكلوريا رح تكون المدونة بدومين مدفوع لمدة سنة
واذا ما صار هلشي وجمعت أقل بتكون وفرت علينا 10 دولار

السؤال رقم واحد:
كيف بدي اعملها هي انو المدونة مابعرف شو بتتسمى بس انو يكون الرابط باسم مدونتي مو تابع للبلوغ سبوت " متل تبع الحج ياسين يعني " ولمين بدي ادفع وكيف ؟؟ هات مما عندك

[Abu ToNi]

كاتب النص الأصلي : Sarita

الي سؤال اب طوني
انو مدوني اخوية ع شو بيقتصر التدوين تعولون؟
ع خواطر اما مختارات من كتاباتون
لانو جايي ع بالي الّف رواية
وكمان في الي مشكلة بالاسم ما بعرف شو بدي اختار اسم

القاعدة الماسية بعالم التدوين انه مافي قواعد للتدوين
مدونات الأخوية ما بتحمل ايا طابع معين وما الها اي توجهات بحكم أنها مدونات شخصية وتجاوزا سميناها مدونات أخوية على اعتبار انه اصحابها أعضاء بالاخوية بس هلشي ما بيعني ابدا انه في توجه معين
فاللي بدك ياه واللي بتحبي تكتبيه بكون هوي الشي "الصح" اللي لازم تكتبيه
فاذا على بالك تاليف الروايات بكون شي كتير عظيم انك تكوني من القلائل اللي بيكتبوا بشكل متتابع داخل مدوناتن

مشان الأسم عيفيا على الله
طلع علي صيت "النقاق" لان كلما شوف واحد اسئله على شو بدك سمي مدونتي
عمليلك كاسة شاي تقيل "أو عرق اذا ما عندك مشكلة مع الكحول" ومخمخي وشوفي اللي بده يطلع معك
وبكل الأحوال الاسم امتى ما حبيتي تغيريه بيتغير

اذا عملتي مدونتك فوتي على هاد الموقع

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -
 

هاد تجمع للتدوين السوري سجلي مدونتك فيه لأن أغلبية الزوار بيجيوا من هاد الموقع
وبنفس الوقت تصفحي مدونات البقية وأعطي رأيك الصريح بالشي المكتوب فيها
هلشي بيعمل شعبية كتير كبيرة لمدونتك وبعرّف العالم عليها بشكل كتير حلو

اي شي ممكن اخدمك فيه لا تترددي بالسؤال
ومبروكة المدونة ..

كاتب النص الأصلي : satoman

لا وسعدو كفو ياأبو طوني كفو

لا تقول فول ليصير بالمدري وين

كاتب النص الأصلي : Nay

لازم يصير جدي اكتر مو هيك.. لازم يصير دعم لبعض أقوى من هيك.. ويصير لدعم بطريقة مدروسة وممنهجة..لأنو بس اللي بيعرفو بعض هنن اللي بيدعمو بعض يعني اذا ما كنت رفيقي ما بتحط مدونتي عندك بالقايمة

شكراً ما بعرف ..يمكن انت شفت مدونة زوجي طالب ابراهيم واللي كتير بحاجة لتزبيط تقني
اما انا فقريبا جدا

اي هي الطريقة ممتازة وافضل من السؤال والجواب وكل درس منسألك عليه لوحدو

وانا كمان بشكر التثبيت

بيني وبين هيك حلو الجو الحالي وشخصيا بشوفه بمثالي انه كل واحد بعبر بصفحته عن الشي اللي بيخطرله بصفة فردية .. يعني موضوع فردي بحت ما فيه موانات وما فيه خطوط عريضة
قصص الدعم والمشاركة حسيت فيها بأكتر من مرة خصوصا أول ما فتت على التدوين وقت ما كان حدا يحطلي تعليق على كتاباتي غير شيخنا ياسين لهيك ضفت هلق هاموشاية بالخط العريض لأخير الرد

بصراحة ما عندي ذاكرة قوية بخصوص الاشخاص والاسماء بس على الاغلب فايت على صفحته وقاري شي من كتاباته لأن هاد الاسم ابدا مو غريب عني .. تحياتي الك واله
وبرجع بعرض خدمتي لأي شي تقني انا مستعد ساعد بالحلول

كاتب النص الأصلي : i m sam

السؤال رقم واحد:
كيف بدي اعملها هي انو المدونة مابعرف شو بتتسمى بس انو يكون الرابط باسم مدونتي مو تابع للبلوغ سبوت " متل تبع الحج ياسين يعني " ولمين بدي ادفع وكيف ؟؟ هات مما عندك

بعد ما بتفوت على موقع البلوغر blogger.com
فوت على
اعدادات --- النشر
بطلع بوجك الصفحة هي


متل مانك شايف بالصورة في شي بأول سطر موجود
" تبديل إلى مجال مخصص"
بتنقر عليها بتصل لصفحة اللي بتنقي فيها اللينك اللي بدك تشتريه + بتنقي اللاحقة اللي بدك ياها
net , org, com , info , biz
وبعدها في صندوق بجانب محل اللينك اللي انت اخترته مشان التأكد من امكانية حجز اللينك هاد الك وانه مافي من قبل شخص تاني على الانترنت سبقك وحجزه

من بعد هي الخطوة علمية الشراء روتينية كأي سلعة على النت ، وطبعا القصة كلها بتصير عن طريق الغوغل نفسه
الكلفة 10 دولار أميركي = 500 ليرة سورية لمدة سنة كاملة مدفوعة لمرة واحدة فقط
مشكلة الشراء بتتمحور بتأمين بطاقة الفيزا أو بطاقة المساتر اللي بدك تدفع عن طريقا

انا وقت اشتريت التجأت للمحروسة اختي ببلاد المهجر وشحدنا منها الـ 10 دولار
بس عم يقولوا الشباب انه في بطاقة اسمها كاش-يو cash-u موجودة بسوريا بتقدر عن طريقا تشتري أشيا على النت بدك تشوف أحمد المنسق عنده خبره بهي القصة بالتحديد
انا بعرف أكتر من شخص عنا بالبلد صايرة شغلته هلقصص ( حجز مساحات - شراد لينكات - شراء بضائع ) عن طريق النت ، بحبش علين حوليك الا ما يلتقى واحد منن

هاموشاية اقتراح صغير للكل
انه وقت واحد بيعمل مدونة أو بحط سؤال بخصوص مدونته
خليه يحطلنا رابط المدونة تبعه
اللي بده يقول دعاية خليه يقول.. المهم نقدر نتواصل مع البقية ونشارك البعض بالتدوين
وبنفس الوقت نكون على اطلاع على مدونات البقية ونشارك بتشجيع الآخرين على الكتابة عن طريق كتابة آرائنا الموضوعية

[Sarita]

مشان الأسم عيفيا على الله
طلع علي صيت "النقاق" لان كلما شوف واحد اسئله على شو بدك سمي مدونتي
عمليلك كاسة شاي تقيل "أو عرق اذا ما عندك مشكلة مع الكحول" ومخمخي وشوفي اللي بده يطلع معك
وبكل الأحوال الاسم امتى ما حبيتي تغيريه بيتغير

نقيت اسم ايتس اوكي
ورح سجلها بمجتمع المدونات
انو ايه كاش يو مسجلة انا فيا وفيا امتيازات منيحة بس ما بعرف بعمري ما استعملتا لهلكارد منوب منوب
بس فيك تسجل فيا بالمجان والشغلة منيحة ما فيا اي صعوبات

وهي مدونتي انو حطيت فيا هالزفت التوبيك يعني بس مشان ما تقعد فاضية لانو الالهام ما عاد منيح معي الهيئة بدي كاسة ع قولتك

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -
 

وين البقيي شكلي لحالي انا بهالدومين

يسلمن اب طوني

[Nay]

thttp://talebibrahem.blogspot.com/
هي المدونة ابو طوني..اول شي ما بعرف ليش عم يطلع عنوان القصة على اليسار
تاني شي بحب انو يكون الخط tahome شو ما كتبت يضل نفسو
وفي مساحات كتير ماالها طعمة طول وعرض وهيك..
شو رأيك

[Abu ToNi]

كاتب النص الأصلي : Sarita

نقيت اسم ايتس اوكي
ورح سجلها بمجتمع المدونات
انو ايه كاش يو مسجلة انا فيا وفيا امتيازات منيحة بس ما بعرف بعمري ما استعملتا لهلكارد منوب منوب
بس فيك تسجل فيا بالمجان والشغلة منيحة ما فيا اي صعوبات

وهي مدونتي انو حطيت فيا هالزفت التوبيك يعني بس مشان ما تقعد فاضية لانو الالهام ما عاد منيح معي الهيئة بدي كاسة ع قولتك

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -
 

وين البقيي شكلي لحالي انا بهالدومين

يسلمن اب طوني

شو مشان مشروع اسم المدونة برعّب
هلق بشحطن للأخويين من دانن وبنزلن لينكات مدوناتن هون لا تاكلي هم

كاتب النص الأصلي : Nay

thttp://talebibrahem.blogspot.com/
هي المدونة ابو طوني..اول شي ما بعرف ليش عم يطلع عنوان القصة على اليسار
تاني شي بحب انو يكون الخط tahome شو ما كتبت يضل نفسو
وفي مساحات كتير ماالها طعمة طول وعرض وهيك..
شو رأيك

همممممممم
قصة مكان العنوان محلولة وشغلتها كود مألف من سطر واحد .. لأن القالب الافتراضي مصمم لمدونة انكليزية لهيك مفروض على المستخدم العربي يضيف كود المحاذاة تبع اليمين
وتغيير الخط الافتراضي كمان عملية محلولة
حتى تغيير ابعاد المدونة مانها بالشغلة المستحيلة بس بتاكل شغل
وانا عم اتصفح المدونة انتبهت على نموذج التعليق وحسيت فيه شي غلط ولازمه شغل كمان
لهيك برأي حرام تبقى المدونة على القالب الافتراضي تبع البلوغ سبوت وحرام الشغل اللي بدها تاكله على قالبها الافتراضي
ما عم احكي من باب افتراضي او احترافي بس ممكن بحركة بسيطة ( نسخ نص + لصق نص )
تتحول المدونة من النمطية للتميز ويصير الها شكلها الخاص والمميز

تركيب القالب عملية جدا جدا جدا بسيطة
أصعب شغلة فيها هوي اختيار القالب .. من مبدأ إذا بدك تحيرو .. خيرو
الخيارات غير محدودة ومفتوحة الأبعاد ضمن ملايين القوالب المجانية وهلشي بخلي العالم تحتار وتصعب المهمة عليها

المشاركة اللي بعد هي تماما رح حطلك بالصور كيف بيتركب القالب على المدونة ( القصة متل ما قلتلك مجرد عملية نسخ نص + لصق نص .. بس انه بحط شرح تفصيلي للمحل اللي يفترض ينحط فيه النص )
حاليا فوتي على غوغل واعملي بحث على
blogspot template free
بده يطلعلك ملايين المواقع اللي بتعطيكي قوالب مجانية وكل قالب أحلى من التاني
شوفي انت القالب اللي بيعجبك من ناحية الأبعاد + التصميم + الألوان وبعتيلي اللينك لعدلك على القالب وزبطلت المحاذاة وبقية الحشكيل

شخصيا لهلق ركبت 5 قوالب لـ 5 مدونات جبتن كلن من الموقع هاد

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -
 

لهيك بنصحك تباشري بالبحث فيه لأن على الأغلب رح تلاقي فيه الشي اللي بدك ياه
اول ما بتفوتي عليه بتشوفي القوالب مصنفة لمجموعات ( بحسب النمط العام للمدونة - بحسب شكل المدونة - بحسب ألوان المدونة )
بعتقد الشي اللي بينفعك لتستعمليه لمدونة بتحمل الطابع السياسي والاجتماعي وكتابات أبدية جديّة بتلاقيه ضمن هي المجموعات


حاليا القالب اللي عم تستعمليه بصنف ضمن مجموعة
الفرق بينه وبين الـ انه في زيادة شريط افقي بأول الصفحة بتقدري تربطي فيه لينكات ثابتة " يعني بتقدري تعملي شي متل اللي عنا بالاخوية : لوحة التحكم - س و ج - .. "
فوتي على القوالب واعملي لكل واحد

الموقع هاد عامل تجربة حية لكل قالب .. بعد ما تختاري صورة القالب بنصف الصفحة الخاصة بالقالب في لينك بتشوفيه Click here For Demo test
وقت بتفقشي عليه بتفتحلك مدونة تم تطبيق القالب عليها بشكل مباشر ، هيك بتقدري تشوفي شو الشكل اللي حتصير فيه مدونتك لو صار واخترتي القالب هاد

لبين ما زبط الصور تبع الشرح بحبشي بالموقع لبين ما تشوفي القالب اللي بيزبط مع زوقك احفظي اللينك تبعه على جنب لتقدري ترجعيله بسرعة
طبعا الصور اللي فوق بالهيدر بتتغير بحسب الطلب حتى الألوان بتتغير .. اهم شي واحد يشوف مساحة القوائم ومكان تموضعها وحجم الهيدر وهلقصص

هاموش :
لناي : شوفي هلكام مثال عن قوالب بتخيل رح يعجبوكي خصوصا أول واحد قريب من روح الستايل الحالي بس متطور اكتر منه بكتير وبيحمل طابع احترافي كتير ظريف

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -
 

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -
 

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -
 

لساريتا : شوفي هلكام قالب ..في حال قررتي تحولي المدونة لطابع انوثي شوي بتخيل رح يعجبوكي

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -
 

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -
 

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -
 

وهاد بالتحديد

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -