كتاب واحد لشو ؟ لأهديه لشخص ؟ لأتركو عندي ////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -/////////////// ؟ لشو بالضبط ؟؟؟

كتاب لتخليه عندك دايما، و قد ما تعيديه بالقراية ما تملي منو

لو حدا حكالك ما بتعرفي تكتبي شو بتحكيلو؟ ////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

بقعد يومين مهزوزة ثقتي اللي هي اساسا قليلة باللي بكتبو
بعدين .. برجع بقلو بحترم رأيو بس في ناس بتستسيغ شو بكتب .. وهيك


أنا لو منك، بحكيلو، أنت اللي ما بتعرف تقرا! :lol:


كيف كانت العودة؟
قصدك كيف رجعت ؟ ولا كيف شايفة اخوية بعد ما رجعت ..
قصدي إحساسك، حسيت إنك اتخذت القرار الصح؟ فترة الابتعاد ساعدتك على إنك تشوفي الأمور بموضوعية و حياد أكثر؟ هذا قصدي

////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -/////////////// وبحبك كتير
و أنا كتير كتير:mimo:

رح أعطي رأيي بالاشخاص اللي بعرفن او اللي بيهمني اخد دقيقتين لاحكي عنن .. غالبا ً .. الحكي قايلتو قبل



Gazita
اشتقنالا ليش ما عم تطل :pos:

marioma alghzayala
مرامو .. صار مليون مرة حاكية عنها بأخوية .. اختي وصديقتي بحبا وبحترما وهالقصص

hanny dagher
:lol: صهري مسند ضهري

layla
طيوبة و مهضومة وهبولة كتير .. هالبنت من نوع

sezar
فنان وأكابر ...


butterfly
شغلة كبيرة :gem:

وشم الجمال " ربيع انثى"
هالبنت من الناس اللي بيعطوني دعم وهيك .. بنتظر ردودها وقت بكتب شي .. ما بفهم ليش ع طول الحزن محاوطها .. :D

Hashtnasht
أبونهلة .. من أكتر الناس اللي بحترمن بأخوية .. بشتقلو وبعزووووووووو وهالقصص .. نهال مثقف بدون تبجح وحركات المثقفين .. ونهفة والله لنكيف

ٍٍٍSyrian Gay
طيوب كتير ..

Fares
فارس الشخص اللي بيحسسني أنو كلمة أخوية راكبة ع أخوية .. محترم وراقي ومبدع .. وقت بيكون موجود بأخوية وعم يشارك بحس أني حابة المكتبة أكتر ..
الله يحميه ... رائع

yass
أخي أكتر شخص بأخوية بتخانق معو هو ياسين .. من الناس اللي أنا فخورة انن بحياتي .. وفخورة بصداقتن جدا ً .. ياسين بتوقعلو مستقبل كبير
ياسين من الناس اللي ما بتبين محبتن ألي إلا بالمشاكل بحسو بخاف عليي وبيسندني ولولا ياسين في كتير مراحل بأخوية ما كنت تخطيتا ..
بحبو جدا من الناس اللي بيجمعني فين بيتعدى اخوية بكتير .. وبعتقد انو صداقتي مع هالزلمي مرقت بمنعطفات كتير .. وحافظت ع قوتها .. :) ياسين الصديق اللي رح حاول اني احتفظ فيه طول العمر
" هيك قال اتجوز ولسى هو عم يبهدلني ليش انا كتير عاطفية مع ولادي :lol: "

SABE
:akh:


HUS
من أروع الناس اللي التقيتن بحياتي ...

Barleb
بارليب الشخص ما بيشبه بارليب اخوية :shock: بيشبه أبو الهول .. كل تلت ساعات بيحكي كلمة ..
بعزو هالصبي وبثق فيه كتير :gem:
باشق مجروح
ما كتير بعرفو :? بس بحسو حباب

the light
زوروني كل سنة مرة :lol: منحكي مع بعض بالمناسبات بس دايما وقت بكون بحاجتو بيكون حواليي :) بطريقة ما

سرسورة
المشغولة دائما :hart: أكابر هالبنت ..



يتبع بعدين كتير كتير كتار

مارسيلو .. شئد بتحبيني ؟

ما بطيقك ببساطة يعني :p

ما بطيقك ببساطة يعني :p



العمة مألئمك ياشيخة :frown:

- إذا سؤلتي سؤال مصيري ... وفيه شي من الكرامة .. ومن الخطر ع حياتك ..... شو بتجاوبي : أي أم لأ ؟
مشان ما حاول بين بمظهر البطلة .. أعتقد أني رح قول أي وعيش ..
حالات قليلة ونادرة وتتعلق بمعتقدي الديني وانتمائي لسوريا ممكن يعني خاطر وقول لأ
يعني بقصد بتفضلي تعيش من ورا الإي .. او بتموتي من ورا ال لأ ؟
- شو رأيك بالمجتمع بهالأيام ... العربي .. والسوري بشكل خاص ..
:? ميت .. وقت بقرا مشاكل المجتمع العربي الموجودة مسبقا ً .. واللي الموجودة اليوم .. نفس السير عم نحكي فيها نفس المشاكل نفس القضايا .. :)


- رأيك بالشغلات التالية : الدخان , الجنس , الموت , السياسة , غزة , اوباما , بوش , ...
الدخان .. أحدى تناقضاتي .. ما بحب البنت تدخن وبجن ع السيجارة بإيد الرجل .. :larg:
الجنس بالنسبة ألي .. هو

- كيف بتشوفي الشباب العربي اليوم !؟ والسوري بشكل خاص ؟!
غير فاعل وغير منظم غائب سياسيا واقتصاديا واجتماعيا يا أخي كتير وقت والقليل من الانتاجية المنظمات مقتصرة على بعض المنظمات الدينية اللي ما بتعبر الا عن نسبة قليلة جدا من الشباب السوري


- كيف بتشوفي التعليم بسوريا ؟
عم يتحسن ع البطيء البطيء
بس عموما ً سيء .. غير مبدع .. غير منظم ..
المناهج غير فعالة اسلوب الامتحانات شغل بصم والمدارس يا عيني :?

- الإنترنت .... بسورية ... عم يفيد أم عم يضر ؟!
عم يفيد ..

واكيد أسئلتي المعتادة :
شو أهم تطلعاتك لعام 2009 ...
أتخرج .. أتطور بشغلي .. أنساه .. أكون من أول تلاتة بالعلاقات الدولية
أصمد مبلغ من المصاري " أعالج مشكلة التبذير تبعي " .. أنحف وبس ببالي هدول

- شو أهم انجازات عام 2008 بنظرك ... وشو أكتر شي زعجك فيها ...
نجحت بالعلاقات سنة اولى معدل 80.4
اشتغلت وحاليا صرت مستقلة ماديا
حققت تطور بشغلي ترقيت خلال تلت شهور
نزلت عشرة كيلو :p

أكتر شي زعجني أنو الاسنان لسى عالقة معي على مادة وحدة أكتر من زعجني أحبطني جدا


- رأيك باللي صار بغزة بكلمتين ...
شيء مخجل على الصعيد الأنساني أنو الأنسانية لا زالت تؤمن بالعنف لحل مشاكلها
مأساوي على الصعيد السياسي العربي " الكل عم يحاول يطالع مكسب شخصي من وراء دم الابرياء " .


- كيف بتشوفي مستقبل ولاية أوباما ... وهل رح يغير شي من سياسة بلدو ..
إي رح يغير .. بس لصالح بلدو " تحسين صورتها عالميا ً .. وتحسين الاوضاع الداخلية " .


- شو تقديرك للأوضاع بعد 50 سنة
أفضل .. من الآن حتما ً

- شو هيي أصعب لحظة بحياتك ...
وفاة والدي

- شغلة غريبة صارت معك .. ومافهمتيها .. بقصد غريبة بمعنى (خارج عن الطبيعة .. )
:? ولا شي

- بتتمني تعيشي بالقرن التاسع عشر ؟
لأ

- كلمة للبشر ... !
فلتسقط كل الإيديولوجيات بالحب وحده يحيا الإنسان

- تغييرات بتحبي تعمليها بأخوية ..
مقاعدة أشخاص
ترفيع أشخاص
فريق جديد
قسم جديد للمكتبة بيفصل القسم الادبي عن الكتب عموما ً
إظهار الأدب بالصفحة الرئيسية
إخفاء العديد من الأقسام بتبين بس كسطر من أخوية


- شو أكتر شي بتخافي منو .. وبصدق
..العزلة

- لو كان بإيدك تطلعي عالفضا .. مين بتاخدي معك من أخوية ..
( ما حددتلي عدد ) :p
شوش وحسام وياسين وعبد ومرام

- انتي شو ب3 كلمات ... !؟
أنثى .. مشرقة .. زكية

- هل انتي راضية عن الكرة الأرضية بوضعها الحالي ... شو نظرتك للأمور التالية : بيئة - فقر - نكبات - ثروات طبيعية موارد غير متجددة - مستقبل السيارات - ..
:lol:باااااااااااااااااس بدي عشر ساعات لاكتب رد عن كل وحدة
- لو رجع الزمن لورا .. شو كنتي بتحبي يصير ..
ما أدخل طب أسنان

- بتآمني بالقضاء والقدر , بالسحر , وجود كائنات غريبة ع الأرض أو ع غير كواكب ..
لأ

- شعور بتكرهي ..
الوحدة ، المراقبة ، القيود اللي ما بفهمها

- شغلات بتفتقديها بهالإيام ..
الحب ، أبي ، :) شوش ..

- شعور صرلك زمان ماحسيتي فيه ...
أني أحدهم فخور فيي :)

- هل في أعضاء تغيرو بنظرك بعد ما حكيتي معهن مباشر (نت او لقاء مباشر .. ) ؟
أي كتير كتير

- كلمة بتوجهيها لأعضاء .. هني بيعرفو حالهن .. بس بدون ماتسميهن ...
لولاكن ما كنت أنا أنا
بحبكن كتير
شكرا ً لأنكن بحياتي

- هل انتي من جماعة التحشيش (دخان أو أركيلة .. ) وإذا لأ .. شو موقفك منهن ..
لأ ما بأرجل ولا بدخن ولا بحشش نشكر الله

- كيف بتشوفي أخوية بهالأيام .. وبالأيام الجايي ...
ضعيفة جدا بهالكام يوم .. عم تحاول تسير نحو الأفضل .. ورح تصل :)
بشوف أخوية مانا بأحسن أوقاتا وبحاجة للكل ..
وبشوفا بالأيام الجاية أحسن بكتير :) عندي ثقة


- شو حلمك بهالحياة .. وهل حققتي وللا لسا ...
أحلام كتير كتير .. حققت البعض
والبعض لسى عم اشتغل عليه ..
طموحي عموما ً أني عيش وأنا راضية عن نفسي :) مستغلة طاقاتي حتى أقصاها


- رجل الأحلام تبعك ... شو مواصفاتو... هل هوي حقيقة ام حلم ..
راقي مثقف ، منفتح ، بيحاور .. وجودو بحياتي بيخليني أكبر ... في بيناتنا مساحة كبيرة للحوار والمشاركة
وهو حلم :) ممكن يتحقق

- هل انتي حر بقراراتك .. وشو هيي القرارات اللي ندمتي عليها بحياتك ...
لأ ماني حرة .. بس عم حاول اني كون حرة بقراراتي أكتر يوما بعد يوم
ندمت أني دخلت أسنان .. اوقات بندم أني تركت شخص كان ممكن يكون سعادتي

- ليش بحسك بتكرهيني :lol:
كبر عقلك يا زلمي ليش انا بعرفك لأكرهك :shock:

.
.
وتحياتي ...
THE,unforgiven ... "
وتحياتي أنا كمان

ميمو ومن وحي الاعمال اللي قدمتيهون

1- لو كنتي مكان بطلة رواية عيناك قدري شو بتعملي؟؟؟
2- لو كنتي مكان بطل رواية الان هنا او شرق المتوسط شو بتعملي؟؟
3- لوكنتي مكان بطلة فيلم sweet november شو بتعملي؟
4-لو كنتي مكان كوليت خوري بالحياة العادية شو بتعملي؟

5- ميمو بدي منك تكتبي كلمات لولادك الجايين

6-لو انتي اليوم مكان الحكيم شو بتعملي بوضع الاخوية الحالي

7- احد الاعضاء اقترح ذات يوم انو نعمل اعتصام لاجل كريم وسماكي انتي تحديدا لتكوني من بين الاعضاء اللي بدو يقلون عالاعتصام شو رح تكون ردة فعلك لو هالشخص رجع واقترح الفكرة مجددا

هدول لهلأ

أني أحدهم فخور فيي
في كتار فخورين فيكي

ميمو...مسا الخير .. انا حابه اسالك كم سؤال وشكرا الك لانك قبلتي ....

بيعجبني فيكي ايمانك ...وعلاقتك مع الرب ....الي انا فاقده هل الشي ..
وكونو المسيح نادى بالمسامحه ....مرسيل كم لك من القدره على مسامحه الاذيه لك ...

هل تؤمنين بالزواج انه نهايه الحب ..ونهايه المستقبل العملي للمرأه ...

اخويه أذيتك؟؟؟ ...ولا الناس الي فيها ؟؟؟.....وشو بتحبي تنصحيني كعضوه جديده باخويه ؟؟؟؟

هل تشعرين بعدم الانصاف بالحياه .؟ من اي جهه ؟ ان كان جوابك نعم ...

ماذا تعني الغيره لمرسيل ....ومما تغار مرسيل ....؟؟؟

شو رده الفعل لمرسيل على الاشاعات ؟؟؟؟ الهروب ...ام المواجهه ..ولا التطنيش ....؟؟؟

هل اوجدت مرسيل نفسها بالعمل ..ام بالكتابه ....اكتر

بكفي لهون ....

لك كل الود وشكرا لان قبلتي أسالك ميمو .....:D

انا بس بحب قلك شغله ....من خلال كتاباتك ...وردودك ...بتمنى اضلي متل ما انت ...butterfly.... :D

اخر سؤال ...كيف ممكن انعدى منك وارجع أقرا كونو وقفت من زمان :p

صوفي ....

محمد ابراهيم
مجادل :p ونسونجي ... وبيتأخر ع مواعيدو :gem:
GOVERMENT
نهفة حسن .. بس بيعصبني أنو ما داير بالو ع دراستو
صياد الطيور
:cry: وسوفي مر .. وبعتذر منو عالخبصة اللي هو يبعرفها :lol:

رجل من ورق
هالزلمي بحس أني بقدر حبو اكتر من بعيد ، فيه شي من عدم الصدق ما بفهمو :) ولأني بعزو " هو طيوب بس مدري كيف " حسيت لازم بعد وضل بعزو

the morrning
لو أخوية عاطيتني هالصديقة وموقفة .. بيكون انا ممتنة لأخوية دنيا وآخرة
من أعمق العلاقات بحياتي بهالفترة .. لأ بصراحة أعمق علاقة بحياتي وأقرب صديقة .. بحبا قد الدنيا
وبحس أني .. بفهمها وبتفهمني والأهم بحس أني بقدر كون أنا معها .. بدونها كتير شغلات فيي كانت رح تكون مختلفة
محبتها بتحسسني بالأمان وأنو الدنيا تمام .. :) وبتحسسني أني ما كائن لونو أخضر :lol:
عنا كتير زكريات عميقة لدرجة ما اعتقد انساها بحياتي .. هي من تفاصيل نهاري بحس في شي أساسي ناقص إذا ما حاكيتا ..
هالصداقة فيني قول بثقة أنها رح تعيش كتير :) :gem:

handsome
شغلة مشتاقتلو

abosleman
الظروف بعدتنا ما بعرف ليش .. بس بعرف أنو هالزلمي بيعزني من قلبو وأني أنا كمان بعزو كتير


LiOnHeArT .3la2
ما كنت متوقعة بحياتي أني طيقو لهالولد :sick: بس والله تجري الرياح كما لا تشتهي السفن
بيخليني أضحك من قلبي .. ومن فترة حسيت اني كتير باكل همو .. وبخاف عليه وحتى اني بصليلو .. فأنو يعني ما بعرف :lol: هبول هالولد بيفوت عالقلب...

yamen_h
مع أنو انا وهالصبي بنفس المدينة بس ما منلتقى كتير .. علاقتنا هيك عالرسمي .. وبيعمل حفلات وبيعزف وما بيخبرني وبسمع من الناس :pos:

BL@CK
عبد فاجر جدا ً .. وبحس أنو هالزلمي لغتو بالتعبير بتظلمو كتير
اللي ما بيعرف عبد بالواقع اخوية ما بحسها بتنصفو لهالصبي
عبد الصديق الكفو للموت .. واللي بس حب حدا بيدافع عنو بروحو ..:) وقت بفكر بوجود عبد بحياتي بعرف كيف يعني يكون عندك شخص لو بتحتاجو بأخر الدنيا بيجيك :)
هو بيعرف اني ما راضية عن كتير قصص عم تتغير بشخصيتو بس مطنشني :pos:

ميمو بالمقلاية .... معناها رح حضر الزيت و الغاز :lol:

بس قلي ع الخفيف ...
هلا يا زلمي اشتقتلك ..


- لماذا اخترتي هذا الاسم butterfly
أنثوي ... طفولي .. مشرق .. بحب الفراشة بتفائل بصورها .. بشكلها بألوانها ...
+ أنو أكتر مقطع بحبو من أكتر رواية بحبها اللي هي زوربا
هو مقطع بيحكي عن الفراشة

- اذا تعرفتي على أخوية اليوم ... تستمري و تسجلي فيها او لا ؟؟ مع ذكر السبب
أي يا زلمي عندن مكتبة شغلة .. وموقع محجوب لأجل فكرو .. وفيه شباب قدمت حريتها .. ومجتمع سوري عم يحاور ويناقش .. أكيد أي ..
ورح استمر ومارس صلاحياتي وكل شي بس كنت رح كون حذرة اكتر بنوعية العلاقات اللي رح اتعرف عليها بأخوية

- ليش خليتي شخصيتك الاخوية تحتلف عن شخصيتك اليومية ؟
المسؤولية يمكن .. الوقت .. الحاجة .. التواصل ع الأنترنت جامد وجاف ما متل التواصل الحيوي ..
يعني انا بضل عم أفعي " أتحرك واتحدث واعبر بالواقع " بأخوية بحس اني بنفس الطاقة بس بمجالات تانية ..
بالحياة انا أقل جدية مما أنا بأخوية .. لأنو بأخوية الفرح تبعي ماعم اعرف كيف عبر عنو بعجقة القصص اللي حابة اعملها ..


- تؤمني بالمساواة بين الرجل و المرأة ... ؟
أؤمن بالحقوق المتساوية لكل الناس .. بس لا أؤمن بمساواة محسبة أنها رح تحول المرأة إلى رجل ..

و لو صرتي وزيرة حقوق المرأة ... ما هو اول و ثاني قرار رح تاخذيه ...

رح أدمج الوزارة بوزارة الشؤون الاجتماعية لأنو ما بدي اعمل تمييز ضد الرجال يكون في وزارة لحقوق المرأة ولأني أعتقد أنو مشاكل المرأة هي جزء من مشاكل المجتمع عموما ً
تاني شي بعد ما ندمجها بلغي قانون جرائم الشرف .. بتابع تسرب البنات من المدارس وتعليم المرأة وهالقصص هدول .

- بعد 50 سنة .... شلون ممكن نشوف ميمو
إذا عشت لوقتا ؟
عندي مكتبة وعم أكتب .. شي أسبوعي أو كتب او هيك شي يعني بهالسياق


و التتمة جاية
:lol: لسى في تتمة ؟

MadMax
انا وسامر ما فيني قول أصدقاء .. يعني ما بحس منعرف بعض منيح بس الشغل مع سامر حلو .. كفو هالزلمي بتقدر تعرف انو الشغلة رح تصير تماما وبالوقت وهيك ما بدك عشرة يلاحقوه :gem:
وائل76
بحب أسلوبو بكتابة المقالات .. واشتقنالو جدا ..

مسطول ع طول
نهفة .. بيزودها اوقات :pos: بس بيبقى نهفة

أمرأة من ورق
آخ هالبنت لو كانت بأخوية حاليا :lol: بحس بقدر اعطي اكتر بوجودها .. بنفهم على بعض بسرعة .. منقدر نتواصل ونتفاهم
محترمة وراقية وبتقدر تحترم اختلاف الاخر بسهولة
من الناس اللي منفتقد حضورن بأخوية هالأيام


مايا*
صديقتي واختي الكبيرة .. بحس أنو نحنا متناقضين جدا بالمزاج .. :) فرحي والحزن تبعها
بشوف روحها نقية جدا ً .. بثق فيها وبحترم وجهة نظرها
وبحتاج وجودها بحياتي كتير :)
بحبا لهالبنت باختصار يعني

ليندا
:? غطت فجأة وما عدت سمعت أي شي عنها


abu william
كتير تغير عليي .. بحس أنو اول ما فات ع أخوية كان شي .. ومواضيعو هلق شي تاني تماما ..
:) حتى ما عدنا نكره بعض :p:p تحسن الوضع كتير

zen
ما بحس أني بعرفو تماما لهالزلمي ..

abu toni
كابي .. بيشتغل ع حالو كتير .. بس مشكلتو انو عصبي ووقت بيفوت بجدل يا ويلاه :lol:



sandra
هيك بحس علاقتنا بسيطة بدون تعقيد .. بحبا وبحترما .. كشخص وكجزء من الفريق
بحس أنو ساندرا أحيت قسم أنا بحبو .. وكنت متوقعة ما يعيش بحياتو
طيوبة هالبنت ..

Roaa
رؤى من الناس اللي كتير كنت ظالمتها بنظرتي عنها .. كنت متوقعة انو انا وهالبنت ما معقول نتفق :) وخاصة وقت كان اسمها دلوعة سوريا :jakoush: اليوم بحس أنو وجود هالبنت بأخوية مهم .. نشيطة
لأ وأنا عاملتها المستشار تبع أناقتي .. كلما بكون مزنوقة دخيلك يا رؤى شو البس ؟ شو أعمل ؟

ميمو ..
اول شئ بحب اعلنو انى كتير بحبك مو بس لانك شخصية قيادية بامتياز لكن كمان لانك دايمن بتدهشينى بكمية الحب اللى بيسكنك ع طول
الله يزيد ايامك حب وعشق وغرام



:D
:lol: وأنا كتير بحبك .. :oops: مع أنو كنتي تطالعيلي روحي .. لبين ما تنزلي الموضوع بشكلو الصح :gem: بس بحس أني اليوم بفرح كتير أنك جزء من الناس اللي موجودين بالمكتبة وبحترم ثقافتك جدا ً ..
ميمو ...فيكى تقوليلنا كيف لما بيدخل الحب قلبك صعب يخرج منو ..؟
اي زيادة .. حسيت بالفترة الأخيرة أني بحب الناس للفترة اللي لازم اتوقف عن حبن فيها
قديش بتأثر الظروف فى علاقاتك مع اللى بتحبيه..؟
إذا كنت بعلاقة " يعني بحب ه الزلمي وهالزلمي بحبني " عندي استعداد حارب كرمالو .. الدنيا كلها .. ما كتيربعتقد انو في ظروف بتقدر توقف بوش تنين عندن إرادة ..
إذا كانت الظروف أنو أحدنا ما عندو الإرادة يكفي بهالعلاقة معناتا تعدى الموضوع الظروف صار لازم نعيد النظر بالحب تبعنا

الك نظرية مختلفة فيكى تعلميهالنا فى الحب ؟
:? لأ لأ ما عندي نظرية مختلفة .. أنا بحب متل كل هالناس .. بس بعبر شوي زيادة
انا مع الحب اللي بيشع من الشخص وبيملاه طاقة وفرح ..
وقت بحب بحس حابة بشر كل الناس انو هادا الحب اللي بيحيي لازال موجود
بشوف الحب علاقة بين شخصين عم يكبرو سوا .. عرفانين انو المسيرة تبعن يمكن يكون فيها منعطفات وانو العلاقة رح تشذب الطرفين وتغيرن ..
الحب التزام .. بالشخص الأخر كاملا .. بنقاط ضعفه ونقاط قوته :)
هي حرية أنو يكون " هو " وأني كون " أنا " .. :) وبالحب نقدر نكون " نحنا "

ما بعرف الحب هو الشي اللي بيخلي الحياة الباردة بتستحق أنو تنعاش

:akh:

ويني ميمو :?
بالقلب :hart::p

نفدنا وما طلع اسمنا :yahoo::angel:

نفدنا وما طلع اسمنا :yahoo::angel:
انا طلع اسمي والجواب متل مابدي
:gem:
ميرسي مرسيل

بالقلب :hart::p




و الجزء الاول من اسئلتي بالمشمش ;)

Gazitaغزلانو من اطيب واهضم بنات اخوية..بحبا كتير ومشتاقتلا




Gazita
غزول بنت حبابة وبتذكرني بالعز وايامو

رتروت اشتقتلك كتير ياقمر وبطمن عليكي هنيك:hart:
زين ميغسي ياغالي الي الشرف اني اتعرفت عليك واتعرفت على كتير ناس حبيتهم هون
بحبكم كتير خواتي:hart:

ما كنت متوقعة بحياتي أني طيقو لهالولد ////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -/////////////// بس والله تجري الرياح كما لا تشتهي السفن


عجبك لك ميمو عجبك

يلا دخيلك :p


هاموش :
ميشص يو انا

ميمو يا ميمو
سؤال واحد ..
ليش فكرك اسمي دايما بضل (يسقط سهوا ) من قائمة اسماء الاعضاء ؟ :frown:
لأنو .. همممم ما بعرف خايفين أعبر قدي بحبك ويغارو بقية الأعضاء عرفتي كيف ؟ :lol:

هلأ السؤال الجد ..
لمحات منه .. مقدس هالموضوع عندك .. مدونتك اسمها لمحات
آخر خواطر نزلتيها كانت عنو
كانو كل شي عم يدور في فلكـ( ـه )
وينك بدونو .. بتقدري تشوفي حالك بدونو ؟
لك ليش هو معي :? ؟
أي شعوري تجاهو " كان " من أقوى المشاعر بالفترة اللي مضت :)
بس فعليا ً أي قادرة اعيش بدونو
وعم عيش :) وبسعادة كمان


ما بدك تجاوبي عليه فيكي برياحة تعملي skip :pos:
دخيلو الضارب بوز :gem:

بقى معقول تكوني بالقاهرة ومايكون عندي علم :pos:

يعني مابدك تقابليني :pos:
:lol:
خلينا ساكتين أحسن :p

اقامة سعيدة وانشالله تستمتعي بالرحلة ،

بدي اسئلك

شو بدك تزوري بالقاهرة ؟
باقي حابة زور مكتبة الاسكندرية لأنو ما أخدونا عليها بلكي بزيارات قادمة



شو الشيئ اللي ماعجبك بالقاهرة لهلاء ؟ (بس رتبي هالاشياء من حيث الاهم فالاقل اهمية و بدي تقولي من اول الشيئ الحادي عشر وما تذكري اول 10 اشياء :o )
الازدحام .. المواصلات .. الأكل ..

مخططة للاستيلاء على كم كتاب بهالرحلة ؟
:frown: كنت مخططة استولي ع كتير بس ما حدا أخدني ع شي مكتبة

واخيرا ليش ما خبرتيني انك جاية القاهرة :pos:
:jakoush::jakoush::jakoush:

كتاب لتخليه عندك دايما، و قد ما تعيديه بالقراية ما تملي منو
زوربا غالبا ً ... :gem:

لو حدا حكالك ما بتعرفي تكتبي شو بتحكيلو؟ ////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

بقعد يومين مهزوزة ثقتي اللي هي اساسا قليلة باللي بكتبو
بعدين .. برجع بقلو بحترم رأيو بس في ناس بتستسيغ شو بكتب .. وهيك


أنا لو منك، بحكيلو، أنت اللي ما بتعرف تقرا! :lol:
:oops::oops::oops:

كيف كانت العودة؟
قصدك كيف رجعت ؟ ولا كيف شايفة اخوية بعد ما رجعت ..
قصدي إحساسك، حسيت إنك اتخذت القرار الصح؟ فترة الابتعاد ساعدتك على إنك تشوفي الأمور بموضوعية و حياد أكثر؟ هذا قصدي
أخدت القرار الصحيح بالرجعة .. لأ ما بالضبط .. لازلت حاسة انو حجم الضغط اللي عم تمارسو أخوية عليي أكتر من اللازم .. ولازلت حاسة أنو في أشخاص لازم يكونو ما معنا .. ولا زلت عم انطر التغيير الجايي
بس .. مرتاحة أني عم أعمل اللي بقدر عليه :) .. ولنشوف ..

////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -/////////////// وبحبك كتير
و أنا كتير كتير:mimo:

1- لو كنتي مكان بطلة رواية عيناك قدري شو بتعملي؟؟؟
كنت وافقت أتجوزو لعماد وتصالحت مع أنوثتي


2- لو كنتي مكان بطل رواية الان هنا او شرق المتوسط شو بتعملي؟؟
ما اعتقد اني بصمد للدرجة اللي صمدها هو ..

3- لوكنتي مكان بطلة فيلم sweet november شو بتعملي؟
بموت متلا تماما ً ... :lol:

4-لو كنتي مكان كوليت خوري بالحياة العادية شو بتعملي؟
ببطل بنشر بدار طلاس
بخفف وعظ بكتاباتي
بكتب بجرأة أكتر

5- ميمو بدي منك تكتبي كلمات لولادك الجايين
كتار الاشيا اللي رح قولا لولادي ما بيكفي الوقت اني احكيها هون

6-لو انتي اليوم مكان الحكيم شو بتعملي بوضع الاخوية الحالي
بقاعد البعض
وبرفع البعض الآخر
برجع ياسين
بجيب دفعة منسقين جدد
بفوت ع أخوية كل يوم ساعة ع الأقل
بصلح وضع المرفقات والسيرفر

7- احد الاعضاء اقترح ذات يوم انو نعمل اعتصام لاجل كريم وسماكي انتي تحديدا لتكوني من بين الاعضاء اللي بدو يقلون عالاعتصام شو رح تكون ردة فعلك لو هالشخص رجع واقترح الفكرة مجددا
رح ارفض .. أول شي لأنو الاعتصامات رح تأذيه أكتر ما تفيدو .. تاني شي لأنو ما كتير حابة خاطر بدموع امي ..

العمة مألئمك ياشيخة :frown:
لكان بعد العمر ده كلو .. وسنين العذاب الطويلة :cry: تجي تكتبلي .. أسمي بالالف


في كتار فخورين فيكي

شكرا :mimo:

ميمو...مسا الخير .. انا حابه اسالك كم سؤال وشكرا الك لانك قبلتي ....

بيعجبني فيكي ايمانك ...وعلاقتك مع الرب ....الي انا فاقده هل الشي ..
وكونو المسيح نادى بالمسامحه ....مرسيل كم لك من القدره على مسامحه الاذيه لك ...
بشكل مطلق هل بسامح هيك .. لأ ما بشكل مطلق بس بحاول أني سامح او أني ما أحقد .. بس ما بيمنع أني كون حذرة بالتعاطي مع الأشخاص اللي أذوني

هل تؤمنين بالزواج انه نهايه الحب ..ونهايه المستقبل العملي للمرأه ...
حسب أيا زواج .. الزواج اللي تقليدي وبس لأنو بدها رجل .. أي يمكن يكون هيك
بس الزواج اللي أنا بعتقد فيه .. هو شراكة بيكبر فيها الحب .. وبيتعمق ما بيضل مجرد شعور بالخفقة تبع القلب وهالقصص .. وبعتقد أنو الشريك اللي بيحب عن جد رح يشجع طموحي و مستقبلي


اخويه أذيتك؟؟؟ ...ولا الناس الي فيها ؟؟؟.....وشو بتحبي تنصحيني كعضوه جديده باخويه ؟؟؟؟
أخوية .. والناس اللي فيها
أخوية وعت فيي شغلات يمكن كنت رح أكون أبسط وأكثر سعادة لو ما عرفتها ..
الناس اللي فيها هدول بقى سيرة طويلة :fthink:
أكتبي .. عبري .. شاركي .. حبي أخوية .. انطري شوية وقت لتحكمي عالعلاقات بأخوية لأنو كتير اخوية مجتمع كبير ومتنوع ..
وخليكي مشرقة
:akh:


هل تشعرين بعدم الانصاف بالحياه .؟ من اي جهه ؟ ان كان جوابك نعم ...
لأ .. انا شخصيا لا أشعر ان الحياة ما أنصفتني .. لا بل أعتقد أنو الحياة اعطتني الكتير .. :) وبعتبر حالي محظوظة

ماذا تعني الغيره لمرسيل ....ومما تغار مرسيل ....؟؟؟

بغار ع اللي بحبو .. بس بدون جنان وانو اعتقد اني رح كون الحبيبة والصديقة واختو وامو وكل شي
بغار من اللي بيمتلكو هدوء .. خاصة انو ما عندي منو هادا الاختراع
وبغار من اللي بيقدرو يمسكو دموعن ..


شو رده الفعل لمرسيل على الاشاعات ؟؟؟؟ الهروب ...ام المواجهه ..ولا التطنيش ....؟؟؟
طنش .. مانك مضطر تفسر لكل الناس انت مين وشو .. وإلخ إلخ إلخ ..


هل اوجدت مرسيل نفسها بالعمل ..ام بالكتابه ....اكتر
بالكتابة أكتر .. يمكن لأني صرلي كتير بمارسها ويمكن لأنها بتشبهني تماما / بتعبر عني ...


بكفي لهون ....

لك كل الود وشكرا لان قبلتي أسالك ميمو .....:D
ولو يا بنوتة :mimo:
انا بس بحب قلك شغله ....من خلال كتاباتك ...وردودك ...بتمنى اضلي متل ما انت ...butterfly.... :D
:sosweet::oops:
اخر سؤال ...كيف ممكن انعدى منك وارجع أقرا كونو وقفت من زمان :p
حاولي أول فترة تشتري الكتب اللي ما بتحتاج وقت طويل لتنقرا ..
يعني قصص قصيرة / شعر / مقالات
اقري كل يوم قصة او قصيدة او هيك
زيديها بعد فترة وهيك بتلاقي حالك رجعتي تقري وعين الله عليكي


صوفي ....

مرسيلو
:mimo:

و هاي كمان من أحدهم

بترفلاي العبارة التالية فيها شي خطأ نحوي ////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////
"البعض منن انو بيحبني فول باكيج دون انو محاولة فهم تعقيداتي "


- كمان هل بتظني انك بتحملي حالك مسؤوليات وذنوب لأمور انتي مالك علائة فيها؟؟"المفروض لو أنني أحيا الإيمان فعلا انو يقدر يلمسو حضور الله في حياتي "

- برأيك ايمت بكون الايمان اعمى؟؟

- عضوء اجابي سابقة الك حول زواجك من غير دينك..
هل انتي ضد الزواج المختلط بين الاديان (من حيث المبدأ)؟؟

- بدي رايك بشخصين :
رفيق الحريري
ياسر عرفات
(الله يرحم الجوز كون ما بجوز عالـ**** غير الرحمي)

- رأيك بمسلسل "ليس سرابا"؟

- how "he" reaction???

بالنسبي لسؤال الاماكن كنت متوقع شي تاني تماما...
دليل آخر.. انك مو مفهومي من الغرباء////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

تحية ////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

نفدنا وما طلع اسمنا :yahoo::angel:

أحمد
هبول وطيوب بس مليون جبسة بنفس الايد وولا جبسة بيعملها بإتقان ... :p وبدك تنق عليه .. ليعمل الشغلة

بخاف عليه كتير :) بتمنى من قلبي انو يدير بالو ع حالو وبلا دونكيشويات

انا طلع اسمي والجواب متل مابدي
:gem:
ميرسي مرسيل

أهلا ولو يا زلمي تعا كل يوم

و الجزء الاول من اسئلتي بالمشمش ;)

رديت عليه :pos::pos:



عجبك لك ميمو عجبك

يلا دخيلك :p


هاموش :
ميشص يو انا



وأنا ميس يو يا دبو :gem::gem:

و هاي كمان من أحدهم

بترفلاي العبارة التالية فيها شي خطأ نحوي ////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////
"البعض منن انو بيحبني فول باكيج دون انو محاولة فهم تعقيداتي "

:lol: أنو ليش فيها جملة راكبة نحويا
المعنى اللي قاصدتو انو بيحبني كلي عبعضي من دون ما يتعب حالو يفسر ويحلل انا شو


- كمان هل بتظني انك بتحملي حالك مسؤوليات وذنوب لأمور انتي مالك علائة فيها؟؟"المفروض لو أنني أحيا الإيمان فعلا انو يقدر يلمسو حضور الله في حياتي "
لأ أبدا .. انا بحس أني كان عندي كتير امتيازات بحياتي .. مقابلها في كتير مسؤوليات ..
أنا مجرد واعية لمسؤولياتي
" من ثمارهم تعرفونهم " ..


- برأيك ايمت بكون الايمان اعمى؟؟
وقت بيتطرف وبيعتقد أنو بيمتلك الحقيقة كاملة وانو كل آخر مختلف هو غير موجود أو باطل او أو أو ..
وقت بيكون غير قابل أنو يسمع ويحاور ومتمسك بقناعاتو دون القدرة على انو تكون هالقناعات ملائمة أكتر للأنسانية والأنسان ..


- عضوء اجابي سابقة الك حول زواجك من غير دينك..
هل انتي ضد الزواج المختلط بين الاديان (من حيث المبدأ)؟؟
لأ .. .
القوانين اللي بسنها لحياتي أنا .. ما المفترض أني عممها ع كل البشر
مو ؟
- بدي رايك بشخصين :
رفيق الحريري
ياسر عرفات
(الله يرحم الجوز كون ما بجوز عالـ**** غير الرحمي)
:lol: تنيناتن .. صارو محبوبين .. بعد ما ماتو
جوز أضرب من بعض ..

- رأيك بمسلسل "ليس سرابا"؟
ما بحضرو :oops:
- how "he" reaction???
برقي كالعادة .. بطريقة ما خلتني للحظة اندم أني خبرتو أو اندم لأني حبيتو ..
بطريقة بتجنن متلو هو ..


بالنسبي لسؤال الاماكن كنت متوقع شي تاني تماما...
دليل آخر.. انك مو مفهومي من الغرباء////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////
أو دليل أني بتفوق ع كل التوقعات :lol:

تحية ////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

هلا هلا هلا :mimo:

انا خلصت هلق مو ؟

شكرا لكل يلي قلو وليلي انقلو وكل مقلاية وانتو بخير....


بس شلون هالمقلاية ما كانت تيفال ابدا :lol: