ذكريات نسيها الزمن

[قهوة دايمي]

"حارة نسيها الزمن " عنوان المسلسل المشهور .. والقديم جدا ً
ومنو اشتقيت عنوان للخربشة الواردة ادناه

عن ذكريات منسية او نسيها الزمن ,,, هي في الحقيقة صور وافكار لأحداث تذكرتها وانا اقرأ وابحبش في هذا المنتدى عن شيء يعيدني فعلا الى مدينة دمشق .. كوني أنا المبعد عنها منذ حوالي الخمس سنوات .. "دمشق مدينة نحبها ولا تحبنا " الله يرحمك يا ماغوط

بداية الذكرى كانت مع احداث يوم الجمعة في مدينة دمشق ... بما انو اليوم كان الجمعة كمان
تذكرت اديش كان حلو هاليوم .... واديش كان بشع وممل بنفس الوقت

كان حلو يوم الجمعة .. لأنو كان يوم العطلة وفيه رح نرتاح من قرف المدرسة والاساتذة
ولأنو .... بس أصلا ماكان في سبب تاني ليجعل يوم الجمعة انو يكون يوم حلو ...
مش سامع المتل اللي بيقول ( أطول من يوم الجمعة ) فعلا كان يوم طويل وبشع
فمنذ الصباح الباكر بتفيق على صوت بياع الحليب .. او بياع الخبز اليابس ( للي ما بيعرفوه هوي ما بيبيع خبز يابس لاء هوي بيشتري كل شي ما بدك ياه بالبيت )
وبعد معزوفة هالأصوات الشويرية بيجيك صوت اهلك عم بفيقوك عشان بدن يتفرجوا عالتلفزيون
وبيطلعلك عمك الاصلع تبع برنامج صباح الخير .. وببلش القرف المزبوط .. و ما بتسترجي تقول انو بدك تنام للضهر .. لأنو خلص راحت عليك
يعني معقول يا عالم .. عنا أفخر الانتاجات التلفزيونية .. واجمل المسلسلات بالعالم .. ويوم الجمعة لازم قرف هالبرامج المعتة .... ما علينا .. بنقوم من الفرشة وبوجك عند بياع الفول ...
وكأنو فرض لازم تنلطع ساعة بعجقة الجناني "بياع الفول" وتجيب خبز ..
وبعد صلاة الجمعة والخطبة العصماء من شيخ الحارة بترجع لبرامج بتعل القلب على التلفزيون (عفوا هذا الحديث قبل وجود الستلايت "على الاقل عنا " ) وبيطلعلك مباراة باهتة فترة العصر .. رحمة الله عليك يا بوظو ...يييييييييييي علينا فترة المسا انسا بتصيع شوي بالحارة وبتطلع بتحط كتبك عا برنامج يوم السبت وبتنام بكير لأنو دوامك الصبح ..
فعلا كان يوم الجمعة كابوس بشع ...

لكن مع كل القرف اللي ربما نسيت اوصفو .. تبقى تلك اللحظات علقانة براسي ..
وابقى احن إلى الشام ..
راجعلك

[وردة القدس]

ان شاء الله بترجع على بلادك لانو ما في اغلى من البلد

بس على العكس يوم الجمعة كتييير حلو بيكفي احساسك انو يوم مبارك

انا كتييييييييييير بحب يوم الجمعة اي بستنا ستني والله

شكرا الك اخوي على الخربشات

بس بلا من اليأس

[قهوة دايمي]

وردة القدس كلك زوق

وأكيد لا حياة مع اليأس .. وإلا ما كنت كتبت هالخربشات ..

وبلادي هيي القدس .. وصفد ويافا .. والخليل ..

شكراً جداً جزيلاً

[وشم الجمال]

الله يسامحك على هالذكريات...

جد اصعب يوم الجمعة كلو شغل وحراثة وكأنو بيستنوا هاليوم منشان ندفع ضريبة دراستنا فيه...

غسيل وتعزيل وتنظيف وطبخ وقرف....

ولما الواحد ييجي يتفرج عالتلفزيون طفيه مو عندك دراسة!!!

يعني ذكريات عندك بس احداث مستمرة حتى الله يكتبلنا الراحة ....

ربنا يرجعك مو بس عدمشق ربنا يكتبلك كما صلاة بالاقصى ويخليك تشم ريحة تراب فلسطين وتعانقو متل الطفل يللي بعانق امو بعد غياب وشوق....

راقص على الجراح يا صديقي