استفتاء لتحديد الانتماء في الاخوية

[اممي]

نتيجة للقيل والقال والاراء الي وردت بالفترة الاخيرة علي ان الاخوية منتدي تابع لدين محدد والاعضاء الي من افكار وديانات اخري هم ضيوف علي المنتدي
حبيت انشر هالاستبيان لنعرف ان نحنا مو بس بالاخوية لا بهالوطن الي عايشين (اذا حدا مومن ان هاد وطن عنجد) شو انتمائاتنا
ياريت الكل يشارك وعلي اساس الاستفتاء راح شوف اذا راح قدم طلب هجرة من هالمنتدي (متل ماعملت معا وطني ) ولا لا
اممي

[اممي]

رجاءا ماحدا يتزاكا ويحط خيارين
يعني مابدي اقرا شي من مبد انا مسيحي سوري او انا مسلم سوري
بدي الانتماء الاكثر او الاقوي عند الشباب والصبايا الي بالاخوية لنعرف الله وين حاطنا

[L.A.]

أنا اخترت سوريا
و اللي سمع كلمة الرئيس مبارح بيعرف ليش اخترت سوريا

[باشق مجروح]

الصراحة أنا انتمائي الغالب أكتر طائفي
يعني مرات بحس انو الشيعي الأفغاني أو الايراني بيعنيني أكتر من السوري من غير معتقدات
أنا بحب الصراحة وما بحب المتاجرة والكزب
أممي انتي طلبت انو الواحد يحط رأيو الصريح مشان نعرف الله وين حاططنا.
أنا هاد شعوري بدون مجاملات.
ورغم هالشي يعني ازا بصير شي لشب عربي أو بيحتاجني ما بعرف كيف في رابط بيشدني الو..
مبرسي عالموضوع

[was616im]

انا حطيت الجواب الاخير يعني ولا وحدة من اللي فوق
لانو الاعضاء اللي باخوية مانهن من دين واحد ز لا من بلد واحد ولا من حزب واحد
برايي هالتنوع باخوية عم يعطيها صفة رائعة انو هيي قريبة من العالم الواقعي و ليست عالم وهمي بالانترنت و بس

[اممي]

كاتب النص الأصلي : باشق مجروح

الصراحة أنا انتمائي الغالب أكتر طائفي
يعني مرات بحس انو الشيعي الأفغاني أو الايراني بيعنيني أكتر من السوري من غير معتقدات
أنا بحب الصراحة وما بحب المتاجرة والكزب
أممي انتي طلبت انو الواحد يحط رأيو الصريح مشان نعرف الله وين حاططنا.
أنا هاد شعوري بدون مجاملات.
ورغم هالشي يعني ازا بصير شي لشب عربي أو بيحتاجني ما بعرف كيف في رابط بيشدني الو..
مبرسي عالموضوع

بشكر صراحتك
بكل الاحوال انا تارك مناقشة الردود لبعد 4 ايام من الاستفتاء لان مابدي حدا يتاثر راي بمشاركتي

[اممي]

كاتب النص الأصلي : was616im

انا حطيت الجواب الاخير يعني ولا وحدة من اللي فوق
لانو الاعضاء اللي باخوية مانهن من دين واحد ز لا من بلد واحد ولا من حزب واحد
برايي هالتنوع باخوية عم يعطيها صفة رائعة انو هيي قريبة من العالم الواقعي و ليست عالم وهمي بالانترنت و بس

سوالي كان عن انتماءك الشخصي ...
يسلموا علي مرورك

[was616im]

كاتب النص الأصلي : اممي

سوالي كان عن انتماءك الشخصي ...
يسلموا علي مرورك

خيو بدك ما تواخذني بس الهيئة متقل انا هالمرة.....
شو يعني انتمائي الشخصي؟؟
شو هاد؟

[اممي]

كاتب النص الأصلي : was616im

خيو بدك ما تواخذني بس الهيئة متقل انا هالمرة.....
شو يعني انتمائي الشخصي؟؟
شو هاد؟

يعني انت بتحس حالك ايو اكثر
سوري
مسلم
مسيجي
حزبي
او مابتنمي لاي وحدة من هدول

[Purple Rose]

انا بنتمي لديني قبل ما انتمي لبلدي لانو لما الناس بدها تجي تحاسبك على غرار يلي عم بيصير هلأ .. بتحاسبك ع دينك ومذهبك وبتصنفك تبعا لدينك و مذهبك مش تبعا لبلدك

[waleeeeeedo]

الإنسان بيولد على الفطرة، إنتمائي الأساس لديني الذي هو محركي الداخلي تجاه نفسي وأهلي ومجتمعي ووطني، بس برضو استفتاءك حاسو مو ممضبوط 100% والغرض منه غير واضح

[ورده بغداد]

انا صوتت للاسلام

بس ماعارفه لشو هالتصويت مع ان المواضيع الاسلاميه ممنوعه واخدت مخالفتين عنهم

مع انو في ناس تحط مواضيع تتهجم على الاسلام ما يعطوهم مخالفات

[اممي]

كاتب النص الأصلي : ورده بغداد

انا صوتت للاسلام

بس ماعارفه لشو هالتصويت مع ان المواضيع الاسلاميه ممنوعه واخدت مخالفتين عنهم

مع انو في ناس تحط مواضيع تتهجم على الاسلام ما يعطوهم مخالفات

انا انسان الي بيعرفوني بيقولو اعني لا ديني
وانا بفتخر بهالشي
وهدف الاستفتاء راح تعرف بعد 4 ايام يعني لما بيكون عدد المقترعين اكثر من 20 عضو من اصل 100عضو بالاخوية

[بنفسجة]

سوريا حبيبتي
انا بصراحة ما بفوت منتديات ذات طابع ديني طائفي
حتى بالمنتديات بشكل عام ما بفوت القسم الديني الا فيما ندر
واتفاجات لما قال البعض هون انو هيدا المنتدى مسيحي بالاصل
لان ما شفت فيه اي قسم بيدل على انو حكر على الديانة المسيحية فقط
لو اعرف هيك ما كنت فتت وصار في عندي ناس حبون هون

[ريتــا]

انا مني من سوريا , و ما حبيت اتحيز بس كل واحد بيحط هو لشو بينتمي
و كمانا ما حبيت حط اني ما بنتمي لولا شي , لانه كل واحد بينتمي لشي معين
انا بنتمي للبنان و الاسلام
و اخترت الاسلام هون
و بعدين اخوية , ما فيها تحيز ديني ولا شي , بس ما بعرف شو الي صار اخر ايام , المهم انو المواضيع الي كانت مسيئة النا انحذفت
شكرا ع الموضوع , و ان شاء الله الي صار ما بيتكرر و بضلون اعضاء اخوية اخوة مع بعض و مترابطين

[اممي]

كاتب النص الأصلي : بنفسجة

سوريا حبيبتي
انا بصراحة ما بفوت منتديات ذات طابع ديني طائفي
حتى بالمنتديات بشكل عام ما بفوت القسم الديني الا فيما ندر
واتفاجات لما قال البعض هون انو هيدا المنتدى مسيحي بالاصل
لان ما شفت فيه اي قسم بيدل على انو حكر على الديانة المسيحية فقط
لو اعرف هيك ما كنت فتت وصار في عندي ناس حبون هون

صوت رفيقة؟؟

[ابو ريتا]

عربي و أفتخر

[بنفسجة]

كاتب النص الأصلي : اممي

صوت رفيقة؟؟

صوتي لسوريا اولا واخيرا بكل من فيها
اسلامها ومسيحها
ملحدها ومؤمنها
موالاة ومعارضة
صوتي لابن بلدي ولروح بلدي